ସିମୋର ପଞ୍ଚୁଦୋଳ ମେଳଣ ଯାତ୍ରା ଉଦଯାପିତ, ହଜାର ହଜାର ଶ୍ରଦ୍ଧାଳୁ ସାମିଲ - Panchu Dola Melana

Simor Panchu Dola Melana ଖୋର୍ଦ୍ଧା: ଜିଲ୍ଲାର ବେଗୁନିଆ ବ୍ଲକ ସିମୋର ଦୋଳ ପଡ଼ିଆରେ ମଙ୍ଗଳବାର ଦିନ ପଞ୍ଚୁଦୋଳ ମେଳଣ ଉଦଯାପିତ ହୋଇଯାଇଛି । ଏହି ମେଳଣ ଗତ ମାସ ୩୦ ତାରିଖରୁ ଆରମ୍ଭ ହୋଇଥିଲା । ଚଳିତ ଯାତ୍ରାରେ ଆଖପାଖ ଅଞ୍ଚଳର ୩୦ଟି ବିମାନ ଅଂଶଗ୍ରହଣ କରିଥିଲେ । ମଙ୍ଗଳବାର ଅପରାହ୍ନରେ ଠାକୁରମାନଙ୍କ ପାଖରେ ନୂତନ କପଡା ଲାଗି କରାଯିବା ପରେ ହାଣ୍ଡିଭୋଗ ଲାଗି ହୋଇଥିଲା । ଏହାପରେ ସେବକମାନେ ପୂଜାର୍ଚ୍ଚନା କରିଥିଲେ ।

ବହୁ ଆନନ୍ଦଉଲ୍ଲାସରେ ବାଜା ହରିବୋଲ ହୁଳହୁଳିରେ ଗଗନପବନ ପ୍ରକମ୍ପିତ ହୋଇଥିଲା ମେଳଣ ପଡିଆ । ଅବିର ଖେଳ ସହ ଦୋଳ ମଣ୍ଡପ ପରିକ୍ରମା ହୋଇଥିଲା । ହଜାର ହଜାର ଭକ୍ତ ଏହି ପଡିଆରେ ସମାଗମ ହୋଇଥିଲେ । ଠାକୁରଙ୍କ ସହ ଲୋକମାନେ ମଧ୍ୟ ନିଜ ନିଜ ବନ୍ଧୁ ପରିଜନଙ୍କ ସହ ଅବିର ଖେଳିଥିଲେ । ଶେଷରେ ଆଖପାଖ ଅଞ୍ଚଳରୁ ଆସିଥିବା ଠାକୁରମାନେ ସ୍ୱଗ୍ରାମକୁ ପ୍ରତ୍ୟାବର୍ତ୍ତନ କରିଥିଲେ । ଏଥିସହିତ ବିଶ୍ଵଶାନ୍ତି ମହାଯଜ୍ଞ ବେଦଜ୍ଞ ପଣ୍ଡିତମାନଙ୍କ ଦ୍ୱାରା ପୂର୍ଣ୍ଣାହୁତି ହୋଇଥିଲା । ସେହିଭଳି ରାତିରେ ମନୋରଞ୍ଜନ ପାଇଁ ସାଂସ୍କୃତିକ କାର୍ଯ୍ୟକ୍ରମ ସହିତ ଅପେରା ପାର୍ଟି ଯାତ୍ରା ହୋଇଥିଲା । 

ଇଟିଭି ଭାରତ, ଖୋର୍ଦ୍ଧା