ରାମଲାଲାଙ୍କ ଦର୍ଶନ କଲେ କେରଳ ରାଜ୍ୟପାଳ ଆରିଫ ମହମ୍ମଦ ଖାନ - Arif Mohammed Khan visit Ram Temple

ଲକ୍ଷ୍ନୌ: ରାମ ଜନ୍ମଭୂମୀ ଅଯୋଧ୍ୟାରେ ପ୍ରଭୁ ଶ୍ରୀ ରାମଲାଲାଙ୍କ ଦର୍ଶନ କରିଛନ୍ତି କେରଳ ରାଜ୍ୟପାଳ ଆରିଫ ମହମ୍ମଦ ଖାନ । ଗତକାଲି ସେ ଅଯୋଧ୍ୟାରେ ପହଞ୍ଚି ଦର୍ଶନ ଓ ପୂଜାର୍ଚ୍ଚନା କରିଛନ୍ତି । ଏନେଇ କେରଳ ରାଜଭବନ ପକ୍ଷରୁ ସୂଚନା ଦିଆଯାଇଛି । ନିଜେ ଆରିଫ ମଧ୍ୟ ଫଟୋ ଓ ଭିଡିଓ ନିଜ ‘ଏକ୍ସ’ ହ୍ୟାଣ୍ଡେଲରେ ସେୟାର କରିଛନ୍ତି । ଆରିଫ କିଛି ସମୟ ଗର୍ଭଗୃହ ମଧ୍ୟରେ ବିତାଇଥିଲେ । ରାମଲାଲାଙ୍କ ଦର୍ଶନ ସହ ଭୂମିଷ୍ଠ ପ୍ରମାଣ କରି କୃପା ଭିକ୍ଷା କରିଥିଲେ । ମନ୍ଦିର ଚ୍ରଷ୍ଟ ପକ୍ଷରୁ ତାଙ୍କୁ ସ୍ବାଗତ କରାଯାଇଥିଲା । ଦର୍ଶନ ପରେ ଟ୍ରଷ୍ଟ କାର୍ଯ୍ୟକର୍ତ୍ତା ତାଙ୍କୁ ରାମ ମନ୍ଦିରର ଏକ ପ୍ରତିକୃତ୍ତି ମଧ୍ୟ ଉପହାର ସ୍ବରୂପ ପ୍ରଦାନ କରିଥିଲେ । ତେବେ ଏଠାରେ ଉଲ୍ଲେଖଯୋଗ୍ୟ ଯେ, ଜାନୁଆରୀ 22 ରେ ମନ୍ଦିର ପ୍ରତିଷ୍ଠା ହେବା ସମୟରେ ମଧ୍ୟ ବିଭିନ୍ନ ଧର୍ମରୁ ବହୁ ବିଶିଷ୍ଟ ବ୍ୟକ୍ତିବିଶେଷ କାର୍ଯ୍ୟକ୍ରମକୁ ନିମନ୍ତ୍ରିତ ହୋଇଥିଲେ । ପ୍ରଭୁଙ୍କ ପ୍ରାଣପ୍ରତିଷ୍ଠା ନୀତି ସମ୍ପନ୍ନ ହେବା ପରେ ସେମାନେ ଗର୍ଭଗୃହରେ ମଧ୍ୟ ରାମଲାଲାଙ୍କ ଦର୍ଶନ କରିଥିଲେ ।