ସୁଯୋଗ ମିଳିଲେ କୋରେଇରେ ବିଜେଡି ପ୍ରାର୍ଥୀ ହୋଇ ଲଢିବି: ଅଭିନେତ୍ରୀ ଝିଲିକ - Jhilik Bhattacharya

Jhilik Bhattacharya: ଯାଜପୁର: କୋରାଇ ବିଧାନସଭା ଆସନ ପାଇଁ ବିଜେଡିରୁ ପ୍ରାର୍ଥୀ ହେବାକୁ ମନ ବଳାଇଲେ ଓଲିଉଡ ଅଭିନେତ୍ରୀ ଝିଲିକ ଭଟ୍ଟାଚାର୍ଯ୍ୟ । ମନ୍ତ୍ରୀ ତଥା ବିଧାୟକ ପ୍ରୀତି ରଞ୍ଜନ ଘଡାଇଙ୍କ ପତ୍ନୀ ଝିଲିକଙ୍କୁ ଏଥର କୋରେଇରୁ ପ୍ରାର୍ଥୀ କରିବାକୁ ଦାବି କରିଛନ୍ତି କୋରେଇ ବିଜେଡି କର୍ମୀ । ଶତାଧିକ ସମର୍ଥକ ମନ୍ତ୍ରୀ ପ୍ରୀତିରଞ୍ଜନ ଘଡାଇଙ୍କ ଯାଜପୁର ରୋଡ଼ ସ୍ଥିତ ବାସଭବନରେ ପହଞ୍ଚି ଝିଲିକଙ୍କୁ ପ୍ରାର୍ଥୀ ହେବାକୁ ଅନୁରୋଧ କରିଛନ୍ତି । କୋରେଇ ବାସୀଙ୍କ ସହଯୋଗ, ସମର୍ଥନ ଓ ଦାବିକୁ ପାଥେୟ କରି ଝିଲିକ ମଧ୍ୟ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଦଳୀୟ ଟିକେଟରେ ଲଢ଼ିବାକୁ ସୁଯୋଗ ଦେବାକୁ ଅନୁରୋଧ ଜଣାଇଛନ୍ତି । ଯାହାକୁ ନେଇ ତାଙ୍କ ବାସଭବନରେ କର୍ମୀ ସମର୍ଥକଙ୍କ ଭିଡ଼ ଜମାଇଥିବା ଦେଖିବାକୁ ମିଳିଛି ।

ସେପଟେ ପୂର୍ବରୁ ବିଜେଟି ଟିକେଟରେ କୋରେଇରୁ ଲଢି ବିଧାୟକ ହୋଇଥିବା ଆକାଶ ଦାସ ନାୟକ ନିକଟରେ ବିଜେପିରେ ସାମିଲ ହୋଇଥିଲେ । ଦଳ ତାଙ୍କୁ କୋରେଇରୁ ଟିକେଟ ପ୍ରଦାନ କରିଛି । ଗତ ନିର୍ବାଚନରେ ବିଜେଡି ନେତା ଥିବା ସମୟରେ ତାଙ୍କୁ ଦଳ କୋରେଇରୁ ଟିକେଟ ଦେଇନଥିଲା । ଏହାପରେ ସେ ନିଜ ଆତ୍ମସମ୍ମାନ ପାଇଁ ବିଜେପିରେ ମିଶିଥିବା କହିଥିଲେ । ଯଦି ବିଜେଡିରୁ ଝିଲିକ ଟିକେଟ ପାଇ ନିର୍ବାଚନ ଲଢନ୍ତି, ତେବେ ନିର୍ବାଚନୀ ମୈଦାନରେ ଦୁଇ ସିନେ ତାରକା ମୁହାଁମୁହିଁ ହେବେ ।  

ଇଟିଭି ଭାରତ, ଯାଜପୁର