ପତିବ୍ରତା ପତ୍ନୀ ରାଧା, ସ୍ବାମୀଙ୍କ ସୁସ୍ଥତା ପରେ ଶ୍ରୀକ୍ଷେତ୍ରକୁ ଦଣ୍ଡବତ ଯାତ୍ରା

Dandavat Yatra: ଯାଜପୁର: ରାସ୍ତାରେ ଦଣ୍ଡବତ କରି କରି ଜଗା ଦର୍ଶନରେ ବାହାରିଲେ ମହିଳା । ରାଧାଙ୍କ ସ୍ୱାମୀଙ୍କ ସୁସ୍ଥତା କାମନା କରି ମାନସିକ କରିଥିଲେ ଶାଶୁ । ଯାହା ପୂରଣ ହୋଇଥିବାରୁ ଭଗବାନଙ୍କୁ ଶାଶୁ ଦେଇଥିବା କଥା ରକ୍ଷା କରିଛନ୍ତି ରାଧା । କାରଣ ଏହାରି ଭିତରେ ଶାଶୁଙ୍କର ଦେହାନ୍ତ ହୋଇଛି । ତେଣୁ ପଞ୍ଚିକୋଟ ପଞ୍ଚାୟତ ଲକ୍ଷ୍ମୀନଗର ଗାଁରୁ ରାସ୍ତାରେ ଦଣ୍ଡବତ କରି ଜଗା ଦର୍ଶନରେ ବାହାରିଛନ୍ତି ରାଧା । ସୂଚନା ଅନୁସାରେ, କୋରେଇ ବ୍ଲକ ଲକ୍ଷ୍ମୀନଗର ଗାଁରେ ରାଧା ଜେନା ତାଙ୍କ ପରିବାର ସହ ବାସ କରନ୍ତି । ଗତ କିଛିଦିନ ତଳେ ରାଧାଙ୍କ ସ୍ୱାମୀ କୌଣସି ଏକ ରୋଗରେ ପୀଡିତ ହୋଇ ଜୀବନ ମରଣ ସହିତ ଲଢେଇ କରୁଥିଲେ । ତାଙ୍କ ସୁସ୍ଥତା କାମନା କରାଯାଇ ମାନସିକ ରଖାଯାଇଥିଲା ।

ଯେବେ ପୁଅ ଭଲ ହୋଇଯିବେ ରାସ୍ତାରେ ଚାଲିଚାଲି ଦଣ୍ଡବତ କରି ପୁରୀରେ ଶ୍ରୀ ଜଗନ୍ନାଥଙ୍କ ଦର୍ଶନ କରିବେ ବୋଲି ମାନସିକ କରିଥିଲେ ରାଧାଙ୍କ ଶାଶୁ । ଯାହାକୁ ପାଳନ କରିଛନ୍ତି ରାଧା । ତେବେ ମହାପ୍ରଭୁ ଜଗନ୍ନାଥଙ୍କ ଆଶୀର୍ବାଦରୁ ରାଧାଙ୍କ ସ୍ୱାମୀ ଏବେ ସୁସ୍ଥ ହୋଇଛନ୍ତି । ସେପଟେ ସ୍ୱାମୀ ଭଲ ହେବା ପରେ ଲକ୍ଷ୍ମୀନଗର ଗାଁରୁ ରାଧା ଜେନା ତାଙ୍କ ସ୍ୱାମୀଙ୍କୁ ଧରି ଦଣ୍ଡବତ କରି କରି ପୁରୀ ଅଭିମୁଖେ ବାହାରିଛନ୍ତି। ରାସ୍ତାରେ ସେମାନଙ୍କୁ ଦେଖି ଅନେକ ଲୋକ ଶୁଭେଚ୍ଛା ମଧ୍ୟ ଜଣାଇଛନ୍ତି । 

ଇଟିଭି ଭାରତ, ଯାଜପୁର