ଓଡିଶୀ ନୃତ୍ୟ ପୂର୍ବରୁ ସଙ୍ଗୀତ ସହ ପ୍ରେମ ଆବଶ୍ୟକ: ପଦ୍ମଶ୍ରୀ କୁମକୁମ ମହାନ୍ତି

23rd Barabati festival: କଟକ: ଆରମ୍ଭ ହେଲା ବାରବାଟୀ ଉତ୍ସବ 2024 । ଓଡ଼ିଶୀ ନୃତ୍ୟ ମଣ୍ଡଳ ଆନୁକୁଲ୍ୟରେ ଏବଂ ଭାରତ ସରକାରଙ୍କ ସଂସ୍କୃତି ମନ୍ତ୍ରାଳୟ ଏବଂ ଜିଲ୍ଲା ସଂସ୍କୃତି ବିଭାଗର ସହଯୋଗରେ ତୁଳସୀ ପୁର ସ୍ଥିତ ଶାରଳା ଭବନ ଠାରେ ତିନିଦିନ ବ୍ୟାପି ବାରବାଟି ନୃତ୍ୟ ଉତ୍ସବ ଆରମ୍ଭ ହୋଇଛି । ଆନ୍ତର୍ଜାତିକ ନୃତ୍ୟ ଶିଳ୍ପୀ ପଦ୍ମଶ୍ରୀ ଡକ୍ଟର କୁମକୁମ ମହାନ୍ତି ଆନୁଷ୍ଠାନିକ ଭାବରେ ପ୍ରଦୀପ ପ୍ରଜ୍ବଳନ କରି 23 ତମ ବାରବାଟୀ ଉତ୍ସବକୁ ଉଦ୍ଘାଟନ କରିଥିଲେ । 

ଇଂଜିନିୟର ପ୍ରଭାକର ସ୍ୱାଇଁ ଏହି କାର୍ଯ୍ୟକ୍ରମରେ ସଭାପତିତ୍ବ କରିଥିଲେ । ଓଡ଼ିଶୀ ନୃତ୍ୟ ମଣ୍ଡଳର ପ୍ରତିଷ୍ଠାତା ନୃତ୍ୟ ଗୁରୁ ଆଶିଷ ଦାସ ସଂଗଠନ ସମ୍ପର୍କରେ ସଂକ୍ଷିପ୍ତ ସୂଚନା ପ୍ରଦାନ କରିଥିଲେ । ନାଟ୍ୟକାର ସଂଜିତ୍ ପଟ୍ଟନାୟକ ଅତିଥିମାନଙ୍କ ପରିଚୟ ପ୍ରଦାନ କରିଥିବା ବେଳେ ସେକ କଲିମୁଲ୍ଲା ଧନ୍ୟବାଦ୍ ଦେଇଥିଲେ । 

ଏହି ଅବସରରେ ମୁଖ୍ୟବକ୍ତା କୁମ୍ କୁମ୍ ମହାନ୍ତି କହିଛନ୍ତି, "ଆଜି କାଲି ଓଡିଶୀ ଶିଖିବା ପାଇଁ ଛୋଟ ପିଲା ମାନଙ୍କୁ ଅବିଭାବକ ମାନେ ପ୍ରେରିତ କରୁଛନ୍ତି । ହେଲେ ଉପଯୁକ୍ତ ବୟସ ମଧ୍ୟ କିଛି ରହିଛି ଓଡିଶୀ ଶିଖିବା ପାଇଁ । ଏହାଛଡ଼ା ନୃତ୍ୟ ସହ ସଙ୍ଗୀତ ରହିବା ମଧ୍ୟ ଆବଶ୍ୟକ । ନହେଲେ ଏହାର ପୂର୍ଣ୍ଣତା ନାହିଁ । ଦକ୍ଷିଣ ଭାରତରେ ଏହା ବିଶେଷ ଭାବରେ ଦୃଷ୍ଟିଗୋଚର ହୁଏ । କିନ୍ତୁ ଓଡିଶାରେ ଯଦି ନୃତ୍ୟ ସହ ସଙ୍ଗୀତର ମିଶ୍ରଣ ହେବ ତେବେ ଓଡିଶୀର ଯେଉଁ ସ୍ତର ରହିଛି ତାହା ଆହୁରି ଆଗକୁ ଯିବ ।" 

ଇଟିଭି ଭାରତ, କଟକ