ହାଇଦ୍ରାବାଦ: ଲୋକଙ୍କୁ ସେଲିବ୍ରିଟି-ବେଟ୍ ବିଜ୍ଞାପନ ସ୍କାମରୁ ରକ୍ଷା କରିବା ପାଇଁ ମେଟା ଏହାର ମୁଖ ଚିହ୍ନିବା ଟେକ୍ନୋଲୋଜି (Facial Recognition Technology )କୁ ପୁଣି ଲାଗୁ କରିବାକୁ ଯାଉଛି । ତିନି ବର୍ଷ ପୂର୍ବେ ଗୋପନିୟତା ଏବଂ ନିୟାମକ ଚିନ୍ତାଧାରା ଉପରେ କମ୍ପାନୀ ଫେସବୁକରେ ମୁଖ ଚିହ୍ନିବା ସଫ୍ଟୱେର୍ ବନ୍ଦ କରିବାକୁ ନିଷ୍ପତ୍ତି ନେଇଥିଲା । ମାତ୍ର ଏବେ ଲୋକପ୍ରିୟ ବ୍ୟକ୍ତିବିଶେଷଙ୍କ ଫଟୋକୁ ବ୍ୟବହାର କରି ଠକେଇ କରାଯାଉଥିବା ଘଟଣା ବୃଦ୍ଧି ପାଇବା ପରେ ମେଟା ପୁଣି ଏହାକୁ ଲାଗୁ କରିବାକୁ ଯାଉଛି ।
ପ୍ରକାଶ ଥାଉକି ବର୍ତ୍ତମାନ ଠକେଇ କରୁଥିବା ଲୋକମାନଙ୍କୁ ଚିହ୍ନଟ କରିବା ଏବଂ ରୋକିବା ପାଇଁ ଏହା ଏକ ପରୀକ୍ଷଣ ରୂପେ ପୁନଃ ଲାଗୁ କରାଯାଉଛି । ଯେଉଁଠାରେ ଠକମାନେ ଲୋକମାନଙ୍କୁ ଠକିବା ପାଇଁ ସେଲିବ୍ରିଟିଙ୍କ ଫଟୋ ବ୍ୟବହାର କରନ୍ତି । ଏହାଦ୍ବାରା ସେମାନେ ସହଜରେ ଲୋକଙ୍କ ଭରସା ଜିତି ସେମାନଙ୍କୁ ନିଜ ଠକେଇ ଜାଲରେ ପକାନ୍ତି ।
Celeb-Bait Scam କଣ ?
ଏହି ଠକେଇ ସାଧାରଣତଃ ସେଲିବ୍-ବେଟ୍ ' ସ୍କାମ ଭାବରେ ଜଣାଶୁଣା । କଣ୍ଟେଣ୍ଟ କ୍ରିଏଟର କିମ୍ବା ସେଲିବ୍ରିଟିମାନଙ୍କ ଫଟୋକୁ ଦର୍ଶାଇ ଏକ ବୈଧ ବିଜ୍ଞାପନ ପରି ଦେଖାଯିବା ପାଇଁ ଡିଜାଇନ କରାଯାଇଛି | ଏହା ଲୋକଙ୍କୁ ସ୍କାମ ବିଜ୍ଞାପନ ଆଡକୁ ଆକୃଷ୍ଟ ହେବା ଲାଗି ପ୍ରଲୋଭିତ କରେ, ଯାହାକି ଲୋକଙ୍କୁ ସ୍କାମ ୱେବସାଇଟକୁ ନେଇଥାଏ । ଏହାପରେ ସେମାନଙ୍କୁ ବ୍ୟକ୍ତିଗତ ତଥ୍ୟ ଦେବା କିମ୍ବା ଟଙ୍କା ପଠାଇବାକୁ କୁହାଯାଏ ।
| ଏହା ବି ପଢନ୍ତୁ |
ସାବଧାନ ଛଦ୍ମବେଶୀ ଅପରାଧି, ଲୁଚିଲେବି ଧରା ପକାଇବ Face Recognition System |
ମୁଖ ଚିହ୍ନିବା ଟେକ୍ନୋଲୋଜିର ଉଦ୍ଦେଶ୍ୟ:-
ମୁଖ ଚିହ୍ନିବା ଟେକ୍ନୋଲୋଜି କେବଳ ଲୋକଙ୍କୁ ଏହିପରି ସ୍କାମରୁ ରକ୍ଷା କରିବା ପାଇଁ ଉଦ୍ଦିଷ୍ଟ ନୁହେଁ, ବରଂ ଛଦ୍ମନାମକୁ ଚିହ୍ନିବା ଏବଂ ଲୋକଙ୍କୁ ସେମାନଙ୍କ ନିଜ ଆକାଉଣ୍ଟକୁ ପୁନଃ ପ୍ରାପ୍ତ କରିବାରେ ସାହାଯ୍ୟ କରିବା ପାଇଁ ମଧ୍ୟ ବ୍ୟବହାର କରାଯାଏ ।
କେମିତି ସୁରକ୍ଷା ଯୋଗାଇବ ଏହି ଟେକ୍ନୋଲୋଜି ?
ଯଦି ମେଟା ସନ୍ଦେହ କରେ ଯେ ଏକ ବିଜ୍ଞାପନ ଠକ ଅଟେ ତେବେ ସିଷ୍ଟମ ବିଜ୍ଞାପନରେ ଥିବା ଚେହେରାଗୁଡ଼ିକୁ ଫେସବୁକ୍ ଏବଂ ଇନଷ୍ଟାଗ୍ରାମରେ ସେଲିବ୍ରିଟିଙ୍କ ପ୍ରୋଫାଇଲ୍ ଫଟୋ ସହିତ ତୁଳନା କରିବ । ଜାଲିଆତି ବିଜ୍ଞାପନଗୁଡିକୁ ସଙ୍ଗେ ସଙ୍ଗେ ମେଟା ବ୍ଲକ୍ କରିବ ଓ ଏଡିଟେଡ ଫଟୋକୁ ମଧ୍ୟ ହଟାଇ ଦେବ । ଏହି ସୁରକ୍ଷା ବିଷୟରେ ଅଧିକ ଜନସାଧାରଣଙ୍କୁ ସୂଚନା ଦେବାକୁ ମେଟା ଯୋଜନା କରିଛି ।
ଭିଡିଓ ସେଲ୍ଫି ଟେଷ୍ଟିଂ:-
ୟୁଜରମାନଙ୍କୁ ସେମାନଙ୍କ ଆକାଉଣ୍ଟକୁ ଶୀଘ୍ର ଆକ୍ସେସ୍ ଦେବା ପାଇଁ ମେଟା ଭିଡିଓ ସେଲଫି ବ୍ୟବହାର ମଧ୍ୟ ପରୀକ୍ଷା କରୁଛି । ଉପଭୋକ୍ତାମାନଙ୍କ ପାଇଁ ଏକ ସୁରକ୍ଷିତ ଅଭିଜ୍ଞତା ସୃଷ୍ଟି କରିବାକୁ ଏହାର ପ୍ଲାଟଫର୍ମରୁ ଠକେଇ ବିଷୟବସ୍ତୁକୁ ତୁରନ୍ତ ହଟାଇବା ଏହାର ଉଦ୍ଦେଶ୍ୟ ବୋଲି କମ୍ପାନୀ କହିଛି ।
କେମିତି ହୁଏ ଠକେଇ ?
ଫେସବୁକ୍ ଏବଂ ଇନଷ୍ଟାଗ୍ରାମରେ "ସେଲିବ୍-ବେଟ୍" ବିଜ୍ଞାପନ ସ୍କାମ ପ୍ରସଙ୍ଗକୁ ଆଲୋକିତ କରି କମ୍ପାନୀ କହିଛି ଯେ ସ୍କାମରମାନେ ପ୍ରାୟତଃ ଲୋକପ୍ରିୟ ବ୍ୟକ୍ତିବିଶେଷଙ୍କ ଫଟୋ ବ୍ୟବହାର କରି ବିଜ୍ଞାପନକୁ ଖୋଲିବାକୁ ଲୋକଙ୍କୁ ଭ୍ରମାନ୍ତି । ଠକେଇ ପାଇଁ ଉଦ୍ଦିଷ୍ଟ ଲିଙ୍କରେ କ୍ଲିକ୍ କରିବାକୁ ଉପଭୋକ୍ତାମାନଙ୍କୁ କୁହାଯାଏ ଏବଂ ସେଲିବ୍ରିଟିଙ୍କ ବିଶ୍ବାସ ଯୋଗୁଁ କିଛି ଲୋକ ଏହି ଘୋଟାଲାରେ ପଡ଼ିଯାନ୍ତି ।
