ଭୁବନେଶ୍ୱର: ପ୍ରତିଶୃତି ଦେଇ ଆଶାୟୀ ପ୍ରାର୍ଥୀଙ୍କୁ ଟିକଟ ଦେଲାନି କଂଗ୍ରେସ । କ୍ଷୋଭ ପ୍ରକାଶ କରି କଂଗ୍ରେସ ଭବନରେ ହୋ ହଲ୍ଲା କରିବା ସହ ତାଲା ପକାଇଲେ ଯୁବ କଂଗ୍ରେସ କର୍ମୀ । ଟିକଟ ନଦେବା ଯାଏଁ କଂଗ୍ରେସ ଭବନ ଆଗରେ ଧାରଣା ଜାରି ରଖିବେ ବୋଲି କହିଛନ୍ତି ଯୁବ କର୍ମୀ । ଯୁବ କଂଗ୍ରେସର ଅଭିଯୋଗ ମୁତାବକ, ଦଳରେ ବହୁ ଯୁବ ଆଶାୟୀ ଥିବାବେଳେ ଦଳ ଡିଆଁ ଲୋକଙ୍କୁ ଟିକଟ ଦିଆଯାଉଛି । ବିଶେଷ କରି କିଛି ଦିନ ତଳେ ଦଳରେ ସାମିଲ ହୋଇଥିବା ସୋନାଲି ସାହୁଙ୍କ ଟିକଟ ଘୋଷଣାକୁ ବିରୋଧ କରି ଏଭଳି ବିକ୍ଷୋଭ ପ୍ରଦର୍ଶନ କରିଛନ୍ତି ଯୁବ କଂଗ୍ରେସ କର୍ମୀ ।
ଏହା ମଧ୍ୟ ପଢନ୍ତୁ-ଟିକଟ ଦେଇ ଛଡାଇ ନେଲା କଂଗ୍ରେସ, ହାତ ଛାଡିଲେ ହକି ତାରକା - Prabodh Tirkey Quits Congress
ଚଳିତ ନିର୍ବାଚନରେ ଯୁବନେତାଙ୍କୁ ଟିକଟ ଦେବା ପାଇଁ ୨୦ ପ୍ରତିଶତ ଦାବି ହୋଇଥିଲା । ଯାହାକୁ ଦଳ ବିଚାରରେ ନନେଇ ପ୍ରାର୍ଥୀ ଘୋଷଣା କରିଥିବା ବେଳେ ଯୁବ କଂଗ୍ରେସ କର୍ମୀଙ୍କ ବିଦ୍ରୋହ ଓ ପ୍ରତିବାଦ ଦେଖିବାକୁ ମିଳିଛି । ଯୁବ କର୍ମୀମାନେ କଂଗ୍ରେସ ଭବନରେ ଅହୋରାତ୍ର ଧାରଣାରେ ବସିଛନ୍ତି । ପିସିସି ସଭାପତି ପୁନଃବିଚାର କରି ଟିକଟ ନଦେବା ଯାଏଁ ଓ କଂଗ୍ରେସ ଭବନକୁ ଆସି ଏହାର ସମାଧାନ ନକରିବା ଯାଏଁ ଧାରଣାରୁ ଉଠିବୁ ନାହିଁ ବୋଲି ଚେତାବନୀ ଦେଇଛନ୍ତି ଯୁବ କଂଗ୍ରେସ କର୍ମୀ । ଖୋର୍ଦ୍ଧା, ଭୁବନେଶ୍ୱର, ଉତ୍ତର ଭୁବନେଶ୍ୱର ଆସନ ପାଇଁ ଯୁବ କଂଗ୍ରେସର ଅନେକ ଟିକଟ ଆଶାୟୀ ଥିଲେ । ହେଲେ ବିଜେଡି, ବିଜେପି ସହ ସାଲିସ କରି କଂଗ୍ରେସ ଟିକଟ ଦେଇଛି ବୋଲି ଅଭିଯୋଗ କରିଛନ୍ତି କର୍ମୀ ।
ଯୁବ କଂଗ୍ରେସ କର୍ମୀ ସୁଦୀପ ସାମଲ କହିଛନ୍ତି, ''ଆମକୁ ପ୍ରତିଶୃତି ଦିଆଯାଇଥିଲା କି ଯୁବକମାନଙ୍କୁ ସେମାନଙ୍କ ଅଧିକାର ଦିଆଯିବ । 10ଟି ଟିକଟ ପାଇଁ ଆମେ କହିଥିଲୁ । କିନ୍ତୁ 10ଟି ଟିକଟର ଦଳ ଯୁବ ନେତାଙ୍କୁ ପ୍ରାର୍ଥୀ କଲାନି ଏବଂ ଶେଷ ମୁହୁର୍ତ୍ତରେ ଗୋଟିଏ ଟିକଟ ମାଗିଥିଲେ ମଧ୍ୟ ତାହା ବି ଦଳ ଦେଲା ନାହିଁ । ଯୁବ କଂଗ୍ରେସର ସାଧାରଣ ସମ୍ପାଦକଙ୍କ ପାଇଁ ଆମେ ଟିକଟ ଲବି କରିଥିଲୁ । କିନ୍ତୁ ତାଙ୍କୁ ଟିକେଟ ଦିଆନଯାଇ ଯିଏ ବିଜେଡି ବିଜେପିର ବିବାହକୁ ବିରୋଧ କରିଥିଲା ତାକୁ ଖୋର୍ଦ୍ଧାରୁ ଟିକଟ ଦିଆଯାଇଛି । ଆମକୁ ଦଳରେ ଉପେକ୍ଷିତ କରାଯାଇଛି । ପିସିସି ସଭାପତି ଏଠାକୁ ଆସି ସମାଧାନ କରନ୍ତୁ ।''
ଇଟିଭି ଭାରତ, ଭୁବନେଶ୍ୱର
