ଭୁବନେଶ୍ବର: ASOଙ୍କୁ ରାଜ୍ୟପାଳଙ୍କ ପୁଅ ମାଡ଼ ମାରିବା ଘଟଣାକୁ ନେଇ ପୁଣି ରାସ୍ତାକୁ ଓହ୍ଲାଇ ଗର୍ଜିଲା ଯୁବ କଂଗ୍ରେସ । ରାଜ୍ୟପାଳଙ୍କ ପୁଅକୁ ଗିରଫ ଓ ASOଙ୍କୁ ନ୍ୟାୟ ଦାବି କରି ଗତକାଲି ଦିଲ୍ଲୀ ସ୍ଥିତ ଜନ୍ତରମନ୍ତରରେ ଧାରଣା ଦେଇଥିଲା ଓଡ଼ିଶା ପ୍ରଦେଶ ଯୁବ କଂଗ୍ରେସ। ଯୁବ କଂଗ୍ରେସ ପୂର୍ବତନ ସଭାପତି ରଞ୍ଜିତ ପାତ୍ର ଏବଂ ଛାତ୍ର କଂଗ୍ରେସର ପୂର୍ବତନ ସଭାପତି ୟାସିର ନୱାଜ ଆନ୍ଦୋଳନକୁ ଓହ୍ଲାଇଥିଲେ । ଏଥିସହ ଶତାଧିକ ଯୁବ କଂଗ୍ରେସ ନେତା ଦିଲ୍ଲୀରେ ଏକାଠି ହୋଇ ଧାରଣା ଦେଇଥିଲେ । ପୁରୀରେ ASOଙ୍କୁ ରାଜ୍ୟପାଳଙ୍କ ପୁଅ ମାଡ଼ ମାରିଲେ ହେଲେ ଏପର୍ଯ୍ୟନ୍ତ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କଲା ନାହିଁ ପୋଲିସ । ରାଜ୍ୟ ସରକାର ଓଡ଼ିଆ ଅସ୍ମିତା କଥା କହି ସରକାରକୁ ଆସିଲେ ହେଲେ ଓଡ଼ିଆ ଅସ୍ମିତା କଥା ଭୁଲିଗଲେ । ରାଜ୍ୟପାଳଙ୍କ ପୁଅ ବୋଲି ଆଇନ କ'ଣ ଅଲଗା ବୋଲି ପ୍ରଶ୍ନ କରିଛି କଂଗ୍ରେସ ।
କାହିଁକି ରାଜ୍ୟପାଳଙ୍କ ପୁଅଙ୍କୁ ଗିରଫ କରାଯାଉନାହିଁ ?
ଯୁବ କଂଗ୍ରେସ ନେତା ରଞ୍ଜିତ ପାତ୍ର କହିଛନ୍ତି, ''ASOଙ୍କୁ ରାଜ୍ୟପାଳଙ୍କ ପୁଅ ମାଡ଼ ମାରିବା ଘଟଣା 3 ମାସରୁ ଊର୍ଦ୍ଧ୍ବ ସମୟ ହୋଇଗଲାଣି । କିନ୍ତୁ ରାଜ୍ୟପାଳଙ୍କ ପୁଅକୁ ଗିରଫ କରାଯାଉନାହିଁ । କାହା ଚାପରେ ତାଙ୍କୁ ଗିରଫ କରାଯାଉନାହିଁ ? ତଦନ୍ତ ରିପୋର୍ଟ କୁଆଡେ ଗଲା ? ତା ପ୍ରତିବାଦରେ ଦିଲ୍ଲୀରେ ଧାରଣା ଦିଆଯାଇଛି । ଯେପର୍ଯ୍ୟନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇନାହିଁ, ସେ ପର୍ଯ୍ୟନ୍ତ ଆନ୍ଦୋଳନ ତୀବ୍ରତର ହେବ । ଦିଲ୍ଲୀ ଓ ଓଡ଼ିଶାରେ ଏହି ଆନ୍ଦୋଳନ ଜାରି ରହିବ ।''
କଣ ଥିଲା ଘଟଣା?
ସୂଚନା ଥାଉକି ଗୁଣ୍ଡିଚା ଯାତ୍ରା ସମୟରେ ପୁରୀ ରାଜଭବନରେ ରାଜ୍ୟପାଳଙ୍କ ପୁଅ ରାଜ୍ୟପାଳଙ୍କ ସୁରକ୍ଷା ଦାୟିତ୍ୱରେ ଥିବା ଜଣେ ASOଙ୍କୁ ମାଡ଼ ମାରିଥିଲେ । ଏ ଖବର ପ୍ରସାରିତ ହେବା ପରେ ଏଏସଓଙ୍କୁ ଅନ୍ୟତ୍ର ବଦଳି କରାଗଲା । କିନ୍ତୁ ବର୍ତ୍ତମାନ ସୁଦ୍ଧା ରାଜ୍ୟପାଳଙ୍କ ପୁଅ ବିରୋଧରେ କୌଣସି କାର୍ଯ୍ୟାନୁଷ୍ଠାନ ନିଆଯାଇନାହିଁ । ବିଧାନସଭାରେ ବିରୋଧୀ ଦଳ ନେତା ବଜେଟ ଅଧିବେଶନର ପ୍ରଥମ ଦିବସରେ ରାଜ୍ୟପାଳଙ୍କ ଅଭିଭାଷଣ ସମୟରେ ରାଜ୍ୟପାଳଙ୍କ ପୁଅ ଏଏସଓକୁ ମାଡ଼ ମାରିବା ଘଟଣା କଥା ଉଠାଇଲେ । ଏହାର ଉତ୍ତରରେ ଆଇନମନ୍ତ୍ରୀ ଉତ୍ତର ରଖି କହିଥିଲେ, ପୁରୀ ଜିଲ୍ଲାପାଳଙ୍କୁ ତଦନ୍ତ ଦାୟିତ୍ବ ଦିଆଯାଇଛି,15 ଦିନ ଭିତରେ ରିପୋର୍ଟ ଦେବାକୁ ନିର୍ଦ୍ଦେଶ ଦେଇଥିଲେ । ଘଟଣାକୁ 3 ମାସରୁ ଊର୍ଦ୍ଧ୍ବ ସମୟ ବିତିଯାଇଥିଲେ ବି ଏପର୍ଯ୍ୟନ୍ତ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇନାହିଁ ।
ଇଟିଭି ଭାରତ, ଭୁବନେଶ୍ବର
