ଖୋର୍ଦ୍ଧା: ମକର ମହୋତ୍ସବର ଦେଖି ଫେରିବା ବାଟରେ ଚାଲିଗଲା ଜୀବନ । ଏଭଳି ଏକ ହୃଦୟ ବିଦାରକ ଦୁର୍ଘଟଣା ଘଟିଛି ବାଘମାରି ଥାନା ଅନ୍ତର୍ଗତ ବାଘମାରି ଏବଂ ଅଟ୍ରି ମଧ୍ୟରେ ଥିବା ହଂସ ପୋଖରୀ ନିକଟରେ । ଦୁଇ ଜଣ ଯୁବକ ଅଟ୍ରି ମକର ମହୋତ୍ସବର ଦେଖି ନିଜ ଗାଁ ପଡାଡିହ ଅଭିମୁଖେ ଚାଲି ଚାଲି ଫେରୁଥିବାବେଳେ ଧକ୍କା ଦେଲା କାର । ମୃତକ ଦୁଇ ଜଣ ହେଲେ ସୁନୀଲ କୁମାର ମାଣିକ ଓ ମିଲୁ ମହାପାତ୍ର ।
ସୂଚନା ଅନୁଯାୟୀ ବାଘମାରି ଅଟ୍ରି ମକର ମହୋତ୍ସବର ଶନିବାର ଥିଲା ଷଷ୍ଠ ସନ୍ଧ୍ୟା ଆଉ ରାତି ପ୍ରାୟ ସାଢ଼େ ଦଶଟା ସମୟରେ ମହୋତ୍ସବ ଦେଖି ନିଜ ଗ୍ରାମକୁ ଫେରୁଥିଲେ ସୁନୀଲ ଓ ତାଙ୍କ ସାଙ୍ଗ ମିଲୁ । ତବେ ହଂସ ପୋଖରୀ ନିକଟରେ ବାଘମାରି ପଟୁ ଦ୍ରୁତ ଗତିରେ ଆସୁଥିବା ଏକ କାର ସୁନୀଲଙ୍କୁ ଧକା ଦେଇ ରାସ୍ତା କଡରେ ଥିବା ପାଣି ଟାଙ୍କି ଓ ବିଦ୍ୟୁତ ଖୁଣ୍ଟିରେ ମାଡ଼ ହୋଇଥିଲା । ଏଥିରେ ସୁନୀଲ ଗୁରୁତର, ମିଲୁ ସାମାନ୍ୟ ଆହତ ହୋଇଥିବାବେଳେ କାରରେ ଥିବା କଣ୍ଟମଳିମ ଗ୍ରାମର ଗୁଡୁ ନାୟକ ଓ ସଲତରା ଗ୍ରାମର ଅଜିତ ତ୍ରିପାଠୀ ଗୁରୁତର ଆହତ ହୋଇଥିଲେ ।
ତେବେ ଦୁର୍ଘଟଣା ସମ୍ପର୍କରେ ସ୍ଥାନୀୟ ଲୋକେ ବାଘମାରି ଥାନା ଅଧିକାରୀ ଶମ୍ଭୁନାଥ ନାୟକଙ୍କୁ ଖବର ଦେଇଥିଲେ । ଖବର ପାଇ ପୋଲିସ ଘଟଣା ସ୍ଥଳରେ ପହିଞ୍ଚିଥିଲେ । ସ୍ଥାନୀୟ ଲୋକଙ୍କ ସହଯୋଗରେ ବାଘମାରି ପୋଲିସ ସମସ୍ତଙ୍କୁ ଖୋର୍ଦ୍ଧା ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଥିଲେ । ହେଲେ ସେଠାରେ ଡାକ୍ତର ସୁନୀଲକୁ ଘୋଷଣା କରିଥିଲେ । ଅନ୍ୟପଟେ ଗୁଡୁ ଚିକିତ୍ସାଧିନ ଥିବାବେଳେ ଅନ୍ୟ ଦୁଇଜଣ ଘରକୁ ଫେରିଛନ୍ତି । ସେପଟେ ଦୁର୍ଘଟଣା ଘଟାଇଥିବା କାରକୁ ଜବତ କରିବା ସହ ଚାଳକ ସିମୋର ଗ୍ରାମର ଶ୍ରୀଧର ମହାନ୍ତି ଓରଫ ଆଲୋକକୁ ଥାନାରେ ଅଟକ ରଖିଛି ପୋଲିସ ।
ଏହା ମଧ୍ୟ ପଢନ୍ତୁ .....ଅଜଣା ଟ୍ରକ ନେଲା ତିନି ବାଇକ ଆରୋହୀଙ୍କ ଜୀବନ
ତେବେ ଜବତ କାରରେ ଖାଦ୍ୟ ପ୍ୟାକେଟ ଥିବା ଦେଖିବାକୁ ମିଳିଛି । ମକର ମହୋତ୍ସବରେ ଶ୍ରୀଧରଙ୍କୁ ବିଧାୟକ ବିଭିନ୍ନ ଦାୟିତ୍ୱ ଦେଇଥିବା ବେଳେ ଶନିବାର ରାତିରେ ବାଘମାରି ଢାବାରୁ ଖାଦ୍ୟ ଆଣି କାରରେ ଦୃତ ଗତିରେ ଆସୁଥିବା ବେଳେ ଦୁର୍ଘଟଣା ଘଟିଥିଲା । ଏଠାରେ ସୂଚନା ଯୋଗ୍ୟ ଦୁର୍ଘଟଣା ଘଟାଇ ବାଘମାରି ଥାନାରେ ଅଟକ ଥିବା ଶ୍ରୀଧର ଖୋର୍ଦ୍ଧା ଜିଲ୍ଲା ଛାତ୍ର ବିଜେଡି ସମ୍ପାଦକ ବୋଲି ଜଣାପଡିଛି । ସେପଟେ ବେପରୁଆ ଗାଡି ଚାଳନା ପାଇଁ ସୁନୀଲର ଜୀବନ ଚାଲିଯାଇଥିବା ନେଇ ତାଙ୍କ ମାଆ ବନଲତା ମାଣିକ ଥାନାରେ ଅଭିଯୋଗ କରିଛନ୍ତି ।
ତେବେ ଆଜି (ରବିବାର) ସୁନୀଲଙ୍କର ବ୍ୟବଚ୍ଛେଦ କରାଯିବା ପରେ ଗାଁ ସ୍ମଶାନରେ ଶୋକାକୁଳ ପରିବେଶରେ ଅନ୍ତିମ ସତ୍କାର କରାଯାଇଛି । ମକର ସଂକ୍ରାନ୍ତିଠାରୁ ପାଞ୍ଚ ଦିନ ପାଇଁ ମହୋତ୍ସବ କରିବାକୁ ଅନୁମତି ପ୍ରଦାନ କରିଥିବା ବେଳେ ବିଧାୟକ ଆଉ ଦୁଇଦିନ ଶନିବାର ଓ ରବିବାର ପାଇଁ ପ୍ରଶାସନଠାରୁ ଅନୁମତି ଆଣିଥିବା ଜଣାପଡ଼ିଛି ।
ଇଟିଭି ଭାରତ, ଖୋର୍ଦ୍ଧା
