ଭବାନୀପାଟଣା/ଅନୁଗୋଳ: ଗାଁକୁ ରାସ୍ତା ନଥିବାରୁ ଆସି ପାରିଲାନି ଆମ୍ବୁଲାନ୍ସ । ଫଳରେ ଖଟିଆରେ ବୋହି ରୋଗୀଙ୍କୁ ସ୍ବାସ୍ଥ୍ୟକେନ୍ଦ୍ର ଆଣିଲେ ସମ୍ପର୍କୀୟ । ଏପଟେ ଆମ୍ବୁଲାନ୍ସ ନ ଆସିପାରିବାରୁ ଖଟିଆରେ ବୁହା ହୋଇ ଯୁବତୀଙ୍କୁ ନେବା ବେଳେ ଅଧାବାଟରେ ପ୍ରାଣ ହରାଇଛନ୍ତି ଯୁବତୀ । ଏଣେ ଆମ୍ବୁଲାନ୍ସ ନ ଆସିବାରୁ ଟ୍ରଲିରେ ବୁହାହେଲା ଅସୁସ୍ଥ ନାବାଳକ ।
ଆସିଲାନି ଆମ୍ବୁଲାନ୍ସ, ଚାଲିଗଲା ପ୍ରାଣ:
ଭବାନୀପାଟଣା ସଦର ବ୍ଲକ ଯୁଗସାଏପାଟଣା ମାଣ୍ଡିଆବିରି ଗାଁରେ ଏକ ଅଭାବନୀୟ ଘଟଣା ଘଟିଛି । ଗାଁର ଚନ୍ଦ୍ରିକା ଦଳପତି ନାମକ ଜଣେ ଯୁବତୀ ଅସୁସ୍ଥ ହୋଇପଡିଥିଲେ । ପରିବାର ଲୋକେ ୧୦୮ ଆମ୍ବୁଲାନ୍ସକୁ ଜଣାଇଥିଲେ । ଖବର ପାଇ ଆମ୍ବୁଲାନ୍ସ ଗାଁକୁ ଯିବା ପାଇଁ ବାହାରିଥିଲା । ହେଲେ ଗାଁକୁ ରାସ୍ତା ନ ଥିବାରୁ ଆମ୍ବୁଲାନ୍ସଟି ଆସି ନ ପାରି ୫ କି.ମି ଦୂରରେ ଅଟକି ରହିଥିଲା । ଫଳରେ ପରିବାର ଲୋକେ ବାଧ୍ୟ ହୋଇ ଏକ ଖଟିଆରେ ଯୁବତୀଙ୍କୁ ଧରି ଆମ୍ବୁଲାନ୍ସ ପାଖକୁ ଆସୁଥିଲେ । ହେଲେ ଆମ୍ବୁଲାନ୍ସ ପାଖକୁ ଆଣିବା ପୂର୍ବରୁ ଅଧା ରାସ୍ତାରେ ଯୁବତୀଙ୍କ ମୃତ୍ୟୁ ଘଟିଥିବା ଜଣାପଡିଛି । ପରିବାର ଲୋକେ ମୃତଦେହ ଧରି ଅଧାବାଟରୁ ଘରକୁ ଫେରିଯାଇଥିବା ଜଣାପଡିଛି । ଏହି ଘଟଣା ଏବେ ଅଞ୍ଚଳରେ ଚର୍ଚ୍ଚାର ବିଷୟ ହୋଇଛି । ଉଭୟ ଘଟଣାକୁ ନେଇ ଜିଲ୍ଲା ପ୍ରଶାସନର କୌଣସି ପ୍ରତିକ୍ରିୟା ମିଳି ପାରିନାହିଁ ।
ଖଟିଆରେ ବୁହା ହେଲେ ଅସୁସ୍ଥ ମହିଳା:
ସେହିପରି କଳାହାଣ୍ଡି ଜିଲ୍ଲା ମଦନପୁର ରାମପୁର ବ୍ଲକ ଅନ୍ତର୍ଗତ ଲୁବେନଗଡ ପଞ୍ଚାୟତର ପୁଇଝୁରୀ ଗାଁ ଜରଲୀ ମାଝୀ ନାମକ ମହିଳାଙ୍କୁ ଜ୍ୱର ହୋଇଥିଲା । ଗୁରୁତର ଅସୁସ୍ଥ ହେବାରୁ ପରିବାର ଲୋକ ଆମ୍ବୁଲାନ୍ସକୁ ଫୋନ କରିଥିଲେ । ହେଲେ ଗାଁକୁ ଭଲ ରାସ୍ତା ନଥିବାରୁ ଆମ୍ବୁଲାନ୍ସ ଆସିବା ସମ୍ଭବପର ହୋଇନଥିଲା । ତେଣୁ ବାଧ୍ୟ ହୋଇ ଗାଁର କିଛି ଲୋକ ଖଟିଆରେ ରୋଗୀକୁ ନିକଟସ୍ଥ ଉର୍ଲାଦାନୀ ସ୍ବାସ୍ଥ୍ୟକେନ୍ଦ୍ରକୁ ଚିକିତ୍ସା ପାଇଁ ନେଇଥିଲେ । ତେଣୁ ଭଲ ରାସ୍ତା ଖଣ୍ଡେ ପାଇଁ ଅଞ୍ଚଳବାସୀ ଦାବି କରିଛନ୍ତି ।
ଟ୍ରଲିରେ ବୁହା ହେଲେ ରୋଗୀ:
ସେପଟେ ଅନୁଗୋଳ ଜିଲ୍ଲା ମୁଖ୍ୟ ଚିକିତ୍ସାଳୟରେ ଦେଖିବାକୁ ମିଳିଛି ଏକ ଅଭାବନୀୟ ଦୃଶ୍ୟ । ଏକ ଟ୍ରଲିରେ ବୁହା ହୋଇ ରୋଗୀ ଆସିଥିବା ଦେଖିବାକୁ ମିଳିଥିଲା । ସୂଚନା ଯେ, ବନାରସ୍ ଅଞ୍ଚଳର ଜଗଦୀଶ କୁମାରଙ୍କ ପୁଅ ବୀର୍ କୁମାର (୧୨)ଙ୍କ ଦେହ ଅସୁସ୍ଥ ହୋଇଯାଇଥିଲେ । ପରିବାର ବୀରର ଦେହ ଖରାପ ହେବା ଦେଖି ପରିବାର ଲୋକ ଆମ୍ବୁଲାନ୍ସକୁ ଫୋନ କରିଥିଲେ । କିନ୍ତୁ ଆମ୍ବୁଲାନ୍ସ ଆସିବାରେ ବିଳମ୍ବ ହେବାରୁ ବାଧ୍ୟ ହୋଇ ପରିବାର ଲୋକେ ଏକ ଟ୍ରଲି ଯୋଗେ ଜିଲ୍ଲା ମୁଖ୍ୟ ଚିକିତ୍ସାଳୟ ଆଣିଥିଲେ । ଟ୍ରଲିରେ ରୋଗୀ ବୁହା ଭଳି ସମ୍ବେଦନଶୀଳ ଘଟଣା ବୁଦ୍ଧିଜୀବୀ ମହଲରେ ଚର୍ଚ୍ଚାର ବିଷୟ ହୋଇଛି । ସେପଟେ ଘଟଣାରେ ପ୍ରଶାସନ ପକ୍ଷରୁ ପ୍ରତିକ୍ରିୟା ମିଳିପାରିନାହିଁ ।
ଇଟିଭି ଭାରତ, କଳାହାଣ୍ଡି/ ଅନୁଗୋଳ
