ଭୁବନେଶ୍ବର: ଚେନ ଝାମ୍ପିବାର ନିଶା ହଜାଇ ଦେଲା ହିତାହିତ ଜ୍ଞାନ । ମନ୍ଦିର ଯାଉଥିବା ମହିଳାଙ୍କ ଚେନ ଝାମ୍ପିବା ସମୟରେ ନେଇଥିଲା ଜୀବନ । ଝାଡଖଣ୍ଡରୁ ଆସି ଭୁବନେଶ୍ବର ଏପରି ଛାତିଥରା ଘଟଣା ଘଟାଇଥିବା ହତ୍ୟାକାରୀ ଶେଷରେ ପୋଲିସ ହାବୁଡରେ ଧରାପଡ଼ିଛି । ଆଜି ଅଭିଯୁକ୍ତକୁ ଝାରଖଣ୍ଡରୁ ଗିରଫ କରିଛି କମିଶନରେଟ୍ ପୋଲିସ । ଏୟାରଫିଲ୍ଡ ଥାନା ଜଟଣୀ ରାସ୍ତା ସୋମନାଥ ମନ୍ଦିର ପାଖ ରାସ୍ତାରେ ଗତ ୧୧ ତାରିଖ ଛିନତାଇରୁ ହତ୍ୟା ଘଟଣାର ପର୍ଦ୍ଦାଫାସ କରିଛି ପୋଲିସ ।
ମୁଖ୍ୟ ଅଭିଯୁକ୍ତ ଗିରଫ:
ଗତ ନଭେମ୍ବର ୧୧ ତାରିଖ ଏୟାରଫିଲଡ ଥାନା ଅଞ୍ଚଳରେ ଦମ୍ପତି ସୋମନାଥ ମନ୍ଦିର ଦର୍ଶନ ପାଇଁ ଯାଉଥିଲେ । ହଠାତ ଏକ ବାଇକରେ ୨ ଜଣ ଦୁର୍ବୃତ୍ତ ଆସି ମହିଳାଙ୍କ ସୁନା ଚେନ ଝାମ୍ପିବା ପାଇଁ ଉଦ୍ୟମ କରିଥିଲେ । ହେଲେ ଲୁଟେରାମାନେ ପ୍ରଥମ ଚେଷ୍ଟାରେ ଅସଫଳ ହୋଇଥିଲେ । ପୁଣି ଲୁଟେରାମାନେ ରକ୍ତମୁଖା ହୋଇ ସେହି ମହିଳାଙ୍କୁ ଆକ୍ରମଣ କରିଥିଲେ ଯାହାଫଳରେ ସେ ଚଳନ୍ତା ବାଇକରୁ ଖସି ପଡ଼ି ପ୍ରାଣ ହରାଇଥିଲେ । ଯାହାକୁ ନେଇ ପୋଲିସ ଏକ ହତ୍ୟା ମାମଲା ରୁଜୁ କରି ତଦନ୍ତ ଜାରି ରଖିଥିଲା । ଅଭିଯୁକ୍ତକୁ ଧରିବା ପାଇଁ ଭୁବନେଶ୍ୱର ଠାରୁ ଆରମ୍ଭ କରି ଝାଡ଼ଖଣ୍ଡ ପର୍ଯ୍ୟନ୍ତ ପ୍ରାୟ ୪ ଶହରୁ ଅଧିକ ସିସିଟିଭି ଫୁଟେଜ ଓ ୭୬ଟି ସ୍ଥାନରେ ରେଡ କରିଥିଲା ପୋଲିସ । ଆଜି ମୁଖ୍ୟ ଅଭିଯୁକ୍ତ ରାଜୁ ନାଇଡୁକୁ ପୋଲିସ ଗିରଫ କରିଛି । ଝାଡ଼ଖଣ୍ଡ ପୂର୍ବ ସିଂହଭୂମି ବର୍ମା ମାଇନ୍ସ ଥାନା ଅଞ୍ଚଳର ଗାରେଜ କଲୋନିରୁ ଅଭିଯୁକ୍ତକୁ ଗିରଫ କରାଯାଇଛି । ଏହି ଅଭିଯୁକ୍ତ ଅନ୍ୟତମ ସହଯୋଗୀ ଏବେ ଫେରାର ଥିବା ବେଳେ ତାକୁ ଧରିବା ପାଇଁ ଛାନଭିନ ଚଳାଇଛି ପୋଲିସ ।
ଝାରଖଣ୍ଡରେ ୪ ଦିନ ରେଡ କରିଥିଲା ପୋଲିସ:
ଏନେଇ ଭୁବନେଶ୍ୱର ଡିସିପି କହିଛନ୍ତି, "ଗତ ୧୧ ତାରିଖରେ ଅଭୁଯୁକ୍ତମାନେ ଚେନ ଛିନତାଇ ବେଳେ ଜଣେ ମହିଳା ବାଇକରୁ ତଳେ ଖସିପଡିଥିଲେ । ସେହି ଘଟଣାକୁ ଅତି ଗୁରୁତର ସହ ନେଇଥିଲା ପୋଲିସ । ୧୩ ତାରିଖରେ ମହିଳାଙ୍କର ମୃତ୍ୟୁ ପରେ କମିସନରେଟ ପୋଲିସର ୬ଟି ଟିମ୍ ଗଠନ କରିଥିଲା । ପ୍ରଥମେ ଏ ଘଟଣାର କୌଣସି ସୁରାକ ମିଳିନଥିଲା । ୭୬ ଜଣ ଅପରାଧିଙ୍କ ତାଲିକା ବାହାର କରାଯାଇଥିଲା । ଆଖପାଖ ଜେଲ ନିମାପଡା, ଝାରପଡ଼ା, ଖୋର୍ଦ୍ଧା, କଟକ ଆଦି ଜେଲରୁ ଅପରାଧିଙ୍କ ତଥ୍ୟ ସଂଗ୍ରହ କରାଯାଇଥିଲା । ଅପରାଧି ବ୍ୟବହାର କରିଥିବା ଗାଡିକୁ ଆଧାରକରି ୪୦୦ରୁ ଅଧିକ ସିସିଟିଭି ଫୁଟେଜ ସହ ଭୁବନେଶ୍ୱରରୁ ଝାଡ଼ଖଣ୍ଡରେ ପହଞ୍ଚିଥିଲୁ । ସେଠାରେ ମଧ୍ୟ ୧୦ଟି ଜାଗାରେ ୪ ଦିନ ଧରି କମିସନରେଟ ପୋଲିସ ରେଡ କରିଥିଲା । ମୁଖ୍ୟ ଅଭିଯୁକ୍ତକୁ ଚିହ୍ନଟ କରି ଗିରଫ କରିଛୁ ।"
ଏସବୁ ଜିନିଷ ଜବତ:
ସେପଟେ ଗିରଫ ପରେ ସେମାନଙ୍କ ଠାରୁ ଲୁଟ ହୋଇଥିବା ମହିଳାଙ୍କ ସୁନା ଚେନ ଜବତ କରାଯାଇଛି । ଏଥିସହ ସେମାନେ ବ୍ୟବହାର କରୁଥିବା ଗାଡ଼ିକୁ ମଧ୍ୟ ଠାବ କରାଯାଇଛି । ଏପରିକି ଛିନତାଇ ସମୟରେ ଅପରଧି ପିଧାଥାବା ପୋଷାକ ମଧ୍ୟ ଜବତ କରାଯାଇଛି । ସେମାନେ ଭୁବନେଶ୍ୱର ରହୁଥିବା ଭଡାଘର ଚାବି ଠାବ କରିଛି ପୋଲିସ । ଏଥି ସହ କିଛି କାଗଜପତ୍ର ମଧ୍ୟ ଜବତ ହୋଇଛି । ଅଭିଯୁକ୍ତ ଜଣେ ଲିଫ୍ଟ ମେକାନିକ । ଝାରଖଣ୍ଡରୁ ଆସି ଅନ୍ୟତମ ସହଯୋଗୀ ସହ ଭୁବନେଶ୍ୱରରେ ରହୁଥିଲା । ତେବେ ଏପରି ଛିନତାଇ ସମୟରେ ଜଣେ ମହିଳାଙ୍କ ବେକରୁ ସୁନା ଚେନ ଝାମ୍ପିବା ବେଳେ ସେହି ମହିଳାଙ୍କର ମୃତ୍ୟୁ ହୋଇଥିଲା
ସୁନ୍ଦରପଦାରୁ ଜଟଣୀ ରାସ୍ତାରେ ଘଟିଥିଲା ଘଟଣା । ମହିଳା ଜଣଙ୍କ ନିଜ ସ୍ବାମୀଙ୍କ ସହ ମନ୍ଦିର ଯିବା ସମୟରେ ଏପରି ଲୁଟେରାଙ୍କ ଶିକାର ହୋଇଥିଲେ । ପରେ ମହିଳାଙ୍କ ଜୀବନ ଯିବା ପରେ ପୋଲିସ ଏହି ଘଟଣାର ତନାଘନା ବେଳେ ଘଟଣାସ୍ଥଳରୁ କୌଣସି ସୁରାକ ମିଳନଥିଲା । ଏହି ଘଟଣାର ସିସିଟିଭି ଫୁଟେଜ ପୋଲିସ ସଂଗ୍ରହ କରିଥିଲା । ଅପରାଧୀମାନେ ଲୁଟ ପରେ ପ୍ରଥମେ ଜଟଣୀରୁ ପିପିଲି ଯାଇଥିଲେ । ପରେ ପିପିଲିରୁ ନିମାପଡା, ନିମାପଡ଼ାରୁ ଭୁବନେଶ୍ୱର ଲିଙ୍ଗିପୁରରୁ ସେଠାରୁ ପୁଣି ପିପିଲି ଦେଇ ଜଟଣୀ ଯାଇ ଭୁବନେଶ୍ୱର ଫେରିଥିବା ସିସିଟିଭି ଫୁଟେଜରୁ ମିଳିଥିଲା । ପୋଲିସ ଯେପରି ସେମାନଙ୍କୁ ସନ୍ଦେହ ନ କରିବ ସେନେଇ ପୋଲିସକୁ ଭୂଆଁ ବୁଲାଇବାକୁ ୨ ଥର ଚକ୍କର କାଟି ବୁଲିଥିଲେ ଅଭିଯୁକ୍ତ । ତେବେ ସେମାନଙ୍କର ଗତିବିଧି ପରେ ସେମାନେ ସେହିଦିନ ବାଇକ ଯୋଗେ ଭୁବନେଶ୍ୱରରୁ ଝାଡଖଣ୍ଡ ପଳାଇଥିଲେ ।
ତଡିପାର ଅପରାଧିଙ୍କ ଭୁବନେଶ୍ୱରରେ କ୍ରାଇମ୍:
ଏହି ଘଟଣାରେ ଗିରଫ ହୋଇଥିବା ମୁଖ୍ୟ ଅଭିଯୁକ୍ତ ରାଜୁ ନାଇଡୁ ବାଇକ ପଛରେ ବସି ଚେନ ଝାମ୍ପିଥିଲା । ଗାଡ଼ି ଚଲାଉଥିବା ଅନ୍ୟତମ ଅଭିଯୁକ୍ତ ଫେରାର ଥିବା ବେଳେ ସେ ଜଣେ ଦୁର୍ଦାନ୍ତ ଅପରାଧି ବୋଲି ଜଣାପଡ଼ିଛି । ପୂର୍ବରୁ ତା ନାଁରେ ଝାଡ଼ଖଣ୍ଡରୁ ଏକ ତଡିପାର ଘୋଷଣା ହୋଇଛି । ସେଠାରୁ ତଡିପାର ପରେ ସେ ଭୁବନେଶ୍ବର ଆସି ସାମନ୍ତରାପୁରରେ ଭଡ଼ାରେ ରହୁଥିଲା । ତା ପାଖରେ କିଛି ଦିନ ହେବ ରାଜୁ ନାଇଡୁ ଆସି ରହୁଥିଲା । ତେବେ ରାଜୁ ନାଁରେ ପୁର୍ବରୁ ଝାଡଖଣ୍ଡ ଏକ ଥାନାରେ 122/2022 କେସ ଆଧାରରେ ୩୦୭ ଭଳି ଆର୍ମି ଆକ୍ଟରେ ହତ୍ୟା ଉଦ୍ୟମ ଭଳି କେସ ରହିଛି । ଅର୍ଥାତ୍ ଝାଡଖଣ୍ଡରୁ ଅପରାଧି ଆସି ଭୁବନେଶ୍ବରରେ କ୍ରାଇମ କରିବା କମିଶନରେଟ ପୋଲିସକୁ ଏକ ପ୍ରକାର ଖୋଲା ଚାଲେଞ୍ଜ ଦେଉଛନ୍ତି ।
ଏହା ମଧ୍ୟ ପଢ଼ନ୍ତୁ...ଅପରାଧୀଙ୍କ ଟାର୍ଗେଟରେ ମହିଳା, ବୃଦ୍ଧାଙ୍କ ଠାରୁ ଲୁଟିଲେ ସୁନା ଚେନ ଏହା ମଧ୍ୟ ପଢ଼ନ୍ତୁ... |
କ'ଣ ଥିଲା ଘଟଣା:
ଗତ ୧୧ ତାରିଖରେ କାର୍ତ୍ତିକ ମାସରେ ନିଜ ସ୍ବାମୀଙ୍କ ସହ ସବୁଦିନ ପରି ସେଦିନ ମନ୍ଦିର ଯାଉଥିଲେ ୟୁ. ବିଭୁ ପାତ୍ର । ସ୍ବାମୀ-ସ୍ତ୍ରୀ ବାଇକରେ ମନ୍ଦିର ଯିବା ବାଟରେ ୨ ଜଣ ବାଇକରେ ଆସି ମହିଳାଙ୍କ ବେକରୁ ସୁନା ଚେନ ଝମ୍ପିଥିଲେ । ଚେନଟି ମୋଟା ଥିବାରୁ ମହିଳା ଜଣଙ୍କ ଚେନ ସହ ଟାଣି ହୋଇ ଚଳନ୍ତା ବାଇକରୁ ତଳେ ଖସିପଡ଼ିଥିଲେ । ଦୁଇ ଲୁଟେରା ସୁନା ଚେନ ନେଇ ସେଠାରୁ ଚମ୍ପଟ ମାରିଥିଲେ । ହେଲେ ମୁଣ୍ଡ ଓ ଶରୀରରେ ଶକ୍ତ ଆଘାତ ଲାଗିଥିବା ମହିଳା ଜଣଙ୍କ ରାସ୍ତା ଉପରେ ଛଟପଟ ହେଉଥିଲେ । ମହିଳାଙ୍କ ସ୍ବାମୀ ୟୁ. ପ୍ରତାପ ପାତ୍ର ତାଙ୍କୁ ହସ୍ପିଟାଲ ନେଇଥିଲେ । ଗତ ୧୩ ତାରିଖରେ ଏକ ଘରୋଇ ହସ୍ପିଟାଲରେ ଚିକିତ୍ସିତ ଅବସ୍ଥାରେ ମହିଳାଙ୍କର ମୃତ୍ୟୁ ହୋଇଥିଲା । ପରେ ଏନେଇ ପୋଲିସ ଏକ ହତ୍ୟା ମାମଲା ରୁଜୁ କରିଥିଲା । ସାଇଣ୍ଟିଫିକ ପ୍ରମାଣ ଓ ପାରିପାର୍ଶ୍ବିକ ପ୍ରମାଣ ଓ ପୋଲିସ ତଦନ୍ତ ପରେ ବ୍ୟବହାର ହୋଇଥିବା ପ୍ରମାଣ ଓ ତଥ୍ୟ ଆଧାରରେ ଦୀର୍ଘ ୧୪ ଦିନ ପରେ ଝାଡଖଣ୍ଡରୁ ହତ୍ୟାକାରୀକୁ ଗିରଫ କରିଛି କମିଶନରେଟ୍ ପୋଲିସ ।
ଇଟିଭି ଭାରତ, ଭୁବନେଶ୍ବର
