ମାଲକାନଗିରି: କର୍ଣ୍ଣାଟକରେ ହେବାକୁ ଥିବା କ୍ରୀଡ଼ା ପାଇଁ ଛାତ୍ରଛାତ୍ରୀଙ୍କୁ ପ୍ରସ୍ତୁତି କରିବାକୁ ମୟୂରଭଞ୍ଜ ନେଇଥିଲେ ଶିକ୍ଷକ । "ଫେରିବା ବେଳେ ଟ୍ରେନରେ ଛାତ୍ରୀଙ୍କୁ ଅସଦାଚରଣ କଲେ ଶିକ୍ଷକ "! ଏଭଳି ଏକ ସାଂଘାତିକ ଅଭିଯୋଗ ଆସିଛି ମାଲକାନଗିରି ଏକଲବ୍ୟ ଆଦର୍ଶ ଆବାସିକ ବିଦ୍ୟାଳୟରୁ । ଶିକ୍ଷକ ବିଭୂତିଭୂଷଣ ପଣ୍ଡାଙ୍କ ବିରୋଧରେ ଛାତ୍ରୀ ଅଭିଯୋଗ ଆଣିଥିବା ବେଳେ କାର୍ଯ୍ୟାନୁଷ୍ଠାନ ଦାବି କରିଛନ୍ତି ।
ଉକ୍ତ ବିଦ୍ୟାଳୟର ଛାତ୍ରଛାତ୍ରୀଙ୍କ ଅଭିଯୋଗ ଅନୁସାରେ, ଗତ ଡିସେମ୍ବର ମାସରେ କର୍ଣ୍ଣାଟକରେ କ୍ରୀଡା ପ୍ରତିଯୋଗିତା ଅନୁଷ୍ଠିତ ହେବାର ଥିଲା । କବାଡି ଓ ଖୋକୋ ଖେଳ ପାଇଁ ଅଂଶ ଗ୍ରହଣ କରିବା ପାଇଁ ପ୍ରସ୍ତୁତି କରିବାକୁ ମାଲକାନଗିରି ଏକଲବ୍ୟ ଆବାସିକ ବିଦ୍ୟାଳୟର ୪ ଜଣ ଛାତ୍ରୀ ଓ ଜଣେ ଛାତ୍ର ମୟୂରଭଞ୍ଜ ଯାଇଥିଲେ । ଏହି ଛାତ୍ରଛାତ୍ରୀଙ୍କ ଦାୟିତ୍ବ ନେଇଥିଲେ ଶିକ୍ଷକ ବିଭୁତିଭୂଷଣ ପଣ୍ଡା । ତେବେ ସେଠାରେ ପ୍ରସ୍ତୁତି କରାଯାଉଥିବା ବେଳେ କୌଣସି ଏକ କାରଣ ପାଇଁ କର୍ଣ୍ଣାଟକରେ ହେବାକୁ ଥିବା ଖେଳକୁ ବାତିଲ କରାଯାଇଥିଲା । ଦାୟିତ୍ଵରେ ଥିବା ଶିକ୍ଷକ ବିଭୁତିଭୂଷଣ ପିଲାଙ୍କୁ ନେଇ ଟ୍ରେନରେ ଫେରୁଥିଲେ । ଟ୍ରେନ ଭିତରେ ଜୈନିକ ଛାତ୍ରୀଙ୍କୁ ଅସଦାଚରଣ କରିଥିବାର ଛାତ୍ରଛାତ୍ରୀମାନେ ଅଭିଯୋଗ କରିଛନ୍ତି । ଛାତ୍ରୀ ଟ୍ରେନରେ ଶୋଇଥିବା ସମୟରେ ଶିକ୍ଷକ ଜଣକ ଛାତ୍ରୀଙ୍କୁ ଜୋର୍ ଜବରଦସ୍ତ ଖରାପ ବ୍ୟବହାର କରିଥିବା ଅଭିଯୋଗ ହୋଇଛି । ତେବେ ଏହି ସମୟର ଫଟୋ ଉତ୍ତୋଳନ କରିଥିଲେ ଟ୍ରେନରେ ରହିଥିବା କିଛି ଛାତ୍ରୀ ।
ଏହା ମଧ୍ୟ ପଢନ୍ତୁ: ସ୍କୁଲରେ ଛାତ୍ରୀଙ୍କୁ ଅସଦାଚରଣ ଅଭିଯୋଗ, ପିଅନ ଗିରଫ
କିଛି ଦିନ ବିତିଯାଇଥିଲେ ସୁଦ୍ଧା ପୀଡ଼ିତା ଛାତ୍ରୀ ଭୟରେ ଘଟଣା ସଂପର୍କରେ କାହାରିକୁ କହି ନଥିଲେ । ପୀଡ଼ିତା ଛାତ୍ରୀ ନିଜ ସାଙ୍ଗ ସାଥିଙ୍କୁ ସମସ୍ତ ଘଟଣା ସଂପର୍କରେ ଅବଗତ କରିବା ପରେ ବିଦ୍ୟାଳୟର ସମସ୍ତ ଛାତ୍ରୀଛାତ୍ରମାନେ ଅଭିଯୁକ୍ତ ଶିକ୍ଷକଙ୍କୁ ଘେରି ଶିକ୍ଷକଙ୍କ ବିରୋଧରେ କାର୍ଯ୍ୟାନୁଷ୍ଠାନ ପାଇଁ ଦାବି ଜଣାଇଥିଲେ । ପୂର୍ବରୁ ବହୁବାର ଶିକ୍ଷକଙ୍କ ବିରୋଧରେ ଅଭିଯୋଗ ହୋଇଥିଲେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇନଥିଲା । ତେଣୁ ଅଭିଯୁକ୍ତ ଶିକ୍ଷକଙ୍କ ତୁରନ୍ତ କାର୍ଯ୍ୟାନୁଷ୍ଠାନ ପାଇଁ ଛାତ୍ରଛାତ୍ରୀମାନେ ଦାବି କରିଛନ୍ତି ।
ଅନ୍ୟପକ୍ଷରେ ପ୍ରଶାସନ ପକ୍ଷରୁ ଘଟଣାର ସୂଚନା ପାଇ ଡିଡବ୍ଲୁଓ ପ୍ରଫୁଲ୍ଲ କୁମାର ଭୂଜବଳ, ଜେନା ମଣି ଘଟଣା ସ୍ଥଳରେ ପହଞ୍ଚି ପିଲାଙ୍କୁ ପଚରାଉଚରା କରିଥିଲେ । ଅନ୍ଯପଟେ ମାଲକାନଗିରି ପୋଲିସ ଘଟଣା ସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି । ତେବେ ଶିକ୍ଷକ ଜଣକ କୁଆଡେ ଫେରାର ହୋଇଯାଇଥିବା ସୂଚନା ରହିଛି । ପୀଡିତା ଛାତ୍ରଛାତ୍ରୀଙ୍କ ବାପା ନ୍ୟାୟ ଦାବିକରି ଉକ୍ତ ଶିକ୍ଷକଙ୍କ ଉପରେ କାର୍ଯ୍ୟାନୁଷ୍ଠାନ ଦାବି କରିଛନ୍ତି ।
ଇଟିଭି ଭାରତ, ମାଲକାନଗିରି
