ଢେଙ୍କାନାଳ: ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ କାମାକ୍ଷାନଗର ଉପ-ଜିଲ୍ଲାପାଳ ନାରାୟଣ ଚନ୍ଦ୍ର ନାୟକଙ୍କ ବାସଭବନରେ ଭିଜିଲାନ୍ସ ଚାଢ଼ାଉ କରିଛି । ରାଜ୍ୟ ଭିଜିଲାନ୍ସ ସେଲ୍ ପକ୍ଷରୁ ଏକକାଳୀନ ୧୦ଟିମ୍ ଆଜି ସକାଳୁ ନାରାୟଣଙ୍କ ଅଫିସ, ସରକାରୀ ବାସଭବନ ସମେତ ଏକାଧିକ ସ୍ଥାନରେ ଚାଢ଼ାଉ କରି ସର୍ଚ୍ଚ ଜାରି ରଖିଛି । କାମାକ୍ଷାନଗରରେ ଥିବା ଉପ-ଜିଲ୍ଲାପାଳଙ୍କ କାର୍ଯ୍ୟାଳୟ, ସରକାରୀ ବାସଭବନ ସମେତ ଭଦ୍ରକ ଜିଲ୍ଲା ବାସୁଦେବପୁର ସ୍ଥିତ ପୈତୃକ ଘର, ରାଜଧାନୀ ଭୁବନେଶ୍ୱର ଥିବା ଘର ଓ କିଛି ନିକଟ ସମ୍ପର୍କୀୟଙ୍କ ବାସଭବନରେ ଭିଜିଲାନ୍ସ ଟିମ୍ ଏକକାଳୀନ ଚାଢ଼ାଉ କରି ତଲାସି ଜାରି ରଖିଛି ।
ସକାଳୁ ସକାଳୁ ଭିଡିଲାନ୍ସର ଏକ ବଡ ଟିମ କାମାକ୍ଷାନଗରରେ ପହଞ୍ଚିଥିଲେ । ସେମାନେ ପ୍ରଥମେ ଉପ-ଜିଲ୍ଲାପାଳଙ୍କ ଅଫିସ ଓ ତାଙ୍କ ସରକାରୀ ବାସଭବନରେ ପହଞ୍ଚି ତଲାସି ଆରମ୍ଭ କରିଥିଲେ । ଏହି ଚଢ଼ାଉରେ ୭ ଜଣ ଡ଼ିଏସପି, ୩ ଜଣ ଇନିସପେକ୍ଟର, ୮ ଜଣ ଏଏସଆଇଙ୍କ ସମେତ ପ୍ରାୟ ୫୦ଜଣ ଭିଜିଲାନ୍ସ ଅଧିକାରୀ ଓ କର୍ମଚାରୀ ସାମିଲ ରହିଛନ୍ତି । ନାରାୟଣ ନାୟକଙ୍କୁ ତାଙ୍କ ଭୁବନେଶ୍ୱର ସ୍ଥିତ ନିଜସ୍ୱ ବାସଭାବନରୁ ଠାବ କରିବା ପରେ ଭିଜିଲାନ୍ସ ଟିମ୍ ଅଟକ କରିଛି । ନାରାୟଣ ଭୁବନେଶ୍ବରରେ ଥିବାରୁ ତାଙ୍କ ଅନୁପସ୍ଥିତିରେ କାମାକ୍ଷାନଗର ସରକାରୀ ବାସଭବନରେ ମାଜିଷ୍ଟ୍ରେଟଙ୍କ ଉପସ୍ଥିତିରେ ତାଲା ଭାଙ୍ଗିଥିଲା ଭିଜିଲାନ୍ସ ଟିମ୍ ।
ଏହା ମଧ୍ୟ ପଢନ୍ତୁ:- ରିମୋର୍ଟ ଲକ୍ କରି ରହୁଥିଲେ ସରକାରୀ ବାବୁ, ଘରେ ପହଞ୍ଚିଗଲା ଭିଜିଲାନ୍ସ ଏହା ମଧ୍ୟ ପଢନ୍ତୁ ...ଭିଜିଲାନ୍ସ ଜାଲରେ କେନ୍ଦୁଝର ବୈତରଣୀ ବେସିନ ମୁଖ୍ୟଯନ୍ତ୍ରୀ, ୧୦ରୁ ଅଧିକ ସ୍ଥାନରେ ରେଡ୍ |
ତେବେ ସକାଳୁ ଭିଜିଲାନ୍ସ ଟିମ୍ ଚଢାଉ ସହ ଜବତ ସାମଗ୍ରୀର ମୂଲ୍ୟାୟନ କରୁଛି । ଭିଜିଲାନ୍ସ ହାତରେ ଏକାଧିକ ଗୁରୁତ୍ବପୂର୍ଣ୍ଣ ସମ୍ପତ୍ତି ସମ୍ପର୍କିତ ପ୍ରମାଣପତ୍ର ଲାଗିଥିବା ଗଣମାଧ୍ୟମରେ ଖବର ପ୍ରକାଶ ପାଇଥିଲେ ସୁଦ୍ଧା, କଣ ସବୁ ଜବତ ହୋଇଛି ଓ ଏହାର ମୂଲ୍ୟ କେତେ ହେବ, ସେ ସମ୍ପର୍କରେ ଭିଜିଲାନ୍ସ ବିଭାଗ ଆନୁଷ୍ଠାନିକ ଭାବେ କୌଣସି ସୂଚନା ଦେଇନି । ଜବତ ସାମଗ୍ରୀର ମୂଲ୍ୟାୟନ କରିବା ପରେ ଏହାର ପରିମାଣ ସମ୍ପର୍କରେ ଭିଜିଲାନ୍ସ ସ୍ପଷ୍ଟ କରିପାରେ । ସେହି ଆଧାରରେ ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ମଧ୍ୟ ଗ୍ରହଣ କରାଯାଇପାରେ । ତାଙ୍କ ଗିରଫଦାରୀ ଆଶଙ୍କା ମଧ୍ୟ ରହିଛି ।
ଇଟିଭି ଭାରତ, ଢେଙ୍କାନାଳ
