ବୌଦ୍ଧ: ଗଣପର୍ବ ନୂଆଁଖାଇ ପାଇଁ ସମଗ୍ର ପଶ୍ଚିମ-ଓଡିଶା ଉତ୍ସବମୁଖର ଥିଲା ବେଳେ ଉଜୁଡି ଯାଇଛି ଗୋଟିଏ ପରିବାର । ଦଇବ ଯେମିତି ଦାଉ ସାଧିଲା । ସର୍ପାଘାତରେ ଗୋଟିଏ ପରିବାର 3 ଭଉଣୀଙ୍କ ମୃତ୍ୟୁ ହୋଇଥିବା ବେଳେ ବାପା ହସ୍ପିଟାଲ ବେଡରେ ମୃତ୍ୟୁ ସହ ସଂଗ୍ରାମ କରୁଛନ୍ତି । ମୃତକଙ୍କ ମଧ୍ୟରେ ଜଣେ ଅଢେଇ ବର୍ଷର ଶିଶୁ କନ୍ୟା ଥିବା ବେଳେ ଅନ୍ୟ ଦୁଇ ଜଣ ନାବାଳିକାଙ୍କ ବୟସ 10 ବର୍ଷରୁ କମ । ବୌଦ୍ଧ ଜିଲ୍ଲାର ଟିକରପଡା ଅଞ୍ଚଳରେ ଘଟିଥିବା ଏପରି ଏକ ଦୁଖଃଦ ଘଟଣା ସାରା ରାଜ୍ୟକୁ ସ୍ତବ୍ଦ କରିଦେଇଛି ।
ବାପା ଓ 6 ଝିଅଙ୍କୁ କାମୁଡିଲା ସାପ:-
ସୂଚନା ଅନୁସାରେ, ବୌଦ୍ଧ ଜିଲ୍ଲା ଟିକରପଡା ପଞ୍ଚାୟତ ବରପଦର ଗ୍ରାମର ସୈରେନ୍ଦ୍ରୀ ମଲ୍ଲିକ ଚରିଆପାଲି ଗ୍ରାମରେ ସପତ୍ନୀକ ନିଜ ତିନି ଝିଅ ଓ ଗୋଟିଏ ପୁଅକୁ ନେଇ ରହୁଥିଲେ । ପ୍ରସିଦ୍ଧ ଶକ୍ତିପୀଠ ସିଂହାସିନୀ ଦେବୀଙ୍କ ଜଣେ ସେବାୟତ ଭାବେ କାର୍ଯ୍ୟରତ ଥିବା ସୈରେନ୍ଦ୍ରୀ ବଡ଼ ଦୁଇ ଝିଅଙ୍କୁ ଶିକ୍ଷା ଗ୍ରହଣ ପାଇଁ ଆଦିବାସୀ ଆବାସିକ ବିଦ୍ୟାଳୟରେ ଭର୍ତ୍ତି କରିଥିଲେ । ତେବେ ସେ ଶନିବାର ଗଣେଶ ପୂଜା ଅବସରରେ ଦୁଇ ଝିଅଙ୍କୁ ନେଇ ଘରକୁ ଫେରିଥିଲେ । ଆଜି (ସୋମବାର) ସେଠାରେ ନୂଆଖାଇବାର ବିଧି ଥିଲା । ଗତକାଲି ରାତିରେ ସମସ୍ତେ ଶୋଇଥିବା ବେଳେ 3 ଝିଅ ଓ ସୈରେନ୍ଦ୍ରୀଙ୍କୁ ସାପ କାମୁଡି ଦେଇଥିଲା । ତେବେ ସୈାଭାଗ୍ୟବଶତଃ ସୈ୍ରେନ୍ଦ୍ରୀଙ୍କ ପତ୍ନୀ ଓ ଏକମାତ୍ର ପୁଅର ଅନ୍ୟତ୍ର ଶୋଇଥିବାରୁ ସାପ କାମୁଡାରୁ ବର୍ତ୍ତି ଯାଇଥିଲେ ।
ଅନ୍ଧବିଶ୍ବାସ ପାଇଁ ହସ୍ପିଟାଲ ନେବାରେ ବିଳମ୍ବ !
ସ୍ଥାନୀୟ ଲୋକଙ୍କଠାରୁ ମିଳିଥିବା ସୂଚନା ଅନୁସାରେ, ସାପ କାମୁଡିବାରୁ ଅନ୍ଧବିଶ୍ୱାସର ବଶବର୍ତ୍ତୀ ହୋଇ ଝଡାଫୁଙ୍କା ଓ ଗୁଣିଗାରେଡିର ସହାୟତା ନେବାରୁ ଝିଅମାନଙ୍କୁ ଡାକ୍ତରଖାନାକୁ ଆଣିବାରେ ବିଳମ୍ବ ହୋଇଥିଲା । ଫଳରେ ବୌଦ୍ଧ ଜିଲ୍ଲା ମୁଖ୍ୟ ଚିକିତ୍ସାଳୟରେ ପହଞ୍ଚିବା ବେଳକୁ ଜଣେ ପରେ ଜଣେ ଏଭଳି ତିନୋଟି ଝିଅ ଆଖି ବୁଜି ଦେଇଥିଲେ ।ଗୁରୁତର ସୈ୍ରେନ୍ଦ୍ରୀଙ୍କୁ ବୁର୍ଲା ମେଡିକାଲକୁ ସ୍ଥାନାନ୍ତରିତ କରାଯାଇଛି । ଏଭଳି ଘଟଣା ଜଣାପଡ଼ିବା ପରେ ଜିଲ୍ଲାରେ ଶୋକର ଛାୟା ଖେଳିଯାଇଛି ।
ଘଟଣାସ୍ଥଳରେ ପ୍ରଶାସନିକ ଅଧିକାରୀ ଓ ବିଧାୟକ:-
ଅଘଟଣ ସମ୍ପର୍କରେ ସୂଚନା ପାଇଁ ବୈଦ୍ଧ ପୋଲିସ ତଦନ୍ତ ଆରମ୍ଭ କରିଥିବା ବେଳେ ସ୍ଥାନୀୟ ବିଧାୟକ ତଥା ସରକାରୀ ଦଳର ମୁଖ୍ୟ ସଚେତକ ସରୋଜ କୁମାର ପ୍ରଧାନ ସମ୍ପୃକ୍ତ ପରିବାରକୁ ଭେଟି ସମବେଦନା ଜଣାଇଛନ୍ତି । ତୁରନ୍ତ ଆବଶ୍ୟକ ସହାୟତା ଯୋଗାଇଦେବାକୁ ଜିଲ୍ଲା ପ୍ରଶାସନକୁ ମଧ୍ୟ ବିଧାୟକ ନିର୍ଦ୍ଦେଶ ଦେଇଛନ୍ତି ।
ଇଟିଭି ଭାରତ, ଭୁବନେଶ୍ବର
