ଦେବଗଡ଼: ଜଙ୍ଗଲରୁ ଉଦ୍ଧାର ହେଲା ଛଅ ମାସ ପୂର୍ବରୁ ନିଖୋଜ ଥିବା ଯୁବକଙ୍କ କଙ୍କାଳ । ହତ୍ୟା ସନ୍ଦେହ ନେଇ ପୋଲିସର ତଦନ୍ତ ଆରମ୍ଭ । ବିଗତ କିଛିମାସ ହେଲା ଦେବଗଡ଼ ଜିଲ୍ଲାରେ ବୃଦ୍ଧି ପାଉଛି ଅପରାଧୀକ କାର୍ଯ୍ୟକଳାପ । ପୋଲିସ ବିଭାଗରେ ଦକ୍ଷ ଅଧିକାରୀଙ୍କ ଅଭାବ ତଥା ଆଇନ ଶୃଙ୍ଖଳା ପରିସ୍ଥିତିକୁ ନିୟନ୍ତ୍ରଣ କରିବାରେ ପୋଲିସର ବିଫଳତା କାରଣରୁ ଚୋରି, ଜଙ୍ଗଲ ତସ୍କରି, ହତ୍ୟା ଲୁଟ ଓ ଅପହରଣ ଆଦି ଅପରାଧିକ କାର୍ଯ୍ୟକଳାପ ବଢିବାରେ ଲାଗିଛି । ଏହାସହ ଜିଲ୍ଲାର ଶାନ୍ତ ବାତାବରଣ ନଷ୍ଟ ହେବାରେ ଲାଗିଛି ।
ଆଜି ବାରକୋଟ ଥାନା ଅନ୍ତର୍ଗତ କାଉଁସିବାହାଳ ଗ୍ରାମ ନିକଟସ୍ଥ ଜଙ୍ଗଲରୁ ଏକ ନିଖୋଜ ଥିବା ଯୁବକର କଙ୍କାଳ ଉଦ୍ଧାର ହୋଇଛି । କେହି ଯୁବକକୁ ହତ୍ୟା କରି ମାଟିରେ ପୋତି ଦେଇଥିବା ସନ୍ଦେହ ଦୃଢ଼ୀଭୂତ ହୋଇଛି । ଏନେଇ ସମଗ୍ର ଅଞ୍ଚଳରେ ଆତଙ୍କର ବାତାବରଣ ସୃଷ୍ଟି ହୋଇଛି । ଦେବଗଡ ଥାନା ଅନ୍ତର୍ଗତ କାଉଁସିବାହାଳ ଗ୍ରାମ ନିକଟସ୍ଥ ଜଙ୍ଗଲରୁ ଜଣେ ଯୁବକର କଙ୍କାଳ ଆଜି ପୋଲିସ ଜବତ କରିଛି । ଜବତ ହୋଇଥିବା କଙ୍କାଳ ବାରକୋଟ ଥାନା ଅନ୍ତର୍ଗତ ସଇଡା ଗ୍ରାମର ଲୋଚନ ଶବରଙ୍କ ପୁଅ ସନ୍ତୋଷ ଶବର (୨୧) ବୋଲି ଜଣାପଡ଼ିଛି ।
ମିଳିଥିବା ସୂଚନା ଅନୁଯାୟୀ, ସନ୍ତୋଷ କାଉଁସିବାହାଳ ଗ୍ରାମରେ ନିଜର ସଂପର୍କୀୟଙ୍କ ଘରେ ରହି ଗ୍ରାମର ଜନୈକ ବ୍ୟକ୍ତିଙ୍କ ନିକଟରେ କାମ କରୁଥିଲା । ପ୍ରାୟ ୬ ମାସ ପୂର୍ବରୁ ସନ୍ତୋଷ ଜମିକୁ ହଳ କରିବା ପାଇଁ ଯାଇ ଥିବାବେଳେ ସେହି ଦିନ ଠାରୁ କୁଆଡେ ନିଖୋଜ ହୋଇଥିଲା । ତାଙ୍କ ପରିବାର ଲୋକ ସନ୍ତୋଷକୁ ବହୁ ଖୋଜାଖୋଜି କରିଥିଲେ ସୁଦ୍ଧା ତାଙ୍କର କୌଣସି ସନ୍ଧାନ ମିଳିନଥିଲା । ସନ୍ତୋଷ ନିଖୋଜ ହେବାର କୌଣସି କାରଣ ମଧ୍ୟ ଜଣା ପଡିନଥିଲା । ତଥାପି ସନ୍ତୋଷର ଫେରିବା ବାଟକୁ ପରିବାର ଲୋକେ ଅନାଇ ରହିଥିଲେ ।
