ମାଲକାନଗିରି: ଓଡ଼ିଷା ଏକ କୃଷି ଭିତ୍ତିକ ରାଜ୍ୟ ହୋଇଥିବା ବେଳେ ମାଲକାନଗିରି ଜିଲ୍ଲା ଏକ ଚାଷ ବହୁଳ ଜିଲ୍ଲା ଅଟେ । ଏଠାକାର ଚାଷୀ ପ୍ରାୟତଃ ଧାନ, ମୁଗ, ବିରି ଓ ପନିପରିବାର ଚାଷ କରିଥାନ୍ତି । ପ୍ରଥମଥର ପାଇଁ ମାଲକାନଗିରି ଭଳି ଏକ ଉପାନ୍ତ ଜିଲ୍ଲାରେ ଦେଖିବାକୁ ମିଳିଛି ଧାନ ବିଲରେ ପାନପତ୍ର ଚାଷ । ମାଲକାନଗିରି ଜିଲ୍ଲାର କଲିମେଳା ବ୍ଲକ ଅନ୍ତର୍ଗତ ତେଲରାଇ ପଞ୍ଚାୟତର ଏମ୍ ଭି ୭୭ ଗ୍ରାମରେ ପାନ ଚାଷ କରି ସ୍ବାବଲମ୍ବି ହେଉଛନ୍ତି ଜୟ ରାଧେ ସ୍ବୟଂସହାୟକ ଗୋଷ୍ଠିର ମହିଳାମାନେ। ଆଉ ଏହି ଚାଷ କରି ବେଶ ଭଲ ରୋଜଗାର ମଧ୍ୟ କରୁଛନ୍ତି ସ୍ବୟଂସହାୟକ ଗୋଷ୍ଠିର ମହିଳାମାନେ ।
ମାଲକାନଗିରି ଜିଲ୍ଲାରେ ପ୍ରାୟ ବଙ୍ଗାଳି ଗାଁ ରହିଛି । ଏଠାରେ ବସବାସ କରୁଥିବା ଲୋକ ପ୍ରାୟତଃ ପାନ ଖାଇବାକୁ ପସନ୍ଦ କରିଥାନ୍ତି। ଫଳରେ ଘରେ ଘରେ ପାନ ବଟୁଆ ଦେଖିବାକୁ ମିଳିଥାଏ। ଏସବୁ ଦେଖି ଜୟ ରାଧେ ସ୍ବୟଂସହାୟକ ଗୋଷ୍ଠିର ମାଆ ମାନେ ନିଷ୍ପତ୍ତି ନେଇଥିଲେ ପାନ ଚାଷ କରିବା ପାଇଁ । ଏହାପରେ ଓଏଲ୍ଏମ୍ (ଓଡିଶା ଜୀବିକା ମିସନ୍ ) ସହାୟତାରେ ବ୍ୟାଙ୍କ ଲୋନ୍ କରି ୫୦ହଜାର ଟଙ୍କା ଉଠାଇ ଆରମ୍ଭ କରିଥିଲେ ପାନପତ୍ର ଚାଷ । ପ୍ରଥମେ ପଶ୍ଚିମବଙ୍ଗରୁ ପାନପତ୍ର ଚାରା ଆଣି ୫୦ ଫୁଟ/୫୦ଫୁଟ ଜାଗାରେ ପାନ ଚଆରା ଲଗାଇଥିଲେ। ଏହାର ପ୍ରାୟ ୬ ମାସ ଦେଖାରେଖା କରିବା ପରେ ଅମଳ ହୋଇଥିଲା ପାନପତ୍ର। ଦେଖୁ ଦେଖୁ ୬ରୁ ୭ ମାସ ମଧ୍ୟରେ ସ୍ଥାନୀୟ ପାନ ଦୋକାନ ଗୁଡିକୁ ପାନପତ୍ର ଯୋଗାଇବା ସହ ଆଖ ପାଖ ଅଞ୍ଚଳର ପାନପତ୍ର ବେପାରୀ ମାନେ ମଧ୍ୟ ଆସି ଏଠାରୁ ପାନପତ୍ର ବିକିବାକୁ ନେଉଥିବା ମହିଳାମାନେ କହିଛନ୍ତି ।
ମାଲକାନଗିରି ଭଳି ଏକ ଉପାନ୍ତ ଜିଲ୍ଲାର ଏମ୍ ଭି ୭୭ ଗ୍ରାମର ଜୟ ରାଧେ ସ୍ବୟଂସହାୟକ ଗୋଷ୍ଠିର ମହିଳା ମାନେ ପାନପତ୍ର ଚାଷ କରି ଜିଲ୍ଲା ପାଇଁ ଉଦାହାରଣ ପାଲଟିଛନ୍ତି । ପାନପାତ୍ର ଚାଷ କରି ମହିଳା ମାନେ ଲାଭବାନ ହୋଇଛନ୍ତି । ଏହି ୬ମାସ ମଧ୍ଯରେ ଏତେ କମ୍ ଜାଗାରେ ପାନପାତ୍ର ଚାଷ କରି ୨୦ ରୁ ୩୦ ହଜାର ଟଙ୍କା ରୋଜଗାର କରିପାରିଛନ୍ତି ଏହି ମହିଳାମାନେ। ଏହାସହ ଏଠାରୁ ପାନପତ୍ର ନେଇ ବେଶ ଭଲ ରୋଜଗାର କରୁଥିବା କହିଛନ୍ତି ପାନପତ୍ର ବେପାରୀ । ତେବେ ଏଠାକାର ମହିଳାଙ୍କୁ ଦେଖି ଜିଲ୍ଲାର ବହୁ ସ୍ବୟଂସହାୟକ ଗୋଷ୍ଟି ର ମହିଳା ମାନେ ବି ପାନପତ୍ର ଚଷ କରିବାକୁ ମନ ବଳାଇଛନ୍ତି । ଏଥିପ୍ରତି ସରକାରଙ୍କ ଦୃଷ୍ଟି ପଡିଲେ ମହିଳାମାନେ ଆହୁରି ଆଗକୁ ଯାଇପାରିବେ ବୋଲି ଆଶା ବ୍ୟକ୍ତ କରିଛନ୍ତି ଜୟ ରାଧେ ସ୍ବୟଂସହାୟକ ଗୋଷ୍ଠୀର ମହିଳାମାନେ।
ଇଟିଭି ଭାରତ, ମାଲକାନଗିରି
