ରାଇରଙ୍ଗପୁର: ଜଙ୍ଗଲ ଜମିକୁ ନେଇ ଖଣ୍ଡଯୁଦ୍ଧ । ରଣକ୍ଷେତ୍ର ପାଲଟିଲା ଗାଁ । 2 ଗୋଷ୍ଠୀ ମଧ୍ୟରେ ରକ୍ତାକ୍ତ ସଂଘର୍ଷ । ସଂଘର୍ଷରେ ଉଭୟ ଗୋଷ୍ଠୀର ୮ ଜଣ ଗୁରୁତର ଥିବା ବେଳେ ୨୧ ଜଣ ଆହତ ହୋଇଛନ୍ତି । ସେପଟେ ଘଟଣାସ୍ଥଳରେ ପୋଲିସ ପହଞ୍ଚିଥିବା ବେଳେ 144 ଧାରା ଲାଗୁ କରାଯାଇଛି । ଏଭଳି ଗୋଷ୍ଠୀ ସଂଘର୍ଷ ଦେଖିବାକୁ ମିଳିଛି ମୟୂରଭଞ୍ଜ ଜିଲ୍ଲା ଠାକୁରମୁଣ୍ଡା ବ୍ଲକ ମହୁଲଡ଼ିହା ଥାନା ଚାନ୍ଦିଖମଣ ଗ୍ରାମରେ ।
ସୂଚନା ଅନୁସାରେ, ଠାକୁରମୁଣ୍ଡା ବ୍ଲକ ମହୁଲଡ଼ିହା ଥାନା କେଶଡ଼ିହା ଗ୍ରାମପଞ୍ଚାୟତ ଅନ୍ତର୍ଗତ ଚାନ୍ଦିଖମଣ ଜଙ୍ଗଲକୁ ସଫା କରି ବହୁ ବର୍ଷ ପୂର୍ବରୁ କିଛି ଲୋକ ଗ୍ରାମ ସ୍ଥାପନ କରି ରହି ଆସୁଥିଲେ । କିଛି ବର୍ଷ ପୂର୍ବରୁ ବିଭିନ୍ନ ସ୍ଥାନରୁ ଲୋକେ ଆସି ଚାନ୍ଦିଖମଣ ଗ୍ରାମ ନିକଟରେ ଜଙ୍ଗଲ ସଫା କରି ଘର କରିବା ସହ ଅସ୍ଥାୟୀ ଭାବରେ ପାଲ ଟାଣି ରହିଥିଲେ । ପୂର୍ବରୁ ଥିବା ଲୋକଙ୍କ ସହିତ ନୂଆ ଆସିଥିବା ଲୋକମାନଙ୍କ ମଧ୍ୟରେ ଜଙ୍ଗଲ ଜମିକୁ ନେଇ ପୂର୍ବରୁ ବିବାଦ ଲାଗି ରହିଥିଲା । ବିବାଦ ଯୋଗୁଁ ଜଙ୍ଗଲ ଜମି ଚିହ୍ନଟ ପାଇଁ ପ୍ରଶାସନ ପକ୍ଷରୁ ଉଦ୍ୟମ କରାଯାଇ ଗତ ମାସ ୨୮ ତାରିଖ ଦିନ ଗ୍ରାମକୁ ଯାଉଥିବା ବେଳେ ରାସ୍ତାରେ ଗୋଟିଏ ଗୋଷ୍ଠୀ ଏହାକୁ ବିରୋଧ କରିଥିଲା । ସେଦିନ ଜଙ୍ଗଲ ଜମି ମାପ ନକରିପାରି ପ୍ରଶାସନ ଫେରି ଆସିଥିଲା ।
ଏପଟେ ଗତକାଲି (ଶନିବାର) ଏହି ଜମିକୁ ନେଇ ଉଭୟ ଗୋଷ୍ଠୀ ମଧ୍ୟରେ ଗଣ୍ଡଗୋଳ ହୋଇଥିଲା । ନୂଆ ବସ୍ତି ଓ ପୁରୁଣା ବସ୍ତିର ଶତାଧିକ ଲୋକେ ମାରଣାସ୍ତ୍ର ସହ ଠେଙ୍ଗା ବାଡ଼ି ଧରି ଉଭୟେ ଉଭୟଙ୍କ ଉପରେ ଆକ୍ରମଣ କରିଥିଲେ । ଗଣ୍ଡଗୋଳ ସମୟ ମଧ୍ୟରେ ଉଭୟ ଗୋଷ୍ଠୀର ପ୍ରାୟ ୫୦୦ରୁ ଊର୍ଦ୍ଧ୍ବ ଲୋକେ ଘଟଣାସ୍ଥଳରେ ଏକତ୍ରିତ ହୋଇ ଗଣ୍ଡଗୋଳ କରିଥିବାର ସୂଚନା ମିଳିଛି । ସେପଟେ ସଂଘର୍ଷରେ ଉଭୟ ଗୋଷ୍ଠୀର ୮ ଜଣ ଗୁରୁତର ଥିବା ବେଳେ ୨୧ ଜଣ ଆହତ ହୋଇଛନ୍ତି । ସମସ୍ତ ଆହତ ଓ ଗୁରୁତରଙ୍କୁ ଠାକୁରମୁଣ୍ଡା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର ଓ ଚମ୍ପାଝର ପ୍ରାଥମିକ ଚିକିତ୍ସାଳୟରେ ଭର୍ତ୍ତି କରାଯାଇ ଚିକିତ୍ସା କରାଯାଇଛି ।
ଗୋଷ୍ଠୀ ସଂଘର୍ଷ ପରେ ଉଭୟ ଗୋଷ୍ଠୀର ଲୋକେ ଆଜି ଠାକୁରମୁଣ୍ଡା-ଉଦଳା ରାସ୍ତାକୁ ପୃଥକ ସ୍ଥାନରେ ଦୀର୍ଘ ୪ ଘଣ୍ଟା ଧରି ରାସ୍ତାରୋକ କରିଥିଲେ । ଖବର ପାଇ ଘଟଣାସ୍ଥଳକୁ ଠାକୁରମୁଣ୍ଡା ବିଡ଼ିଓ ସ୍ବପ୍ନେଶ୍ବର ବେହେରା, କରଞ୍ଜିଆ ଉପଖଣ୍ଡ ପୋଲିସ ଅଧିକାରୀ ସୁବ୍ରତ କୁମାର, କରଞ୍ଜିଆ ଥାନା ଅଧିକାରୀ, ମହୁଲଡ଼ିହା ଥାନା ଅଧିକାରୀ, ଠାକୁରମୁଣ୍ଡା ଥାନା ଅଧିକାରିଣୀ ସାବିତ୍ରୀ ଦଳେଇ ସମେତ ପୋଲିସ ଫୋର୍ସ ପହଞ୍ଚିଛି ଥିଲେ । ରାସ୍ତାରୋକ କରିଥିବା ଉଭୟ ଗୋଷ୍ଠୀଙ୍କ ସହିତ ଆଲୋଚନା କରିଥିଲେ । ଆଲୋଚନାରେ ଆସନ୍ତା ୧୩ ତାରିଖ ପରେ ଗ୍ରାମରେ ବିବାଦୀୟ ଜମିକୁ ରାଜସ୍ୱ ବିଭାଗ ଦ୍ଵାରା ମାପ କରାଯିବାକୁ ନିଷ୍ପତ୍ତି ପରେ ଉଭୟ ପକ୍ଷଙ୍କ ଦ୍ଵାରା କରାଯାଇଥିବା ରାସ୍ତା ରୋକ ହଟିଥିଲା । ଗ୍ରାମରେ ଚାପା ଉତ୍ତେଜନା ଲାଗି ରହିଥିବା କାରଣରୁ ଗାଁରେ ୧୪୪ ଧାରା ଜାରି କରିଛନ୍ତି କରଞ୍ଜିଆ ଉପଜିଲ୍ଲାପାଳ । ପୁଣି ଗଣ୍ଡଗୋଳ ହେବା ଆଶଙ୍କା କରି ଗ୍ରାମରେ ପୋଲିସ ମୁତୟନ କରାଯାଇଛି ।
ଇଟିଭି ଭାରତ, ମୟୂରଭଞ୍ଜ
