ଭୁବନେଶ୍ବର: ପୋଲିସ ଡିଜି-ଆଇଜି ସମ୍ମିଳନୀରେ ଅଂଶଗ୍ରହଣ କରିବା ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆଜି ୩ ଦିନିଆ ଭୁବନେଶ୍ବର ଗସ୍ତରେ ଆସୁଛନ୍ତି । ଆଜି ଅପରାହ୍ନରେ ପ୍ରଧାନମନ୍ତ୍ରୀ ଭୁବନେଶ୍ବରରେ ଅବତରଣ କରିବେ । ପ୍ରଧାନମନ୍ତ୍ରୀଙ୍କ ଗସ୍ତ ପାଇଁ ବ୍ଲୁ ବୁକ ପ୍ରୋଟୋକଲ ଅନୁସାରେ, ସୁରକ୍ଷା ଓ ଟ୍ରାଫିକ ଏକାଧିକ ବ୍ୟବସ୍ଥା ଗ୍ରହଣ କରାଯାଇଛି । ସେହି କାରଣରୁ ଆଜି ଅପରାହ୍ନ ୧ଟା ପରେ ଭୁବନେଶ୍ବର ମହାନଗର ନିଗମ ଅଧୀନରେ ଆସୁଥିବା ସମସ୍ତ ବିଦ୍ୟାଳୟ(School) ବନ୍ଦ ରଖିବାକୁ ରାଜ୍ୟ ସରକାର ନିଷ୍ପତ୍ତି ନେଇଛନ୍ତି ।
- ଆଜିଠାରୁ ୩ ଦିନିଆ DG-IG ସମ୍ମିଳନୀ:-
ଆଜିଠାରୁ ଭୁବନେଶ୍ବରରେ ପୋଲିସ ଡିଜି-ଆଇଜି ସମ୍ମିଳନୀ ଆରମ୍ଭ ହୋଇଛି । ଏଥିରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, କେନ୍ଦ୍ର ଗୃହମନ୍ତ୍ରୀ ଅମିତ ଶାହ, ଜାତୀୟ ସୁରକ୍ଷା ପରାମର୍ଶଦାତା ଅଜିତ ଡୋଭାଲଙ୍କ ସମେତ ସମସ୍ତ ରାଜ୍ୟର ପୋଲିସ ମହାନିର୍ଦ୍ଦେଶକ ଓ ମହାନରୀକ୍ଷକମାନେ ଅଂଶଗ୍ରହଣ କରିବେ । ଗତକାଲିଠାରୁ ପୋଲିସ ଅଧିକାରୀମାନେ ରାଜଧାନୀରେ ପହଞ୍ଚିସାରିଛନ୍ତି । ସେମାନେ ରାଜ୍ୟ ଅତିଥି ଭବନରେ ଅବସ୍ଥାନ କରୁଛନ୍ତି । ଆଜି ପୂର୍ବାହ୍ନରେ ଶାହ ପହଞ୍ଚିବେ । ପରେ ଅପରାହ୍ନ ପ୍ରାୟ 4ଟା ମଧ୍ୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଭୁବନେଶ୍ବରର ଅବତରଣ କରିବେ । ଆଜି ସଂଧ୍ୟାରେ ପ୍ରଧାନମନ୍ତ୍ରୀଙ୍କର ପାର୍ଟି କାର୍ଯ୍ୟାଳୟରେ କାର୍ଯ୍ୟକର୍ତ୍ତାଙ୍କ ସହ ଆଲୋଚନା ରହିଛି । ପ୍ରଧାନମନ୍ତ୍ରୀ ଆଜି ରାତ୍ରିଭବନରେ ରାତ୍ରିଯାପନ କରିବେ ।
- କଡା ସୁରକ୍ଷା ବଳୟରେ ରାଜଧାନୀ:-
ଏହି ସମ୍ମିଳନୀ ପାଇଁ ସୁରକ୍ଷା ବ୍ୟବସ୍ଥା କଡାକଡି କରାଯାଇଛି । ପାଖାପାଖି ୭୨ ପ୍ଲାଟୁନ ରାଜ୍ୟ ପୋଲିସ ସହ ୧୨ କମ୍ପାନୀ ଅର୍ଥାତ୍ ୩୬ ପ୍ଲାଟୁନ କେନ୍ଦ୍ରୀୟ ଫୋର୍ସ ମୁତୟନ ହେବେ । ମୋଟ ୧୦୮ ପ୍ଲାଟୁନ ଫୋର୍ସ ସୁରକ୍ଷା ମୁତୟନ କରାଯାଇଛି । ସେପଟେ ସହରରେ ହାଇ ଆଲର୍ଟ ଜାରି ସହ ଏୟାରପୋର୍ଟ ବସଷ୍ଟାଣ୍ଡ ଓ ରେଳ ଷ୍ଟେସନ୍ ସମେତ ବିଭିନ୍ନ ହୋଟେଲ ଓ ଗେଷ୍ଟ ହାଉସ ଆଦି ଉପରେ ନଜର ରଖିଛି ପୋଲିସ । ଏନେଇ ଦେଶ ବିରୋଧି କାର୍ଯ୍ୟକଳାପ ଓ ଆତଙ୍କୀ କାର୍ଯ୍ୟକଳାପ ବିରୋଧି ପାଇଁ ସ୍ବତନ୍ତ୍ର ଫୋର୍ସ ଓ ଗୁଇନ୍ଦା ଆଧାରରେ ସୁରକ୍ଷା ପ୍ରସ୍ତୁତି ଜାରି ରହିଛି । ଏଥି ସହ ଡଗ-ସ୍କ୍ୱାଡ, ବମ୍ ସ୍କ୍ୱାଡ ଏବଂ ଆଣ୍ଟି ଟେରରିଷ୍ଟ ସ୍କ୍ୱାଡ ମଧ୍ୟ ଆଲର୍ଟ ରହି ସତର୍କତାମୂଳକ ପଦକ୍ଷେପ ନେଉଛି ପୋଲିସ ।
ବ୍ୟୁରୋ ରିପୋର୍ଟ, ଇଟିଭି ଭାରତ
