ନିମାପଡ଼ା /ନିଆଳି /ଭବାନୀପାଟଣା: ରାଜ୍ୟରେ ବାଲି ମାଫିଆଙ୍କ ଦୌରାତ୍ମ୍ୟ କଳା କାରନାମା ବୃଦ୍ଧି ପାଉଛି । ଲୁଟ ହେଉଛି କୋଟି କୋଟି ଟଙ୍କାର ରାଜସ୍ବ । ଆଖିରେ ଯେପରି ଅନ୍ଧପୁଟୁଳି ବାନ୍ଧି ବସିଛି ପ୍ରଶାସନ । ବେଆଇନ ବାଲି ଚାଲାଣକୁ ବିରୋଧ କଲେ ନଦୀ କୂଳିଆ ଗ୍ରାମବାସୀଙ୍କୁ ନାଲି ଆଖି ଦେଖାଉଛନ୍ତି ବାଲି ମାଫିଆ । ଏପରିକି ବୋମା ପକାଇ ଜୀବନରୁ ମାରିବା ପାଇଁ ମଧ୍ୟ ଧମକ ଦେଉଛନ୍ତି । ସେପଟେ ବାଲି ମାଫିଆ ଏବଂ ପ୍ରଶାସନର ମଧୁଚନ୍ଦ୍ରିକା ଯୋଗୁଁ ନଦୀରୁ ବେଆଇନ ବାଲି ଉଠୁଥିବା ଅଭିଯୋଗ କରିଛନ୍ତି ଲୋକେ ।ଏଭଳି ଅଭିଯୋଗ ଆସିଛି କଟକ ଜିଲ୍ଲା ନିଆଳି, ପୁରୀ ଜିଲ୍ଲାର କାକଟପୁର ଏବଂ କଳାହାଣ୍ଡି ଜିଲ୍ଲାରୁ । ଏନେଇ ବେଆଇନ ବାଲି ମାଫିଆଙ୍କ ବିରୋଧରେ ପ୍ରଶାସନ ଦୃଢ କାର୍ଯ୍ୟନୁଷ୍ଠାନ ଗ୍ରହଣ କରିବା ପାଇଁ ଦାବି ହୋଇଛି ।
ବାଲି ଚୋରିକୁ ବିରୋଧ କଲେ ମିଳୁଛି ହତ୍ୟା ଧମକ:
ବାଲି ମାଫିଆଙ୍କ ରାଜକୁ ବିରୋଧ କରି କାକଟପୁର ଥାନା ସମ୍ମୁଖରେ ଧାରଣା ଦେଲେ ଗ୍ରାମବାସୀ । ବାଲିକୂଳ ଗ୍ରାମ ନିକଟ ଦେବୀ ନଦୀ ପଠାରୁ କିଛି ବାଲି ମାଫିଆଙ୍କ ବେଆଇନ ଭାବେ କୋଟି କୋଟି ଟଙ୍କାର ବାଲି ଚୋରା ଚାଲାଣ କରୁଥିବାବେଳେ ଏହାକୁ ବିରୋଧ କଲେ ଜୀବନରୁ ମାରିଦେବାକୁ ଧମକଚମକ ଦେଉଥିବା ଅଭିଯୋଗ କରିଛନ୍ତି ଲୋକେ । ବାଲି ଉଠାଣ ଯୋଗୁଁ ନଦୀରେ ସୃଷ୍ଟି ହେଉଛି ବଡ଼ ବଡ଼ ଗର୍ଭ । ଯାହାକୁ ନେଇ ଆତଙ୍କିତ ଅବସ୍ଥାର ରହିଛନ୍ତି ଭଣ୍ଡିସାହି, ବାଲିକୂଳ, ଡାହାଣିଖିଆ ଗାଁ ବାସିନ୍ଦା ।
ବିଦ୍ୟୁତ୍ କାଟି ବାଲିଚାଲାଣ:
ସେପଟେ ବିଳମ୍ବିତ ରାତ୍ରରେ ବାଲି ମାଫିଆମାନେ ବିଦ୍ୟୁତ କାଟି ବାଲି ଚାଲାଣ କରୁଥିବାବେଳେ ଗ୍ରାମବାସୀ ହାତରେ ଧରା ପଡ଼ିବା ଯୋଗୁଁ ଅପ୍ରୀତିକର ପରିସ୍ଥିତି ସୃଷ୍ଟି ହୋଇଥିଲା । ଏହାପରେ କାକଟପୁର ପୋଲିସ ବାଲିକୂଳ ଗ୍ରାମର କିଛି ବ୍ୟକ୍ତିଙ୍କୁ ଉଠାଇ ଆଣି ଥାନାରେ ଅଟକ ରଖିଛନ୍ତି । ହେଲେ ପୋଲିସର ଏଭଳି ଏକପାଖିଆ କାର୍ଯ୍ୟନୁଷ୍ଠାନରୁ ବିରୋଧ କରି ଥାନା ଘେରାଉ କରିଛନ୍ତି ଲୋକେ । ସ୍ଥାନୀୟ ତହସିଲଦାର ଓ ବିଧାୟକ ପହଞ୍ଚି ବାଲି ଉଠିବା ସ୍ଥାନ ପରିଦର୍ଶନ କରିବା ସହ ଦୋଷୀ ବିରୁଦ୍ଧରେ ଦୃଢ଼ କାର୍ଯ୍ୟାନୁଷ୍ଠାନ ନେବା ପାଇଁ ପ୍ରତିଶ୍ରୁତି ଦେଇଛନ୍ତି । ଏହାପରେ ସେଠାରେ ବାଲି ଉଠାଣ ବନ୍ଦ ରହିଛି । ଏନେଇ କାକଟପୁର ବିଧାୟକ ତୁଷାରକାନ୍ତି ବେହେରା କହିଛନ୍ତି," ବାଲି ମାଫିଆଙ୍କ ସହ ଗ୍ରାମବାସୀଙ୍କ ବଚସା ହୋଇଥିଲା । ସେମାନେ କିଛି ଗ୍ରାମବାସୀଙ୍କୁ ବୋମା ପକାଇ ଉଡ଼େଇ ଦେବାକୁ ଧମକ ଦେଇଛନ୍ତି । ଏ ସମ୍ପର୍କରେ ମୁଁ ପୋଲିସ ପ୍ରଶାସନକୁ ଜଣାଇଛି । "
'କିଏ ଭରିବ ରାଜ୍ୟ ସରକାରଙ୍କ କୋଟି କୋଟି ଟଙ୍କାର ରାଜସ୍ବ'
ଦେବୀ ନଦୀରେ ବେଆଇନ ବାଲିଘାଟ । କଟକ ଜିଲ୍ଲା କଣ୍ଟାପଡ଼ା ଓ ବାରଙ୍ଗ ବ୍ଲକ ଅଞ୍ଚଳରୁ ଆସିଛି ଏଭଳି ସଙ୍ଗୀନ ଅଭିଯୋଗ । ରାଜ୍ୟ ରାଜକୋଷରୁ ଲୁଟ ହୋଇଛି କୋଟି କୋଟି ଟଙ୍କା । ପୂର୍ବ ସରକାର ସମୟରେ ଦେବୀ ନଦୀର ଶଙ୍ଖତ୍ରାସ, ତୀର୍ଥପଡା ପୂର୍ବ ବଡ ଖରମଙ୍ଗା ଏବଂ କୂଳ ଶ୍ରୀବାଲିଘାଟରୁ କୋଟି କୋଟି ଟଙ୍କାର ବାଲି ଲୁଟ ହୋଇଥିବା ଅଭିଯୋଗ କରିଛନ୍ତି ସ୍ଥାନୀୟ ଲୋକଙ୍କ । ମେସିନ ଲଗାଇ ରାତି ଅଧିଆ ବାଲି ଲୁଟ ହେଉଥିବା ବେଳେ ବିରୋଧ କରିଛନ୍ତି ସ୍ଥାନୀୟ ଲୋକେ । ଯାହାକୁ ନେଇ କଣ୍ଟାପଡ଼ା ଓ ବାରଙ୍ଗ ବ୍ଲକ ଅଞ୍ଚଳରେ ଆଇନ ଶୃଙ୍ଖଳା ପରିସ୍ଥିତି ସୃଷ୍ଟି ହୋଇଥିବା ଦେଖିବାକୁ ମିଳିଛି ।
ମାତିଛନ୍ତି ଜିଲ୍ଲା ବାହାର ମାଫିଆ:
ଏନେଇ ସ୍ଥାନୀୟ ଲୋକେ କହିଛନ୍ତିି," ଜିଲ୍ଲା ବାହାର ବାଲି ମାଫିଆମାନେ ଦେବୀ ନଦୀରୁ ରାତି ଅଧରେ ଏକାଧିକ ମେସିନ ସାହାଯ୍ୟରେ ହାଇଓ୍ବା ମାଧ୍ୟମରେ ବାଲି ଲୁଟ କରୁଛନ୍ତି । ବାଲି ଚୋରା ଚାଲାଣ ରୋକିବା ମାଇନ୍ସ ବିଭାଗ ଦାୟିତ୍ବ । କିନ୍ତୁ ଦେବୀ ନଦୀର ବାଲି ଚୋରା ଚାଲାଣ ପାଇଁ ନିୟୋଜିତ ଅଧିକାରୀ ମାନେ ଚଢାଉ କରୁଛନ୍ତି କିନ୍ତୁ ଫଳ ଶୂନ୍ୟ । ମାଇନ୍ସ ବିଭାଗ କଟକ ସହରରେ ରହୁଥିବାବେଳେ କଣ୍ଟାପଡ଼ା ଓ ବାରଙ୍ଗ ବ୍ଲକ ଦେବୀ ନଦୀରୁ ବାଲି ଚୋରି ବଢ଼ୁଛି । ରାଜ୍ୟ ସରକାରଙ୍କ କୋଟି କୋଟି ଟଙ୍କାର ରାଜସ୍ବ ଲୁଟ ହେଉଥିବା ବେଳେ ଏହାକୁ କିଏ ଭରଣା କରିବ ।"
କଳାହାଣ୍ଡିରେ ବାଲିମାଫିଆଙ୍କ ଦୌରାତ୍ମ୍ୟ:
କଳାହାଣ୍ଡି ଜିଲ୍ଲାରେ ଚାଲିଛି ବେଧଡ଼କ ବେଆଇନ ବାଲି ଚୋରା ଚାଲାଣ । ବର୍ଷା ଦିନ ଆସିବାରୁ ତରବରିଆ ଭାବେ ତୁକେଲ ବାଲିଘାଟ ଏବଂ ଲିଜ୍ ଅଞ୍ଚଳ ବାହାରୁ ମଧ୍ୟ ଉଠୁଛି ବାଲି । ସରକାରୀ ନିୟମକୁ ଫୁ କରି ହରିଲୁଟ କରୁଛନ୍ତି ମାଫିଆ । ବିନା ଇ-ପାସ୍ରେ ଶହ ଶହ ବାଲି ବୋଝେଇ ହାଇୱା ପ୍ରତିଦିନ ରାସ୍ତାରେ ଗଡୁଛି । ଯାହାକୁ ବିରୋଧ କରିଛନ୍ତି ସ୍ଥାନୀୟ ଲୋକେ । ସେପଟେ ବିଭାଗ କହୁଛି ସବୁ ଅନ୍ଲାଇନ ହେଉଛି । ସେପଟେ ତୁକେଲ ବାଲିଘାଟ ନିକଟରେ ଏକ ବ୍ରିଜ ରହିଥିବାବେଳେ ବ୍ରିଜ ନିକଟରୁ ବାଲି ଉଠାଇବା ବ୍ରିଜର ଭବିଷ୍ୟତ ଉପରେ ପ୍ରଶ୍ନବାଚୀ ସୃଷ୍ଟି କରିଛି । ଏହାସହ ବାଲିଘାଟ ଯୋଗୁଁ ଅନେକ ଲୋକଙ୍କ ଫସଲ ନଷ୍ଟ ହେଉଥିବା ଅଭିଯୋଗ ହୋଇଛି । ଲିଜ୍ ଅଞ୍ଚଳ ବାହାରେ ବାଲି ଉଠିବା ସମ୍ପର୍କରେ ଖଣି ଉପନିର୍ଦ୍ଦେଶକ ବିଶ୍ବନାଥ ସୋରେନଙ୍କୁ ପଚାରିବାରୁ ସେ କହିଛନ୍ତି, ‘ଅଭିଯୋଗ ହେଲେ ପଦକ୍ଷେପ ନିଆଯିବ ।’
ଇଟିଭି ଭାରତ,ନିମାପଡ଼ା /ନିଆଳି /କଳାହାଣ୍ଡି
