ପୁରୀ: ବିଶ୍ୱପ୍ରସିଦ୍ଧ ରଥଯାତ୍ରା ପାଖେଇ ଆସୁଥିବା ବେଳେ ଜୋରସୋରରେ ଆଗେଇ ଚାଲିଛି ରଥ ନିର୍ମାଣ କାର୍ଯ୍ୟ । ତିନି ରଥର 42 ଚକରୁ 24ଟି ଚକ ନିର୍ମାଣ ଶେଷ ହୋଇଛି । ଭଉଁରୀ ତିଥିରେ ତିନି ରଥର ଚକ-ଅଖ ସଂଯୋଗ ପୂର୍ବକ ଚକ ଡେରା ନୀତି ସମ୍ପନ୍ନ ହୋଇଥିଲା । ଏଥିସହ ତିନି ରଥର ମୋଟ ୪୨ଟି ଚକ ମଧ୍ୟରୁ ୨୪ଟି ଚକ ନିର୍ମାଣ ଶେଷ ହୋଇଛି । ଭୋଇ ସର୍ଦ୍ଦାର ରବି ଭୋଇଙ୍କ ନେତୃତ୍ବରେ ତିନି ରଥର ଭୋଇ ସେବକମାନେ ନିର୍ମାଣ କାର୍ଯ୍ୟ ଶେଷ ହୋଇଥିବା ଚକ ଗୁଡ଼ିକୁ ଆଣି ବାହାର ରଥ ଖଳାଠାରେ ସାଇତିଛନ୍ତି ।
ରଥ ଅମିନ ତିନି ରଥର ନିରାଡି ନିର୍ମାଣ ପାଇଁ ପ୍ରତି ଚାଳିକୁ ଚାରୋଟି ଲେଖାଏଁ ୨୦ ଫୁଟିଆ ଧଉରା କାଠ ଭୋଇ ସେବକଙ୍କ ସହାୟତାରେ ଯୋଗାଇ ଦେଇଛନ୍ତି । ଏଥିସହ ଅଖ ନିର୍ମାଣ ପାଇଁ ଆଉ ଦୁଇଟି ଲେଖାଏଁ ନାହାକା ଅଖ କାଠ ଯୋଗାଇଥିଲେ । ତିନିରଥର ମହାରଣା ସେବକମାନେ ନିରାଡ଼ି କାଠର ଚଉପଟ କାର୍ଯ୍ୟ କରିବା ସହ ନାହାକ ଅଖର ଉଭୟ ପାର୍ଶ୍ଵ ଗୋଲେଇ କାର୍ଯ୍ୟ ଜାରି ରଖିଛନ୍ତି ।
ତାଳଧ୍ଵଜ ରଥର ମୋଟ ୧୪ଟି ଚକରୁ ୮ଟି ଚକ ନିର୍ମାଣ ଶେଷ ହୋଇଛି । ଏଥିସହ ନବମ ଏବଂ ଦଶମ ତୁମ୍ବରେ ସିଙ୍ଗଡ଼ା ବାଡିଆ ଶେଷ ହୋଇ ଅଖ ବିନ୍ଧ ପରେ ଅର କଟା ଯାଇ ଅର ସାଲ କାର୍ଯ୍ୟ ଜାରି ରହିଛି । ଏହାଛଡା ତାଳଧ୍ଵଜ ରଥର ଚାରୋଟି ନିରାଡି କାଠର ଚଉପଟ କାର୍ଯ୍ୟ ତାଳଧ୍ଵଜ ମହାରଣା ମାନେ ଜାରି ରଖିଛନ୍ତି । ସେହିପରି ଦର୍ପ ଦଳନ ରଥର ୭ଗୋଟି ଚକର ନିର୍ମାଣ ଶେଷ ହୋଇଛି । ଆଉ ତିନୋଟି ଚକ ନିର୍ମାଣ ପାଇଁ ତୁମ୍ବରେ ଅର ସଂଯୋଗ ବା ସିଙ୍ଗଡ଼ା ବାଡିଆ ଯାନ୍ତାଗାଡଠାରେ ଶେଷ ହେବାପରେ ଅଖ ବିନ୍ଧ ହୋଇ ମାପ ପ୍ରକାରେ ବଳକା ଅର କଟାଯିବା ଶେଷ ହୋଇଛି । ପଇ ବିନ୍ଧ କାର୍ଯ୍ୟ ଶେଷ ପର୍ଯ୍ୟାୟରେ ପହଞ୍ଚିଛି । ଏଥିସହ ଦର୍ପଦଳନ ରଥର ଆଉ ଦୁଇଟି ନାହାକ ଅଖର ଦୁଇ ପାର୍ଶ୍ଵ ଗୋଲେଇ କାର୍ଯ୍ୟ ସହ ଚାରି ଗୋଟି ନୀରାଡି କାଠର ଚଉପଟ କାର୍ଯ୍ୟ ଜାରି ରହିଛି ।
