ଭୁବନେଶ୍ବର: ରେଳ ମନ୍ତ୍ରଣାଳୟ ପକ୍ଷରୁ ବଡ଼ ଘୋଷଣା । ଟିଟିଲାଗଡ ରେଳ ଫ୍ଲାଏ ଓଭର ନିର୍ମାଣ ପାଇଁ 183.89 କୋଟି ଟଙ୍କା ମଞ୍ଜୁର ଦେଲା ରେଳ ମନ୍ତ୍ରଣାଳୟ । ଟିଟିଲାଗଡଠାରେ ସମସ୍ତ ପାର୍ଶ୍ୱରୁ ଟ୍ରେନର ଏକକାଳୀନ ଚଳାଚଳକୁ ସହଜ କରିବା ପାଇଁ ଏହି ପଦକ୍ଷେପ ନିଆଯାଇଛି । ଟିଟିଲାଗଡଠାରେ ଏକ ରେଳ ପ୍ଲାଏ ଓଭର ବ୍ରିଜକୁ ନେଇ ବହୁଦିନରୁ ଦାବି ହୋଇଆସୁଥିଲା ।
ପୂର୍ବତଟ ରେଳପଥର ସମ୍ବଲପୁର ରେଳ ମଣ୍ଡଳ ଅନ୍ତର୍ଗତ ଟିଟିଲାଗଡ ଜଙ୍କସନ ଷ୍ଟେସନରେ ବୃଦ୍ଧି ପାଉଥିବା ରେଳ ଚଳାଚଳ ଏବଂ ଯାତାୟାତକୁ ଦୃଷ୍ଟିରେ ରଖି ରାୟପୁର-ବିଜୟନଗରମ, ଟିଟିଲାଗଡ-ସମ୍ବଲପୁର ଓ ସମ୍ବଲପୁର-ରାୟପୁର ରେଳ ସେକ୍ସନରେ ଟ୍ରେନ ଚଳାଚଳକୁ ସୁଗମ କରିବା ପାଇଁ ରେଳ ମନ୍ତ୍ରଣାଳୟ ଏକ ଗୁରୁତ୍ୱପୂର୍ଣ୍ଣ ଭିତ୍ତିଭୂମି ପ୍ରକଳ୍ପକୁ ଅନୁମତି ଦେଇଛି । ଏନେଇ ବ୍ୟୟ ବାବଦରେ ଅର୍ଥ ମଞ୍ଜୁର ମଧ୍ୟ କରିଛି । ଭାରତୀୟ ରେଳବାଇର ଶକ୍ତି କରିଡର ସ୍କିମ୍ ଅଧୀନରେ କାର୍ଯ୍ୟକାରୀ ହେବାକୁ ଥିବା ଏହି ପ୍ରକଳ୍ପ, ବ୍ୟସ୍ତବହୁଳ ରେଳ ସେକ୍ସନରେ ଟ୍ରେନ୍ ଚଳାଚଳର ଦକ୍ଷତା ଏବଂ ଦକ୍ଷତା ବୃଦ୍ଧି ଦିଗରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ବହନ କରୁଛି ।
ଏହା ମଧ୍ୟ ପଢ଼ନ୍ତୁ.. ଓଡ଼ିଶାରେ ୨ ନୂଆ ରେଳ ପ୍ରକଳ୍ପ ଘୋଷଣା କଲେ ଅଶ୍ବିନୀ ବୈଷ୍ଣବ
2023-24ରେ ଲାଇନ୍ କ୍ଷମତା ବିବରଣୀ ଅନୁଯାୟୀ ଏହିପରି କ୍ରସ୍ ଗତିବିଧି ସଂଖ୍ୟା ଦୈନିକ ହାରାହାରି 38ଟି ଟ୍ରେନ ବୋଲି ଆକଳନ କରାଯାଇଛି । ଏତେ ସଂଖ୍ୟକ କ୍ରସ୍ ଜନିତ ପ୍ରତିବନ୍ଧକ ଟ୍ରେନ୍ ଅପରେସନ୍ ସିଷ୍ଟମରେ ସାମଗ୍ରିକ ଗତିଶୀଳତାକୁ ପ୍ରଭାବିତ କରିଆସୁଛି । କେବଳ ଟିଟିଲାଗଡରେ ନୁହେଁ ବରଂ ପାଖାପାଖି ଷ୍ଟେସନ ମାନଙ୍କରେ ମଧ୍ୟ ଟ୍ରେନ୍ ଟ୍ରାଫିକ୍ ପ୍ରଭାବିତ ହୋଇ ଅଟକ ରଖାଯାଇଥାଏ । ଏହି ପ୍ରତିବନ୍ଧକ ଜନିତ ସମସ୍ୟା ଏଡ଼ାଇବା ପାଇଁ ରେଳ ମନ୍ତ୍ରଣାଳୟ 8.11 କିମି ଦୈର୍ଘ୍ୟ ଏକ ଫ୍ଲାଏଓଭର ନିର୍ମାଣ ପାଇଁ 183.89 କୋଟି ଟଙ୍କା ମଞ୍ଜୁର କରିଛି । ଯାହାକି ଏହି ଫ୍ଲାଏଓଭର ଅନ୍ୟ ଲାଇନଗୁଡିକ ଅତିକ୍ରମ ନକରି ଟିଟିଲାଗଡରୁ ବିଜୟନଗରମ, ରାୟପୁର ଏବଂ ସମ୍ବଲପୁର ଦିଗରୁ ଟ୍ରେନ୍ ଚଳାଚଳ ପାଇଁ ଏକ ଉତ୍ସର୍ଗୀକୃତ ଭିତ୍ତିଭୂମି ଯୋଗାଇ ବୃଦ୍ଧିପାଉଥିବା ଟ୍ରେନ୍ ଟ୍ରାଫିକ୍ ସମସ୍ୟାର ସମାଧାନ କରିବାକୁ ଲକ୍ଷ୍ୟ ରଖିଛି ।
ଫ୍ଲାଏ ଓଭର 183.89 କୋଟି ଟଙ୍କା ଅନୁମୋଦିତ ମୂଲ୍ୟରେ ନିର୍ମାଣ ହେବାକୁ ଥିବା ବେଳେ ଫ୍ଲାଏଓଭର ଦୈର୍ଘ୍ୟ 8.11 କିଲୋମିଟର ହେବ । ଏହା ରାୟପୁର, ବିଜୟନଗରମ୍ ଏବଂ ସମ୍ବଲପୁର ଦିଗରୁ / ଦିଗକୁ ଚଳାଚଳ କରୁଥିବା ଟ୍ରେନ୍ ମାନଙ୍କର ଯାତାୟତକୁ ସୁଗମ କରିବ । ଏହି ନିର୍ମାଣ ଭାରତୀୟ ରେଳବାଇର ଶକ୍ତି କରିଡରର ଏକ ଅଂଶ ହେବ । ସ୍ଥାୟୀ ଏବଂ ଦକ୍ଷ ଭିତ୍ତିଭୂମି ବିକାଶ ପାଇଁ ଏକ ପ୍ରତିବଦ୍ଧତା ପ୍ରଦର୍ଶନ କରିବ । ନୂତନ ଫ୍ଲାଇଓଭର ଟିଟିଲାଗଡ଼ ଷ୍ଟେସନ ଠାରେ କ୍ରସିଂ ଜନିତ ଗତିବିଧି ପ୍ରତିବନ୍ଧକକୁ ଦୂର କରିବା ସହିତ ଉଭୟ ରାୟପୁର-ବିଜୟନଗରମ ମୁଖ୍ୟ ଲାଇନକୁ ଉନ୍ନତ କରିବ । ଟିଟିଲାଗଡ-ସମ୍ବଲପୁର ଲାଇନରେ ଟ୍ରେନର ହାରାହାରି ଗତି ଏବଂ କାର୍ଯ୍ୟକ୍ଷମତାକୁ ଉନ୍ନତ କରିବ ।
ବାଧା ଦୂର କରାଇ ସହଜ ସାଧ୍ୟ କରାଯିବ
ଏହି ବ୍ୟସ୍ତବହୁଳ ଜଙ୍କସନ ମଧ୍ୟ ଦେଇ ଚଳାଚଳ କରୁଥିବା ଟ୍ରେନ୍ ଗୁଡିକର ଅପେକ୍ଷା ସମୟକୁ ଯଥେଷ୍ଟ ହ୍ରାସ କରି ମେନ୍ ଲାଇନ୍ ଟ୍ରେନ୍ ଗୁଡିକ ଟିଟିଲାଗଡ ଷ୍ଟେସନରେ ଆଉ ଅଟକ ରଖାଯିବ ନାହିଁ । ବିଭିନ୍ନ ଟ୍ରେନ୍ ଚଳାଚଳକୁ ନିୟନ୍ତ୍ରଣ କରୁଥିବା ଟିଟିଲାଗଡ ରେଳ ଷ୍ଟେସନ ଏକ ପ୍ରମୁଖ ସଂଯୋଗ ଅଟେ । ଏହି ଫ୍ଲାଏ ଓଭରର ନିର୍ମାଣ ବିଜୟନଗରମ, ସମ୍ବଲପୁର ଏବଂ ରାୟପୁରରୁ ଆସୁଥିବା କିମ୍ବା ସେହି ଦିଗକୁ ଯାତ୍ରା କରୁଥିବା ଟ୍ରେନର ଚଳାଚଳକୁ ସହଜ କରିବ ।
ଇଟିଭି ଭାରତ, ଭୁବନେଶ୍ବର
