ପୁରୀ: ଶ୍ରୀମନ୍ଦିର ରତ୍ନଭଣ୍ଡାରର ଯାଞ୍ଚ ପ୍ରକ୍ରିୟା ଶେଷ । ରତ୍ନଭଣ୍ଡାରରୁ ବାହାରିଲେ ଏଏସଆଇ ଓ ବୈଷୟିକ ଟିମ୍ । ଯାଞ୍ଚ କରି ବାହାରିଲେ ୨୬ ଜଣିଆ ଟିମ୍ । ଏଏସଆଇ ଏଡିଜିଙ୍କ ନେତୃତ୍ବରେ ଶେଷ ହେଲା ଯାଞ୍ଚ । ଏଏସଆଇ ପକ୍ଷରୁ କରାଗଲା ଲେଜର ସ୍କାନିଂ । ରତ୍ନଭଣ୍ଡାରରେ ଆଉ କିଛି ଅଛି କି ନାହିଁ ଏହାର ତଦାରଖ କଲେ ଟିମ୍ । ସୂଚନା ଦେଲେ ଶ୍ରୀମନ୍ଦିର ମୁଖ୍ୟ ପ୍ରଶାସକ ଜଷ୍ଟିସ ବିଶ୍ବନାଥ ରଥ ।
ପ୍ରାରମ୍ଭିକ ଯାଞ୍ଚ କାର୍ଯ୍ୟ ହେବ:
ଏଏସଆଇ ଓଡିଶାର ଅଧିକ୍ଷକ ଡି.ବି. ଗଡ଼ନାୟକ ପ୍ରତିକ୍ରିୟା ଦେଇ କହିଛନ୍ତି, "ଏଏସଆଇ ଟିମ୍ ପକ୍ଷରୁ ପ୍ରାରମ୍ଭିକ ଯାଞ୍ଚ କାର୍ଯ୍ୟ ହେବ । ଆଜି ରତ୍ନଭଣ୍ଡାରର ଲେଜର୍ ସ୍କାନିଂ କରାଯିବ । ବିଶେଷଜ୍ଞଙ୍କ ନିର୍ଦ୍ଦେଶ ଅନୁଯାୟୀ, ଏହି କାର୍ଯ୍ୟ ଅନୁଷ୍ଠିତ ହେବ । ପ୍ରାରମ୍ଭିକ ଯାଞ୍ଚ ପରେ ଜଣାପଡ଼ିବ ଲେଜର ସ୍କାନିଂ କିଭଳି କରାଯିବ, କେଉଁ ପ୍ରକାର ମେସିନରେ ଏହି କାର୍ଯ୍ୟ ହୋଇ ପାରିବ । ଏଏସଆଇ ଏଡିଜି କନ୍ଜରଭେସନ, ଡାଇରେକ୍ଟର କନ୍ଜରଭେସନ, ରିଜିଓନାଲ ଡାଇରେକ୍ଟର ବରିଷ୍ଠ ବୈଜ୍ଞାନିକ ଅଛନ୍ତି । ପ୍ରାରମ୍ଭିକ ଯାଞ୍ଚ ପରେ ଯାହା କିଛି ତଥ୍ୟ ମିଳିବ ସେ ଅନୁଯାୟୀ ପରବର୍ତ୍ତୀ କାର୍ଯ୍ୟ ଆଗେଇବ ।"
ସେପଟେ ଜଗନ୍ନାଥପ୍ରେମୀ ଦେବ ପ୍ରଧାନ ପ୍ରତିକ୍ରିୟା ଦେଇ କହିଛନ୍ତି, "ରତ୍ନଭଣ୍ଡାର ମରାମତି, ରତ୍ନଭଣ୍ଡାର ଯାଞ୍ଚ ସହିତ ରତ୍ନ ଅଳଙ୍କାର ଗଣତି କାର୍ଯ୍ୟ କିଭଳି ସୁରୁଖୁରୁରେ ହୋଇ ପାରିବ ଭକ୍ତ ତାହା ଅପେକ୍ଷାରେ ଅଛନ୍ତି । ରତ୍ନଭଣ୍ଡାରର ଯାଞ୍ଚ ଠିକରେ କରାଯାଉ । କେଉଁଠି ଅସୁବିଧା ଅଛି ତାକୁ ଚିହ୍ନଟ କରାଯାଇ ମରାମତି କରାଯାଉ । ପୂର୍ବରୁ ରାଜା ମହାରାଜାମାନେ ଅନେକ ଧନରତ୍ନ ଆଣି ମହାପ୍ରଭୁଙ୍କୁ ଅର୍ପଣ କରିଥିଲେ । ତାହା ରତ୍ନଭଣ୍ଡାରରେ ଗୁପ୍ତ କୋଠରୀରେ ଥାଇପାରେ ବୋଲି ଜଗନ୍ନାଥ୍ ପ୍ରେମୀ ସନ୍ଦେହ କରୁଛନ୍ତି । ଏଏସଆଇ ତାହାର ସଠିକ୍ ଯାଞ୍ଚ କରିବା ଉଚିତ । ରାଜ୍ୟ ସରକାର ମଧ୍ୟ ରତ୍ନଭଣ୍ଡାରରେ ଗୁପ୍ତ କୋଠରୀ ଅଛିକି ନାହିଁ ତାହା ସ୍ପଷ୍ଟ କରିବା ଉଚିତ୍ । ଅସୁରକ୍ଷିତ ଥିବା ରତ୍ନଭଣ୍ଡାରର ସୁରକ୍ଷା ପାଇଁ ଆବଶ୍ୟକ ପଦକ୍ଷେପ ନିଆଯାଉ ।"
ସାଧାରଣ ଦର୍ଶନ ବନ୍ଦ:
SOP ଅନୁସାରେ, ଆଜି ଭୋର 2ଟା 50 ମିନିଟରେ ଦ୍ଵାର ଫିଟା ନୀତି ଅନୁଷ୍ଠିତ ହୋଇଥିଲା । ଏହି ସମୟରେ ନିଜେ ମୁଖ୍ୟ ପ୍ରଶାସକ ଉପସ୍ଥିତ ରହି ନୀତି ତ୍ୱରାନ୍ୱିତ କରିଥିଲେ । ଆଜିର ବିଶେଷ ନୀତି ନିର୍ଘଣ୍ଟ ଅନୁସାରେ ଦିନ ୧ଟାରୁ ନିରୀକ୍ଷଣ କାର୍ଯ୍ୟ ଶେଷ ହେବା ପର୍ଯ୍ୟନ୍ତ ସର୍ବସାଧାରଣ ଦର୍ଶନ ବନ୍ଦ ରହିବ । ମହାପ୍ରସାଦ କ୍ରୟ କରିବାକୁ ଇଚ୍ଛୁକ ଭକ୍ତ ସିଂହଦ୍ଵାର ପଟେ ବାଇଶୀ ପାହାଚ ଦେଇ ଆନନ୍ଦ ବଜାରରୁ ମହାପ୍ରସାଦ କ୍ରୟ କରି ଉତ୍ତର ଦ୍ୱାର ପଟେ ଉକ୍ତ ସମୟରେ ପ୍ରସ୍ଥାନ କରିପାରିବେ ।
ନିରୀକ୍ଷଣରେ କିଏ ହେବେ ସାମିଲ ?
ଆଜିର ନିରୀକ୍ଷଣରେ ASI ଏବଂ ଶ୍ରୀମନ୍ଦିର ପ୍ରଶାସନର 26 ଜଣିଆ ମିଳିତ ଟିମ୍ ସାମିଲ ହେବେ । ଏଥିସହିତ ରତ୍ନଭଣ୍ଡାର ମଧ୍ୟରେ ବୈଜ୍ଞାନିକ ସର୍ବେକ୍ଷଣ କରିବାକୁ ବିଭିନ୍ନ ଯନ୍ତ୍ରପାତି ନେବାକୁ ASIକୁ ସର୍ତ୍ତମୂଳକ ଅନୁମତି ପ୍ରଦାନ କରାଯାଇଛି । ପ୍ରଥମତଃ ଏହି ସର୍ବେକ୍ଷଣ ସମ୍ପର୍କିତ ଉତ୍ତୋଳନ ହେଉଥିବା ଚିତ୍ର କିମ୍ବା ଭିଡିଓ କେବଳ ବୈଜ୍ଞାନିକ ଅନୁସନ୍ଧାନ ସକାଶେ ବ୍ୟବହାର କରାଯିବ, ଏହା କୌଣସି ମିଡିଆ କିମ୍ବା ସୋସିଆଲ ମିଡିଆରେ ପ୍ରସାରିତ ହେବ ନାହିଁ । ଦ୍ବିତୀୟତଃ ବୈଜ୍ଞାନିକ ଯନ୍ତ୍ରପାତି ନେବା ବା ବ୍ୟବହାର ସମୟରେ ଶ୍ରୀମନ୍ଦିର ସଂସ୍କୃତି ଓ ପରମ୍ପରାକୁ ମଧ୍ୟ ସମ୍ମାନ ପ୍ରଦାନ କରାଯିବାକୁ ସର୍ତ୍ତ ରଖାଯାଇଛି ।
ଏହା ବି ପଢନ୍ତୁ...୧୮ରେ ରତ୍ନଭଣ୍ଡାର ଯାଞ୍ଚ, ଶ୍ରୀମନ୍ଦିର ପ୍ରଶାସନକୁ ASIର ସୂଚନା - ASI to Inspect Ratnabhandar |
ଶୀଘ୍ର ମରାମତି ପାଇଁ ମୁଖ୍ୟ ପ୍ରଶାସକଙ୍କ ଅନୁରୋଧ:
ମରାମତି ପୂର୍ବରୁ ଅତ୍ୟାଧୁନିକ ଜ୍ଞାନକୌଶଳ ବ୍ୟବହାର କରି ସର୍ଭେ କରାଯିବାକୁ ଅନୁରୋଧ କରାଯାଇଥିଲା । ଏହାଦ୍ବାରା ଯେପରି ଶ୍ରୀମନ୍ଦିର ଉପରେ କୌଣସି ପ୍ରତିକୂଳ ପ୍ରଭାବ ନପଡିବ ସେଥିପ୍ରତି ଧ୍ୟାନ ଦେବାକୁ ଏଏସଆଇକୁ ଅନୁରୋଧ କରାଯାଇଥିଲା । ପୂର୍ଣାଙ୍ଗ ଅତ୍ୟାଧୁନିକ ତଥା ବୈଷୟିକ ଯାଞ୍ଚ ପରେ ଏଏସଆଇ ରତ୍ନଭଣ୍ଡାରର ସଂରକ୍ଷଣ ଓ ମରାମତି କାର୍ଯ୍ଯ ଅବିଳମ୍ବେ ସାରିବାକୁ ମୁଖ୍ୟ ପ୍ରଶାସକ ଡକ୍ଟର ଅରବିନ୍ଦ ପାଢୀ ଅନୁରୋଧ କରିଛନ୍ତି ।
ଇଟିଭି ଭାରତ, ପୁରୀ
