ପୁରୀ: ପୂର୍ବତନ ପୁରୀ ଜିଲ୍ଲାପାଳ ଅରବିନ୍ଦ ଅଗ୍ରୱାଲଙ୍କ ଅଡ଼ୁଆ ବଢିଲା । 2018 ମସିହାରେ ପୁରୀର ତତ୍କାଳୀନ ଜିଲ୍ଲାପାଳ ଅରବିନ୍ଦ ଅଗ୍ରୱାଲଙ୍କୁ ଗିରଫ ଦାବିରେ ପୁରୀ ସିଂହଦ୍ଵାର ଥାନାରେ ଦିଆଯାଇଛି ଏତଲା । ଶ୍ରୀମନ୍ଦିର ରତ୍ନଭଣ୍ଡାରର ଡୁପ୍ଲିକେଟ୍ ଚାବି ମିଳିବା ନେଇ ସେ ମିଛ କଥା କହିଥିବାରୁ ତତ୍କାଳୀନ ପୁରୀ ଜିଲ୍ଲାପାଳ ଅରବିନ୍ଦ ଅଗ୍ରୱାଲଙ୍କୁ ଗିରଫ ଦାବି କରିଛି ପୁରୀର ଜଗନ୍ନାଥ ସେନା । ଏନେଇ ସଂଗଠନ ପକ୍ଷରୁ ଆଇଏଏସ୍ ଅଧିକାରୀ ଅରବିନ୍ଦ ଅଗ୍ରୱାଲଙ୍କ ନାଁରେ ପୁରୀ ସିଂହଦ୍ଵାର ଥାନାରେ ଏତଲା ଦିଆଯାଇଛି । ଅନ୍ୟପଟେ ତତ୍କାଳୀନ ଜିଲ୍ଲାପାଳଙ୍କୁ ତଦନ୍ତ ପରିସରଭୁକ୍ତ କରିବାକୁ ମହାପ୍ରଭୁ ଜଗନ୍ନାଥଙ୍କ ମୁଖ୍ୟ ବାଡ଼ଗ୍ରାହୀ ଜଗନ୍ନାଥ ସ୍ବାଇଁ ମହାପାତ୍ର ମଧ୍ୟ ଦାବି କରିଛନ୍ତି ।
'ଦେଶଦ୍ରୋହ ମାମଲା ରୁଜୁ ହେଉ':-
ଜଗନ୍ନାଥ ସେନାର ଆବାହକ ପ୍ରିୟଦର୍ଶନ ପଟ୍ଟନାୟକ କହିଛନ୍ତି, "ତତ୍କାଳୀନ ଜିଲ୍ଲାପାଳ ଅରବିନ୍ଦ ଅଗ୍ରୱାଲ ଯେଉଁ ଡୁପ୍ଲିକେଟ୍ ଚାବି ଥିବା କଥା କହିଥିଲେ, ତାହା ମିଛ ପ୍ରମାଣିତ ହୋଇଛି । ସେହି ଚାବିରେ ଭିତର ରତ୍ନଭଣ୍ଡାର ତାଲା ଖୋଲିଲା ନାହିଁ । ତେଣୁ ରତ୍ନଭଣ୍ଡାର ଖୋଲିବା ପାଇଁ ଯାଇଥିବା କମିଟି ଭିତର ରତ୍ନଭଣ୍ଡାର ତାଲା ଭାଙ୍ଗିଲେ । କେବଳ ସେତିକି ନୁହେଁ, ଭିତର ରତ୍ନଭଣ୍ଡାରରେ ପଡ଼ିଥିବା ତିନୋଟି ତାଲାରୁ କେବଳ ଗୋଟିଏ ତାଲା ସିଲ୍ ଥିଲା । ଅନ୍ୟ ତାଲା ସିଲ୍ ନଥିଲା । ଏଣୁ ରତ୍ନଭଣ୍ଡାରରୁ ରତ୍ନ ଲୁଟ୍ ହୋଇଥିବା ଜଗନ୍ନାଥ ସେନା ଯେଉଁ ଅଭିଯୋଗ କରିଆସିଛି, ତାହା ସତ୍ୟ । ତେଣୁ ତତ୍କାଳୀନ ଜିଲ୍ଲାପାଳ ଅରବିନ୍ଦ ଅଗ୍ରୱାଲଙ୍କୁ ଗିରଫ କରାଯାଇ ତୁରନ୍ତ ତଦନ୍ତ ପରିସରଭୁକ୍ତ କରାଯାଉ । ସେ ରତ୍ନଭଣ୍ଡାରର ଡୁପ୍ଲିକେଟ୍ ଚାବି ଥିବା କଥା କାହିଁକି ମିଛରେ କହିଲେ ? କାହା ସ୍ବାର୍ଥରେ କହିଲେ ? କାହାକୁ ସେ ସୁରକ୍ଷା ଦେଇଥିଲେ ? ସେସବୁର ତଦନ୍ତ ହେଉ । ସେହିପରି କୋଟି କୋଟି ଭକ୍ତଙ୍କୁ ତତ୍କାଳୀନ ଜିଲ୍ଲାପାଳ ମିଛ କହିଥିବାରୁ ତାଙ୍କ ନାମରେ ଦେଶଦ୍ରୋହ ମାମଲା ରୁଜୁ ହେଉ । ସମଗ୍ର ଘଟଣାର ତଦନ୍ତ କରାଯାଇ ଦୋଷୀଙ୍କ ବିରୋଧରେ କଡ଼ା କାର୍ଯ୍ୟନୁଷ୍ଠାନ ହେବ ବୋଲି ବିଜେପି ସରକାର କହିଛି ।" ତେଣୁ ଏହାର ତଦନ୍ତ ନହେଲେ ପୂର୍ବ ବିଜେଡି ସରକାର ଅବସ୍ଥା ବିଜେପି ଭୋଗିବ ବୋଲି ଜଗନ୍ନାଥ ସେନା ଚେତାବନୀ ଦେଇଛି ।
'ଅରବିନ୍ଦ ଅଗ୍ରୱାଲଙ୍କୁ ତଦନ୍ତ ପରିସରଭୁକ୍ତ କରାଯାଉ':-
ଶ୍ରୀମନ୍ଦିର ରତ୍ନଭଣ୍ଡାର ଡୁପ୍ଲିକେଟ୍ ଚାବି ପ୍ରସଙ୍ଗରେ ମୁହଁ ଖୋଲିଛନ୍ତି ମହାପ୍ରଭୁ ଜଗନ୍ନାଥଙ୍କ ମୁଖ୍ୟ ବାଡ଼ଗ୍ରାହି ଜଗନ୍ନାଥ ସ୍ବାଇଁ ମହାପାତ୍ର । ଡୁପ୍ଲିକେଟ ଚାବି ସମ୍ପୂର୍ଣ୍ଣ ମିଛ ଓ ମୂଳ ଚାବିକୁ ହଜେଇ ଦିଆଯାଇଛି ବୋଲି ସେ ଅଭିଯୋଗ କରିଛନ୍ତି । ତେଣୁ ତତ୍କାଳୀନ ଜିଲ୍ଲାପାଳ ଅରବିନ୍ଦ ଅଗ୍ରୱାଲଙ୍କୁ ତଦନ୍ତ ପରିସରଭୁକ୍ତ କରିବାକୁ ଦାବି କରିଛନ୍ତି ଜଗନ୍ନାଥ ସ୍ବାଇଁ ମହାପାତ୍ର । ଭିତର ରତ୍ନଭଣ୍ଡାରର ତିନୋଟି ତାଲା ମଧ୍ୟରୁ ଦୁଇଟି ସିଲ ନଥିବାରୁ ରତ୍ନଭଣ୍ଡାରରେ କୌଣସି ଏପଟସେପଟ ହୋଇଥିବା ଆଶଙ୍କା କରିଛନ୍ତି ମହାପ୍ରଭୁଙ୍କ ମୁଖ୍ୟ ବାଡ଼ଗ୍ରାହି । ଅନ୍ୟପଟେ ମହାପ୍ରଭୁଙ୍କ ବହୁଦୁର୍ଲଭ ରଘୁନାଥ ବେଶ ଅନୁଷ୍ଠିତ କରିବା ପାଇଁ ରାଜ୍ୟସରକାରଙ୍କୁ ଅନୁରୋଧ କରିଛନ୍ତି ମହାପ୍ରଭୁଙ୍କ ମୁଖ୍ୟ ବାଡ଼ଗ୍ରାହି ଜଗନ୍ନାଥ ସ୍ବାଇଁ ମହାପାତ୍ର ।
ଇଟିଭି ଭାରତ, ପୁରୀ
