ରାଇରଙ୍ଗପୁର: ଓଡ଼ିଶା ଆସୁଛନ୍ତି ମହାମହିମ ରାଷ୍ଟ୍ରପତି ଦ୍ରୌପଦୀ ମୁର୍ମୁ । ରାଷ୍ଟ୍ରପତି ହେବା ପରେ ୪ର୍ଥ ଥର ପାଇଁ ଆସନ୍ତା ୨୩ ତାରିଖରେ ମୟୂରଭଞ୍ଜ ଆସୁଛନ୍ତି ରାଷ୍ଟ୍ରପତି । ଯାହାକୁ ନେଇ ଜନ୍ମ ମାଟି ରାଇରଙ୍ଗପୁର ଉପଖଣ୍ଡରେ ଜୋରଦାର ପ୍ରସ୍ତୁତି ଚାଲିଥିବାବେଳେ ରାଇରଙ୍ଗପୁରର ମହିଳା ମହାବିଦ୍ୟାଳୟରେ ମ୍ୟାଡମ ପ୍ରେସିଡେଣ୍ଟଙ୍କ ଭିଜିଟ୍ ଥିବାରୁ ସେଠାରେ ମଧ୍ୟ ଚାଲିଛି ଜୋରଜୋର ପ୍ରସ୍ତୁତି । ସମୟ ଯେତିକି ପାଖେଇ ପାଖେଇ ଆସୁଛି କଲେଜ କର୍ତ୍ତୃପକ୍ଷ, ଅଧ୍ୟାପକ ଅଧ୍ୟାପିକା ଓ ଛାତ୍ରୀମାନଙ୍କ ମଧ୍ୟରେ ଉତ୍ସାହ ପ୍ରବଳ ହେବାରେ ଲାଗିଛି । ସେପଟେ 23 ତାରିଖରେ ବାତ୍ୟା ନେଇ IMD ପକ୍ଷରୁ ସୂଚନା ଦିଆଯାଇଛି । ଯାହାକୁ ନେଇ ରାଷ୍ଟ୍ରପତିଙ୍କ କାର୍ଯ୍ୟକ୍ରମ ଏହି ଦିନ ହେବ ନାଁ ପୁଣି ପରିବର୍ତ୍ତନ କରାଯିବ ତାହାକୁ ନେଇ ସନ୍ଦେହ ଦେଖାଦେଇଛି।
ଜନ୍ମମାଟିକୁ ଆସିବେ ମହାମହିମ:
ଅକ୍ଟୋବର ମାସ ୨୩ ତାରିଖ (ବୁଧବାର) ଦିନ ମୟୂରଭଞ୍ଜ ଜିଲ୍ଲା ଆସିବେ ରାଷ୍ଟ୍ରପତି ଦ୍ରୌପଦୀ ମୁର୍ମୁ । ମହାମହିମଙ୍କ କାର୍ଯ୍ୟସୂଚୀ ଅନୁସାରେ, ବୁଧବାର ଦିନ ବାୟୁସେନାର ସ୍ବତନ୍ତ୍ର ହେଲିକପ୍ଟର ଯୋଗେ ସକାଳ ୮ଟା ୫୫ରେ ବାଙ୍ଗିରିପୋଷି ପହଞ୍ଚିବେ । ସେଠାରେ ୩ ଟି ରେଳ ଲାଇନ୍ର ଭିତ୍ତି ପ୍ରସ୍ତର ସ୍ଥାପନ କରିବେ । ସେଗୁଡିକ ହେଲା ବାଙ୍ଗିରିପୋଷିରୁ ଗୋରୁମହିଷାଣୀ, ବାଦାମପାହାଡରୁ କେନ୍ଦୁଝର ଓ ବୁଡାମୋରାରୁ ଜାମଶୋଳା ରେଳ ସଂଯୋଗୀକରଣ । ଏଥି ସହିତ ଭିସି ଜରିଆରେ ରାଇରଙ୍ଗପୁର ଟ୍ରାଇବାଲ ରିସର୍ଚ୍ଚ ସେଣ୍ଟର, ଦାଣ୍ଡବୋଷ ଏୟାରପୋର୍ଟ ଓ ରାଇରଙ୍ଗପୁର ଡାକ୍ତରଖାନାକୁ ସୁପର ସ୍ପେଶାଲିଟି ହସ୍ପିଟାଲ ପାଇଁ ଶିଳାନ୍ୟାସ କରିବେ ।
ନିଜ ଘରେ ମଧ୍ୟାହ୍ନ ଭୋଜନ କରିବେ ରାଷ୍ଟ୍ରପତି:
ପରେ ରାଷ୍ଟ୍ରପତି ଉପରବେଡା ସରକାରୀ ୟୁପି ସ୍କୁଲ୍ ପହଞ୍ଚିବେ । ସେଠାରେ ସ୍କୁଲ ପରିଦର୍ଶନ ସହିତ ଛାତ୍ରଛାତ୍ରୀ, ଶିକ୍ଷକ ଶିକ୍ଷୟିତ୍ରୀ ଓ କିଛି ବିଶେଷ ବ୍ୟକ୍ତିଙ୍କୁ ସାକ୍ଷାତ କରି ଉପରବେଡା ସ୍ଥିତ ନିଜ ଘରେ ରହି ଗ୍ରାମବାସୀଙ୍କ ସହିତ ସାକ୍ଷାତ କରିବାର କାର୍ଯକ୍ରମ ରହିଛି । ସେଠାରୁ ସ୍ବତନ୍ତ୍ର କାରକେଡରେ ବାହାରି ସଡ଼କ ପଥରେ ଦିନ ୧୨ଟା ୪୫ ସମୟରେ ରାଇରଙ୍ଗପୁର ସ୍ଥିତ ନିଜ ବାସଭବନରେ ରହିବାର ସ୍ଥିରୀକୃତ ହୋଇଛି । ନିଜ ଘରେ ମଧ୍ୟାହ୍ନ ଭୋଜନ କରିବେ ମହାମହିମ । ପରେ ସେଠାରୁ ରାଇରଙ୍ଗପୁର ଡାକ୍ତରଖାନାକୁ ଏସଏଲଏସ ଟ୍ରଷ୍ଟ ବୋର୍ଡ ତରଫରୁ ଏକ ଆମ୍ବୁଲାନ୍ସ ପ୍ରଦାନ ଓ ମହିଳା ମହାବିଦ୍ୟାଳୟରେ ଆୟୋଜିତ କାର୍ଯ୍ୟକ୍ରମରେ ଯୋଗ ଦେବେ ମହାମହିମ । ସେଠାରେ ଛାତ୍ରୀ, ଅଧ୍ୟାପକ ଓ ଅଧ୍ୟାପିକାଙ୍କ ସହିତ ଭାବ ବିନିମୟ କରିବେ । ସେଠାରୁ ରାଇରଙ୍ଗପୁର ପୂର୍ଣ୍ଣେଶ୍ବର ମହାଦେବ ମନ୍ଦିର ଯାଇ ସେଠାରେ ମହାଦେବଙ୍କ ଦର୍ଶନ ଓ ଆରତୀରେ ଯୋଗ ଦେବେ । ସେଠାରୁ ୩ଟା ୪୦ ସମୟରେ ଦାଣ୍ଡବୋଷ ସ୍ଥିତ ଅସ୍ଥାୟୀ ହେଲିପ୍ୟାଡ୍ ଯାଇ ସେଠାକୁ କଲେଇକୁଣ୍ଡା ଓ ସେଠାରୁ ଭୁବନେଶ୍ବର ଅଭିମୁଖେ ଯାତ୍ରା କରିବେ ।
ରାଷ୍ଟ୍ରପତିଙ୍କୁ ସ୍ବାଗତ ପାଇଁ ଜୋରଦାର ପ୍ରସ୍ତୁତି:
ରାଷ୍ଟ୍ରପତିଙ୍କ ଗସ୍ତକୁ ନେଇରାଇରଙ୍ଗପୁର ସହ ରାଇରଙ୍ଗପୁର ମହିଳା ମହାବିଦ୍ୟାଳୟରେ ଜୋରଦାର ପ୍ରସ୍ତୁତି ଚାଲିଛି । ରାଷ୍ଟ୍ରପତିଙ୍କ ଗସ୍ତ ସମୟରେ ଯେପରି କୌଣସି ବିଭ୍ରାଟ ନ ହୁଏ ସେନେଇ ସମସ୍ତ ପ୍ରକାର ପଦକ୍ଷେପ ଗ୍ରହଣ କରାଯାଇଛି । ମହିଳା ମହାବିଦ୍ୟାଳୟର ସାଜସଜ୍ଜା କାମ ମଧ୍ୟ ଦ୍ରୁତ ଗତିରେ ଚାଲିଛି । ଉକ୍ତ ମହାବିଦ୍ୟାଳୟରେ ରାଷ୍ଟ୍ରପତିଙ୍କ କାର୍ଯ୍ୟକ୍ରମ ସହିତ ଛାତ୍ରଛାତ୍ରୀ ଓ ଅଧ୍ୟାପକ ଅଧ୍ୟାପିକାମାନେ ରାଷ୍ଟ୍ରପତିଙ୍କୁ ଭେଟିବା ପାଇଁ ସେଠାରେ ବିଭିନ୍ନ କାମ ଶେଷ ପର୍ଯ୍ୟାୟରେ ପହଞ୍ଚିଛି । ପ୍ରଥମ ଥର ପାଇଁ ରାଷ୍ଟ୍ରପତିଙ୍କୁ ଭେଟିବା ନେଇ ଛାତ୍ରୀମାନେ ଅତ୍ୟନ୍ତ ଉତ୍ସାହିତ ଥିବାବେଳେ ତାଙ୍କୁ ଫୁଲତୋଡ଼ା ଦେଇ ସ୍ୱାଗତ କରିବେ କହିବା ସହିତ ବିଦ୍ୟାଳୟର ସମସ୍ୟା ବିଷୟରେ ମହାମହିମଙ୍କୁ ଅବଗତ କରିବେ ବୋଲି କହିଛନ୍ତି ।
ସର୍ବୋଚ୍ଚ ନାଗରିକଙ୍କୁ ସ୍ବାଗତ ପାଇଁ ଚକାଚକ୍ ହେଉଛି ମହାବିଦ୍ୟାଳୟ:
ରାଷ୍ଟ୍ରପତି ଦ୍ରୌପଦୀ ମୁର୍ମୁ ବୁଧବାର ଦିନ ବାଙ୍ଗିରିପୋଷିରୁ ରାଇରଙ୍ଗପୁର ଆସିବା ପରେ ଉପରବେଡା, ରାଇରଙ୍ଗପୁର ମହିଳା ମହାବିଦ୍ୟାଳୟ, ପୂର୍ଣ୍ଣେଶ୍ୱର ମହାଦେବ ମନ୍ଦିର ଓ ରାଇରଙ୍ଗପୁର ଡାକ୍ତରଖାନାରେ ରହିଛି କାର୍ଯ୍ୟକ୍ରମ । ମହିଳା ମହାବିଦ୍ୟାଳୟରେ ଜୋରଦାର ପ୍ରସ୍ତୁତି ଚାଲିଥିବା ବେଳେ ଅଧ୍ୟାପକ ଅଧ୍ୟାପିକାଙ୍କ ସହ ପ୍ରଧାନଶିକ୍ଷକ ମଧ୍ୟ ବେଶ ଉତ୍ସାହିତ ରହିଛନ୍ତି । ଏନେଇ ପ୍ରସ୍ତୁତି ଜୋରଦାର ଚାଲିଛି । ଦେଶର ସର୍ବୋଚ୍ଚ ନାଗରିକଙ୍କୁ ସ୍ବାଗତ କରିବା ପାଇଁ ଚକାଚକ୍ ହେଉଛି ମହାବିଦ୍ୟାଳୟ । ଯେପରି ସାଜସଜ୍ଜାରେ କମି ନହୁଏ ସେନେଇ ବିଶେଷ ଧ୍ୟାନ ଦିଆଯାଉଛି ।
