ପୁରୀ: ଗୋପବନ୍ଧୁ ଆୟୁର୍ବେଦିକ ମହାବିଦ୍ୟାଳୟର ହୀରକ ଜୟନ୍ତୀ ସମାରୋହକୁ ଉଦଘାଟନ କଲେ ରାଷ୍ଟ୍ରପତି ଦ୍ରୌପଦୀ ମୁର୍ମୁ । କାର୍ଯ୍ୟକ୍ରମରେ ମୁଖ୍ୟଅତିଥି ଭାବେ ଅଂଶଗ୍ରହଣ କରି ଆର୍ୟୁବେଦ ଉପରେ ଗବେଷଣା କରିବା ପାଇଁ ରାଷ୍ଟ୍ରପତି ଛାତ୍ରଛାତ୍ରୀଙ୍କୁ ଆହ୍ବାନ ମଧ୍ୟ ଦେଇଛନ୍ତି । କାର୍ଯ୍ୟକ୍ରମରେ ରାଜ୍ୟପାଳ ଓ ମୁଖ୍ୟମନ୍ତ୍ରୀ ମଧ୍ୟ ସାମିଲ ଥିଲେ ।
କାର୍ଯ୍ୟକ୍ରମରେ ଅଂଶଗ୍ରହଣ ଅବସରରେ ସୋସିଆଲ ମିଡିଆ ପ୍ଲାଟଫର୍ମ ‘ଏକ୍ସ’ରେ ଟ୍ବିଟ୍ରେ ରାଷ୍ଟ୍ରପତି କହିଛନ୍ତି, ଗବେଷଣା ଯେକୌଣସି ପଦ୍ଧତିର ବୈଜ୍ଞାନିକ ଭିତ୍ତିକୁ ପ୍ରମାଣ କରିବାକୁ ସକ୍ଷମ । ପ୍ରମାଣ, ଲୋକମାନଙ୍କ ମଧ୍ୟରେ ଆସ୍ଥା ବୃଦ୍ଧି କରେ ଏବଂ ଆସ୍ଥା, ଗ୍ରହଣୀୟତାର ମାର୍ଗ ପ୍ରଶସ୍ତ କରେ । ଓଡ଼ିଶା ପରିପ୍ରେକ୍ଷୀରେ ଅନ୍ୟ ଏକ ଦିଗ ପ୍ରତି ମୁଁ ତୁମମାନଙ୍କର ଦୃଷ୍ଟି ଆକର୍ଷଣ କରିବାକୁ ଚାହୁଁଛି । ତାହା ହେଉଛି, ଆମ ତାଳପତ୍ର ପୋଥି । ଓଡ଼ିଶା ରାଜ୍ୟ ସଂଗ୍ରହାଳୟରେ ଅନେକ ତାଳପତ୍ର ପୋଥି ରହିଛି । ଅନେକଙ୍କ ଘରେ ମଧ୍ୟ ତାଳପତ୍ର ପୋଥି ରହିଛି । ସେସବୁ ତାଳପତ୍ର ପୋଥିରେ ସାହିତ୍ୟ ବ୍ୟତିରେକ ଚିକିତ୍ସା ପଦ୍ଧତିର ଅବତାରଣା ମଧ୍ୟ ରହିଛି । ଏ ଦିଗରେ ତୁମେମାନେ ଗବେଷଣା କରି, ଲୁକ୍କାୟିତ ଭାବରେ ଥିବା ଆମ ଚିକିତ୍ସା ପଦ୍ଧତିକୁ ଲୋକଲୋଚନକୁ ଆଣିବା ପାଇଁ ପ୍ରୟାସ କରିବ ବୋଲି ମୁଁ ଆଶା କରୁଛି ।’’
ଏହା ମଧ୍ୟ ପଢନ୍ତୁ:- ପୁରୀରେ ରାଷ୍ଟ୍ରପତି: ବଡ଼ଦାଣ୍ଡରେ ଚାଲିଲେ, ମହାପ୍ରଭୁଙ୍କ ଆଶିଷ ନେଲେ
ଆଦିବାସୀ ସମ୍ପ୍ରଦାୟରେ ଏକ ଚିକିତ୍ସା ପଦ୍ଧତି ପ୍ରଚଳିତ । ଏହି ପଦ୍ଧତି ବିଷୟରେ ମୋର କିଞ୍ଚିତ୍ ପରିଚୟ ରହିଛି । ବୟସ୍କ ଆଦିବାସୀ ଲୋକମାନଙ୍କ ମଧ୍ୟରୁ କେତେକ, ବିଭିନ୍ନ ରୋଗ ଏବଂ ସେ ରୋଗର ଚିକିତ୍ସା ପାଇଁ ଆବଶ୍ୟକ ଚେରମୂଳି ବିଷୟରେ ଜାଣିଛନ୍ତି । ସେହି ପାରମ୍ପରିକ ଜ୍ଞାନ କିନ୍ତୁ ଧୀରେଧୀରେ ଲୋପ ପାଇବାକୁ ଯାଉଛି । ତୁମମାନଙ୍କ ମଧ୍ୟରୁ…
— President of India (@rashtrapatibhvn) December 4, 2024
ରାଷ୍ଟ୍ରପତି ଅନ୍ୟ ଏକ ଟ୍ବିଟରେ କହିଛନ୍ତି,‘‘ଆଦିବାସୀ ସମ୍ପ୍ରଦାୟରେ ଏକ ଚିକିତ୍ସା ପଦ୍ଧତି ପ୍ରଚଳିତ । ଏହି ପଦ୍ଧତି ବିଷୟରେ ମୋର କିଞ୍ଚିତ୍ ପରିଚୟ ରହିଛି । ବୟସ୍କ ଆଦିବାସୀ ଲୋକମାନଙ୍କ ମଧ୍ୟରୁ କେତେକ, ବିଭିନ୍ନ ରୋଗ ଏବଂ ସେ ରୋଗର ଚିକିତ୍ସା ପାଇଁ ଆବଶ୍ୟକ ଚେରମୂଳି ବିଷୟରେ ଜାଣିଛନ୍ତି । ସେହି ପାରମ୍ପରିକ ଜ୍ଞାନ କିନ୍ତୁ ଧୀରେଧୀରେ ଲୋପ ପାଇବାକୁ ଯାଉଛି । ତୁମମାନଙ୍କ ମଧ୍ୟରୁ କେତେକ ସେହି ଚିକିତ୍ସା ପଦ୍ଧତିର ବୈଜ୍ଞାନିକ ଭିତ୍ତି ଅନ୍ୱେଷଣ କରିବା ପାଇଁ ଆଗ୍ରହୀ ହେବ ବୋଲି ମୁଁ ଆଶା କରୁଛି । ତାହା ଦ୍ୱାରା, ସେହି ପଦ୍ଧତି ବିଲୁପ୍ତ ହେବାରୁ ରକ୍ଷା ପାଇପାରିବ ଏବଂ ଜନସମାଜର ହିତରେ ମଧ୍ୟ ଲାଗିପାରିବ । ’’
ଆଜି ପୂର୍ବାହ୍ନରେ ରାଷ୍ଟ୍ରପତି ପୁରୀରେ ପହଞ୍ଚିବା ପରେ ଶ୍ରୀମନ୍ଦିରକୁ ଯାଇ ମହାପ୍ରଭୁଙ୍କୁ ଦର୍ଶନ କରିଥିଲେ । ପରେ ଆୟୁର୍ବେଦ ମହାବିଦ୍ୟାଳୟ କାର୍ଯ୍ୟକ୍ରମରେ ପହଞ୍ଚିଥିଲେ । କାର୍ଯ୍ୟକ୍ରମରେ ରାଷ୍ଟ୍ରପତିଙ୍କ ସହ ରାଜ୍ୟପାଳ ରଘୁବର ଦାସ, ମୁଖ୍ୟମନ୍ତ୍ରୀ ମୋହନ ଚରଣ ମାଝୀ, କେନ୍ଦ୍ର ସ୍ବାସ୍ଥ୍ୟ ଓ ପରିବାର କଲ୍ୟାଣ ଏବଂ ଆୟୁଷ ରାଷ୍ଟ୍ର ମନ୍ତ୍ରୀ ପ୍ରତାପ ରାଓ ଗଣପତ୍ ରାଓ ଯାଦବ ପ୍ରମୁଖ ଯୋଗଦାନ କରିଥିଲେ ।
ଇଟିଭି ଭାରତ, ପୁରୀ
