ଭବାନୀପାଟଣା: ପୁଣି ସାମ୍ନାକୁ ଆସିଲା ରାଗିଂ ଅଭିଯୋଗ । ଗତ କିଛି ଦିନ ଧରି ଛାତ୍ରଙ୍କୁ ମାଡ଼ ମାରିବା ସହ ମାନସିକ ନିର୍ଯାତନା ଦେଉଥିଲେ ସହପାଠୀ । ହେଲେ ଆଜି ନିର୍ଯାତନାର ସବୁ ସୀମା ଟପିଗଲେ ସହପାଠୀ । ଛାତ୍ରଙ୍କୁ ମାଡ଼ମାରିବା ସହ ଦୁଇ ମହଲା କୋଠାରୁ ତଳକୁ ଠେଲି ଦେଇଛନ୍ତି । ଫଳରେ ଛାତ୍ର ଜଣଙ୍କ ଗୁରୁତର ଆହତ ହୋଇ ଚିକିତ୍ସିତ ହେଉଛନ୍ତି । ସେପଟେ ଅଭିଯୋଗ ହେବାପରେ ଘଟଣା ସ୍ଥଳରେ ପୋଲିସ ପହଞ୍ଚି ତଦନ୍ତ କରୁଛି ।
ମାଡ ମାରିଲେ, ଛାତରୁ ଠେଲିଦେଲେ:
ସୂଚନା ଅନୁଯାୟୀ, ଗତ ବିଳମ୍ବିତ ରାତିରେ ଭବାନୀପାଟଣା ସହରର ଜଳେଶ୍ଵର ମନ୍ଦିର ରାସ୍ତାରେ ଥିବା ଘରୋଇ କଲେଜ ହଷ୍ଟେଲରେ ଯୁକ୍ତ ଦୁଇ ଦ୍ୱିତୀୟ ବର୍ଷର ଛାତ୍ରମାନେ ଅନ୍ୟଜଣେ ଛାତ୍ରକୁ ପ୍ରଥମେ ରୁମ ଭିତରେ ମାଡ ମାରିଥିଲେ । ପରେ ଦୁଇ ମହଲା ଛାତ ଉପରୁ ତଳକୁ ଠେଲି ଦେଇଥିଲେ । ତେବେ ଛାତ୍ର ଜଣଙ୍କ ସହ ଏହା ପ୍ରଥମ ଘଟଣା ନଥିଲା । ଏହି ଘଟଣା ଘଟିବାର ୪ ଦିନ ଆଗରୁ ମଧ୍ୟ ତାଙ୍କୁ ମାଡ଼ମାରିବା ସହ ମାନସିକ ନିର୍ଯାତନା ଦେଉଥିଲେ ସହପାଠୀ । ଏହି ଘଟଣା କାହା ଆଗରେ ପ୍ରକାଶ କଲେ ଜୀବନରୁ ମାରି ଦେବାକୁ ମଧ୍ୟ ଧମକ ଦେଇଥିଲେ । ତେବେ ଛାତ୍ର ଜଣଙ୍କୁ ମାଡ଼ ମାରିବା ବେଳର ଭିଡ଼ିଓ କେହି ଜଣେ ଉତ୍ତୋଳନ କରିଥିବା ବେଳେ ସେହି ଭିଡ଼ିଏ ପୀଡ଼ିତ ଛାତ୍ରଙ୍କ ମୋବାଇଲରେ ଥିଲା । କାଳେ ଏହି ଭିଡ଼ିଓକୁ ପୀଡ଼ିତ ଛାତ୍ର ଜଣଙ୍କ କାହାକୁ ଦେଖାଇ ଦେବେ ସେହି ଭୟରେ ସହପାଠୀମାନେ ଛାତ୍ର ଜଣଙ୍କୁ ୨ ମହଲା କୋଠାରୁ ତଳକୁ ଠେଲି ଦେଇଥିବା ପ୍ରକାଶ କରିଛନ୍ତି ପୀଡ଼ିତ ଛାତ୍ର ।
ପୋଲିସର ତନାଘନା:
ସେପଟେ ଛାତ୍ର ଜଣକୁ ଠେଲି ଦେବା ପରେ ସେ ଗୁରୁତର ଆହତ ହୋଇଥିଲେ । ଏହା ପରେ କଲେଜ କର୍ତ୍ତୃପକ୍ଷ ଏବଂ ପରିବାର ଲୋକଙ୍କୁ ତୁରନ୍ତ ଖବର ଦିଆଯାଇଥିଲା । ଗୁରୁତର ଛାତ୍ର ଜଣକୁ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା । ବର୍ତ୍ତମାନ ତାଙ୍କ ସେଠାରେ ଚିକିତ୍ସା ଚାଲିଥିବା ବେଳେ ସ୍ବାସ୍ଥ୍ୟ ଅବସ୍ଥା ସ୍ଥିର ଥିବା ଜଣାପଡିଛି । ଏହି ଘଟଣାକୁ ନେଇ ପ୍ରଶ୍ନ କରିଛନ୍ତି ବୁଦ୍ଧିଜୀବୀ । ରାଗିଂ ରୋକିବାକୁ ଆଣ୍ଟି ରାଗିଂ ସେଲ ଗଠନ ହୋଇଥିବା ବେଳେ ସେହି ସେଲ କ'ଣ କରୁଛି ବୋଲି ପ୍ରଶ୍ନ ଉଠିଛି । ସେପଟେ ଏହି ଘଟଣାକୁ ନେଇ ପୋଲିସ ତଦନ୍ତ ଆରମ୍ଭ କରିଛି । ଆଜି ସଂପୃକ୍ତ କଲେଜକୁ ଯାଇ ପୋଲିସ ପୀଡ଼ିତ ଛାତ୍ରଙ୍କ ସହପାଠୀମାନଙ୍କୁ ପଚରାଉଚରା କରିଛି । ଅପରପକ୍ଷେ କଲେଜ ପକ୍ଷରୁ ମଧ୍ୟ ଏହାର ବିଭିନ୍ନ ଦିଗକୁ ନେଇ ତଦନ୍ତ ଜାରି ରହିଛି ।
ଜୀବନରୁ ମାରିଦେବାକୁ ଧମକ:
ଏନେଇ ରାଗିଂର ଶିକାର ହୋଇଥିବା ଛାତ୍ର କହିଛନ୍ତି, "ମୋ ସହପାଠୀମାନେ ମୋତେ ମାଡ଼ ମାରିବା ସହ ମୋ ଜିନିଷ ପତ୍ର ନେଇଯାଆନ୍ତି । ମୋ ଖାଇବା ଛଡେଇ ନେଇ ଖାଇଦିଅନ୍ତି । କାହାକୁ କହିଲେ ଜୀବନରୁ ମାରିଦେବାକୁ ଧମକ ଦେଉଥିଲେ । ମୋ ବେକରେ ଛୁରୀ ଲଗେଇଥିଲେ । ମୋତେ ମାଡ଼ ମାରିବା ସହ ୩ ମହଲା ଛାତରୁ ତଳକୁ ଠେଲିଦେଲେ । ୪ ପୂର୍ବରୁ ମଧ୍ୟ ମାରପିଟ କରିଥିଲେ ।"
ଘଟଣା ଆମ ଅଜାଣତରେ ହୋଇଛି:
ସେପଟେ କଲେଜ କର୍ତ୍ତୃପକ୍ଷ ଅରୁଣ ମହାପାତ୍ର କହିଛନ୍ତି, "ଏହି ଘଟଣା ଆମ ଅଜାଣତରେ ହୋଇଛି । ଏ ବିଷୟରେ ନା ଛାତ୍ର ଆମକୁ କହିଛନ୍ତି, ନା ତାଙ୍କ ଅଭିଭାବକ କହିଛନ୍ତି । ଆମେ ଏ ଘଟଣା ସମ୍ପର୍କରେ କିଛି ଜାଣିନଥିଲୁ । ଗତକାଲି ଖବର ପାଇ ମୁଁ ମେଡିକାଲକୁ ଗଲା ପରେ ସେମାନେ ମତେ ଗୋଟେ ଭିଡିଓ ଦେଖାଇଥିଲେ । ଭିଡିଓ ଦେଖିଲା ପରେ ଆମେ ଜାଣିଲୁ ଯେ, ଛାତ୍ର ଜଣଙ୍କୁ ଦୁଇଜଣ ପିଲା ମାଡ ମାରୁଛନ୍ତି । ଆଜି ଆମର ଫ୍ୟାକ୍ଟଫାଇଣ୍ଡିଂ କମିଟି ବସିବ ଓ ଏହା ଉପରେ ଆଲୋଚନା କରି ପଦକ୍ଷେପ ଗ୍ରହଣ କରାଯିବ ।"
ଇଟିଭି ଭାରତ, କଲାହାଣ୍ଡି
