ପାରଳାଖେମୁଣ୍ଡି: ସନ୍ଦେହ ଘେରରେ ଅଗ୍ନିକାଣ୍ଡ । ପୌର ପରିଷଦ ଅଫିସରେ ନିଆଁ ଲାଗିବାକୁ ନେଇ ବିରୋଧୀଙ୍କ ନିଶାନା । ଗତକାଲି (ରବିବାର) ବିଳମ୍ବିତ ରାତିରେ ପାରଳାଖେମୁଣ୍ଡି ପୌରପରିଷଦ କାର୍ଯ୍ୟାଳୟ ପରିସରରେ ଅଗ୍ନିକାଣ୍ଡ ଘଟି ବହୁ ଗୁରୁତ୍ବପୂର୍ଣ୍ଣ କାଗଜପତ୍ର ପୋଡି ନଷ୍ଟ ହୋଇଯାଇଛି । ଅଫିସ୍ ଛୁଟି ଥିବା ବେଳେ ହଠାତ୍ କାର୍ଯ୍ୟାଳୟର ପୁରାତନ କୋଠାରୁ ନିଆଁ ଦେଖାଯିବା ସହ ପ୍ରବଳ ଧୂଆଁ ବାହାରୁଥିବା ଦୋଖାଦେଇଥିଲା । ସ୍ଥାନୀୟ ଲୋକେ ଏହାକୁ ଦେଖିବା ପରେ ଖବର ଦେଇଥିଲେ । ଖବର ପାଇ ଅଗ୍ନିଶମ କର୍ମଚାରୀମାନେ ପହଞ୍ଚି ଦୀର୍ଘ ୩ ଘଣ୍ଟା ପରିଶ୍ରମ କରିବା ପରେ ନିଆଁକୁ ଆୟତ୍ତ କରିଥିଲେ । ତେବେ ଏହି ସମୟ ମଧ୍ୟରେ ଅନେକ ଗୁରୁତ୍ବପୂର୍ଣ୍ଣ ଫାଇଲ ପୋଡି ନଷ୍ଟ ହୋଇଯାଇଛି ।
ତେବେ ଅଗ୍ନିକାଣ୍ଡର କାରଣ ଏଯାଏଁ ସ୍ପଷ୍ଟ ହୋଇନଥିବା ବେଳେ ପୌରାଧ୍ୟକ୍ଷା ଏହା ସର୍ଟ ସର୍କିଟରୁ ହୋଇଥିବା କଥା କହିଛନ୍ତି । ଯାହାକୁ ନେଇ ବିଧାୟକ ଓ କାଉନସିଲର ଦୁର୍ନୀତିର ପ୍ରମାଣ ନଷ୍ଟ କରିବାର ଅଭିଯୋଗ ଆଣିଛନ୍ତି । ପାରଳାଖେମୁଣ୍ଡି ବିଧାୟକ କେ.ନାରାୟଣ ରାଓ କହିଛନ୍ତି ଯେ, ଜାଲିଆତି ଫାଇଲକୁ ପୋଡିବା ପାଇଁ ପୌରପରିଷଦର କେତେକ କର୍ମଚାରୀ ଏଭଳି କାଣ୍ଡ କରିଥିବା ସନ୍ଦେହ ହେଉଛି । ତେଣୁ ଏହାର ଉଚ୍ଚ ସ୍ତରୀୟ ତଦନ୍ତ କରିବାକୁ ସେ ଦାବି କରିଛନ୍ତି । ସେହିଭଳି ବିଜେପି କାଉନସିଲର ବାଳକୃଷ୍ଣ ପାତ୍ର କହିଛନ୍ତି ଯେ, କୋଭିଡ ସମୟରେ କିଣାଯାଇଥିବା ମାସ୍କ,ସାନିଟାଇଜର ଆଦିକୁ ବ୍ୟବହାର କରାନଯାଇ ରଖାଯାଇଥିଲା । ସେସବୁ କିଣାଯାଇଥିବା ସଂପର୍କିତ ଫାଇଲ ମଧ୍ୟ ସେଠାରେ ଥିଲା । ତାହାକୁ ନଷ୍ଟ କରିବା ପାଇଁ ଏଭଳି କରାଯାଇଥିବା ସନ୍ଦେହ ସୃଷ୍ଟି ହେଉଛି । ତେଣୁ ଘଟଣାର ନିରପେକ୍ଷ ତଦନ୍ତ କରାଯାଇ ଦୋଷୀଙ୍କ ବିରୁଦ୍ଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି କରିଛନ୍ତି ।
ଏହା ମଧ୍ୟ ପଢନ୍ତୁ ... ପାରଳାଖେମୁଣ୍ଡି ପୌର ପରିଷଦ କାର୍ଯ୍ୟାଳୟରେ ଅଗ୍ନିକାଣ୍ଡ, ଗୁରୁତ୍ୱପୂର୍ଣ୍ଣ କାଗଜପତ୍ର ନଷ୍ଟ
ସେମାନଙ୍କ କହିବା କଥା ପୌରପରିଷଦର ନୂତନ କୋଠା ନିର୍ମାଣ ହୋଇଥିବା ବେଳେ ସେଠାରେ କାର୍ଯ୍ୟାଳୟ ଚାଲୁ ରହିଛି । ତେବେ ଅଗ୍ନି ନିର୍ବାପକ ବ୍ୟବସ୍ଥା ନଥିବା ପୁରୁଣା କୋଠାରେ ଏତେ ସବୁ ଫାଇଲ ଆଜି ଯାଏଁ କିଭଳି ରଖାଯାଇଥିଲା । ଗୁରୁତ୍ବପୂର୍ଣ୍ଣ ଫାଇଲ ଥିବା ସତ୍ତ୍ବେ ବିଭିନ୍ନ ସମୟରେ ଜବତ ପଲିଥିନ୍ ମଧ୍ୟ ଏହି କୋଠାରେ ରଖାଯାଇଥିଲା । ଏଥିପାଇଁ କିଏ ଅନୁମତି ଦେଇଥିଲା ତାହାର ମଧ୍ୟ ତଦନ୍ତ କରାଯାଇ ଦୋଷୀଙ୍କ ବିରୁଦ୍ଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସେମାନେ ଦାବି କରିଛନ୍ତି । କୋଠାରେ ସିସି କ୍ୟାମେରା ରହିଛି । ତେଣୁ ତାହାର ଫୁଟେଜକୁ ଆଧାର କରି ତଦନ୍ତ କରାଯାଇ ଘଟଣା ପଛର କାରଣ ଖୋଜିବା ସହ ଯଦି କିଏ ଦୋଷୀ ବାହାରେ ତାଙ୍କ ବିରୁଦ୍ଧରେ କାର୍ଯାନୁଷ୍ଠାନ ଗ୍ରହଣ କରାଯିବ ବୋଲି ପୌର ନିର୍ବାହୀ ଅଧିକାରୀ ସୁଜିତ ଚୌଧୁରୀ କହିଛନ୍ତି ।
ଇଟିଭି ଭାରତ, ଗଜପତି
