ପୁରୀ: ଶ୍ରୀମନ୍ଦିରେ ଶ୍ରୀଜିଉଙ୍କ ଦୈନିନ୍ଦିନ ନୀତିକାନ୍ତି ଓ ଅନ୍ୟ କାର୍ଯ୍ୟକ୍ରମରେ ବ୍ୟବହୃତ ହେବ କେବଳ ‘ଓମଫେଡ’ ପ୍ରସ୍ତୁତ ଘିଅ । ‘ଓମଫେଡ’ ଦୈନିକ ପ୍ରାୟ 10 ଟନ୍ ଘିଅ ଉତ୍ପାଦନ ହେଉଛି । ଶ୍ରୀମନ୍ଦିରରେ ଦୈନିକ କାର୍ଯ୍ୟ ପାଇଁ ୩ରୁ ୪ ଟନ୍ ଘିଅ ଆବଶ୍ୟକତା ରହୁଛି । ଶ୍ରୀମନ୍ଦିରକୁ ‘ଓମଫେଡ’ ଘିଅ ପ୍ରଦାନ ପାଇଁ ସମୀକ୍ଷା ବୈଠକରେ ନିଷ୍ପତ୍ତି ହୋଇଛି । ଗତକାଲି ଲୋକସେବା ଭବନରେ ଏହାକୁ ନେଇ ଏକ ବୈଠକ ବସିଥିଲା । ମୁଖ୍ୟମନ୍ତ୍ରୀଙ୍କ ସମେତ ଆଇନ ମନ୍ତ୍ରୀ ଏବଂ ପଶୁସମ୍ପଦ ମନ୍ତ୍ରୀ ଏଥିରେ ଉପସ୍ଥିତ ଥିଲେ । ଶ୍ରୀମନ୍ଦିର ସମସ୍ତ ଆବଶ୍ୟକତା ପାଇଁ ‘ଓମଫେଡ’ ପ୍ରସ୍ତୁତ ଘିଅ ବ୍ୟବହାର ହେବ ଓ ସେଥିପାଇଁ ଆବଶ୍ୟକତା ଅନୁସାରେ ସଂସ୍ଥା ନିର୍ଦ୍ଦିଷ୍ଟ ଦରରେ ଘିଅ ଯୋଗାଇବ ବୋଲି ନିଷ୍ପତ୍ତି ହୋଇଛି ।
- ବଜାର ଦରଠୁ କମରେ ଯୋଗାଇବ ‘ଓମଫେଡ’
‘ଓମଫେଡ୍’ ପ୍ରସ୍ତୁତ ଘିଅର ବଜାର ଦର ୭୨୦ ଟଙ୍କା ପ୍ରତି ଲିଟର ରହିଛି । ଶ୍ରୀ ଜଗନ୍ନାଥଙ୍କ ନୀତିକନ୍ତି ପାଇଁ ୧ ଲିଟର ପିଚ୍ଛା ୫୪୩ ଟଙ୍କାରେ ଘିଅ ଯୋଗାଇବ କମ୍ପାନୀ । ଯଦି ୧୫ ଲିଟର ବିଶିଷ୍ଟ ଟିଣ ଦିଆଯିବ, ସେକ୍ଷେତ୍ରରେ ଏହାର ଲିଟର ପିଛା ମୂଲ୍ୟ ୧୦ ଟଙ୍କା ହ୍ରାସ ପାଇ ୫୩୩ ଟଙ୍କା କରାଯିବାକୁ ନିଷ୍ପତ୍ତି ହୋଇଛି । ଶୁଦ୍ଧ ‘ଓମଫେଡ’ ଘିଅ ଶ୍ରୀମନ୍ଦିରରେ ଲାଗିବ । ରାଜ୍ୟର ଅନ୍ୟ ମନ୍ଦିରଗୁଡିକ ପାଇଁ ବିଭିନ୍ନ ଜିଲ୍ଲାର ଜିଲ୍ଲାପାଳଙ୍କୁ ସମାନ ନିର୍ଦ୍ଦେଶ ଦିଆଯାଇଛି । ଅନ୍ୟ ସବୁ ମନ୍ଦିରରେ ନୀତିକାନ୍ତି ପାଇଁ ଉଚ୍ଚଗୁଣବତ୍ତା ସମ୍ପନ୍ନ ଶୁଦ୍ଧ ‘ଓମଫେଡ’ ଘିଅ ବ୍ୟବହାର କରିବାକୁ ଜିଲ୍ଲା ପ୍ରଶାସନ ବ୍ୟବସ୍ଥା କରିବ ।
ଶ୍ରୀମନ୍ଦିର ପ୍ରଶାସନ ପକ୍ଷରୁ ଶ୍ରୀମନ୍ଦିରରେ ‘ଓମଫେଡ’ ପକ୍ଷରୁ ଘିଅ ଯୋଗାଇଦେବା ଏକ ସ୍ବାଗତଯୋଗ୍ୟ ନିଷ୍ପତ୍ତି ବୋଲି ମତ ପ୍ରକାଶ ପାଇଛି । ଶ୍ରୀମନ୍ଦିର ପ୍ରଶାସନକୁ ଧନ୍ୟବାଦ ଜଣାଇଛନ୍ତି ମତ୍ସ୍ୟ ଓ ପଶୁସମ୍ପଦ ବିଭାଗ ମନ୍ତ୍ରୀ । ରିହାତି ଦରରେ ଘିଅ ଯୋଗାଇ ଦିଆଯିବ । ରିହାତି ଖର୍ଚ୍ଚ ରାଜ୍ୟ ସରକାର କିମ୍ବା ପଶୁସମ୍ପଦ ବିଭାଗ ବହନ କରିବା ନେଇ ଆଲୋଚନା ହୋଇଛି । କେତେ ପ୍ରତିଶତ ରିହାତି ହେବ ସେନେଇ ବିଭାଗୀୟ ଆଲୋଚନା ହେବ ତାପରେ ନିଷ୍ପତ୍ତି । ମହାପ୍ରଭୁଙ୍କ ଆଶୀର୍ବାଦରୁ ଏଭଳି ଶ୍ରୀମନ୍ଦିର ପ୍ରଶାସନ ଚିଠି ପାଇଛୁ ବୋଲି ମନ୍ତ୍ରୀ ଗୋକୁଳାନନ୍ଦ ମଲ୍ଲିକ କହିଛନ୍ତି ।
ଇଟିଭି ଭାରତ, ପୁରୀ
