ଭୁବନେଶ୍ବର/ଝାରସୁଗୁଡା: ଭିଜିଲାନ୍ସ ଜାଲରେ ପୁଣି ଜଣେ କୁବେର ଯନ୍ତ୍ରୀ । ଚଢାଉ ବେଳେ ମିଳିଲା ପୁଳା ପୁଳା ସୁନାଗହଣା । ଯାହାକୁ ଦେଖି ତାଜୁବ ଭିଜିଲାନ୍ସ । ଗତ ବର୍ଷ ଜୁନ ମାସରେ ଚାକିରିରୁ ଅବସର ନେଇଥିବା R&B(CIVIL) ଅଧିକାରି ଏବେ ଭିଜିଲାନ୍ସ ଜାଲରେ । ପୂର୍ବତନ ମୁଖ୍ୟ ନିର୍ବାହୀ ଯନ୍ତ୍ରୀ ତାରା ପ୍ରସାଦ ମିଶ୍ରଙ୍କ ଘରେ ପଶିଛି ଭିଜିଲାନ୍ସ । ଆୟ ବହିର୍ଭୂତ ସମ୍ପତ୍ତିର ସୁରାକ ଖୋଜୁ ଖୋଜୁ ବାବୁଙ୍କ ସମ୍ପତ୍ତି ଦେଖି ତାଜୁବ ହୋଇଛି ଭିଜିଲାନ୍ସ ।
ସାତ ତାଳ ପଙ୍କରେ ଲୁଚିଥିଲେ ବି ଛାଡୁନି ଭିଜିଲାନ୍ସ:
ଦୁର୍ନୀତିକୁ ନେଇ ରାଜ୍ୟ ସରକାରଙ୍କ ଶୂନ୍ୟସହନଶୀଳତା ନୀତି । କାହାରିକୁ ବି ଛାଡୁନି ଭିଜିଲାନ୍ସ । ଗତ ବର୍ଷ ଜୁନରେ ଅବସର ନେଇଥିଲେ ଏହି କୁବେର ଯନ୍ତ୍ରୀ ତାରା ପ୍ରସାଦ । ଆଜି ଭିଜିଲାନ୍ସ ରେଡ ବେଳେ ସାମ୍ନାକୁ ଆସିଛି ବାବୁଙ୍କ ଗାଡି ପୁଳା ପୁଳା ସୁନା ଅଳଙ୍କାର । ଯାହାକୁ ଦେଖି ଭିଜିଲାନ୍ସ ତାଜୁବ । ଘରୁ ସମ୍ପତ୍ତିର ଯେତେ ଖୋଜୁଛି ସେତେ ବାହାରୁଛି । ଘରୁ ମିଳିଛି ମର୍ସଡିଜ୍ ଭଳି ଦାମୀ କାର । ଦେଢ କେଜିରୁ ଊର୍ଦ୍ଧ୍ବ ସୁନା ଗହଣା ଓ ନଗଦ ଟଙ୍କା ମଧ୍ୟ ରହୁଥିବା ଘରୁ ଠାବ କରିଛି । ଏସବୁ ଦେଖି ଭିଜିଲାନ୍ସ ଆଶ୍ଚର୍ଯ ହେବା ସହ ଆକାଉଣ୍ଟର ତଥ୍ୟ ଓ ଲକ୍ ସହ ଆଉ କେଉଁଠି ରଖିଛନ୍ତି ସେ ନେଇ ଖୋଳତାଡ କରିଛି । ଏନେଇ ସରକାରୀ ଚାକିରିରୁ ଅବସର ନେଇ ସୁଖରେ ସମୟ କାଟୁଥିବା ଏହି ରିଚାର୍ଡ ଅଧିକାରିଙ୍କ ପାଇଁ ଟେନସନ ବଢାଇ ଦେଇଛି ଭିଜିଲାନ୍ସ ।
୯ଟି ସ୍ଥାନରେ ରେଡ୍:
ଭିଜିଲାନ୍ସ ଏସପି ଶ୍ରବଣା ବିବେକ ଏମଙ୍କ ଦେଇଥିବା ସୂଚନା ଅନୁସାରେ, ‘୧୨ ଡିଏସପି ସମେତ ୧୨ ଇନିସ୍ପେକ୍ଟର ୧୬ଏଏସ ଆଇଙ୍କୁ ନେଇ ଏକକାଳିନ ଭାବେ ୯ଟି ସ୍ଥାନରେ ରେଡ କରିଛି ଭିଜିଲାନ୍ସ । ଏବେ ସୁଧା ୨.୭କୋଟିର ଡିପୋଜିଟ,ନଗଦ ୬ଲକ୍ଷ ଟଙ୍କା ସହ ଦେଢ଼ କେଜିର ସୁନା ଅଳଙ୍କାର,୧୩ଲକ୍ଷ ଟଙ୍କାର ଘଣ୍ଟା,ମର୍ସଡିଜ କାର ଓ ସେଲଟସ କାର ସହ ଭୁବନେଶ୍ବର କଟକ ଓ ଜଟଣୀରେ ୭ଟି ପ୍ଲଟ ଠାବ ହୋଇଛି । ଭୁବନେଶ୍ବର IRC ଭିଲେଜ ନୟାପଲ୍ଲୀରେ ଥିବା ଅର୍ପଣ ଆପାର୍ଟମେଣ୍ଟର ୧୦୩ ଫ୍ଲାଟରେ ଚଢାଉ କରିଛି ଭିଜିଲାନ୍ସ । ସେହିପରି ନୟାପଲ୍ଲୀ ନିଳକଣ୍ଠ ନଗରରେ ଥିବା ଘର ମଧ୍ୟ ରେଡ ଜାରି ରହିଛି । ସେହିପରି ଡୁମୁଡୁମା କସମୋପଲିସ ୧୫ ମହଲାରେ ଥିବା କେ ୧୫୫ଏରେ ମଧ୍ୟ ରେଡ କରିଛି ଭିଜିଲାନ୍ସ । ଏଥିସହ ଝାରସୁଗୁଡା ଆସିଆନା ଫ୍ଲାଟ୍ ନମ୍ବର ୧୭,୩୦୭,୨୦୭ରେ ମଧ୍ୟ ରେଡ କରିଛି ଭିଜିଲାନ୍ସ । ସେହିପରି କଟକ ତିଗିରିଆ ଓ ଆଠଗଡ ମଧ୍ୟ ଏକକାଳିନ ରେଡ ଜାରି ରହିଛି ।
ଚଢାଉ ବେଳେ ବିଦେଶୀ ମୁଦ୍ରା ଜବତ:
କେବଳ ଆଖି ତରାଟିଲା ଭଳି ସମ୍ପତ୍ତି ନୁହେଁ । ବିଦେଶୀ ମୁଦ୍ରା ମଧ୍ୟ ଜବତ କରିଛି ଭିଜିଲାନ୍ସ । USA, ଥାଇଲାଣ୍ଡ, ଭିଏତନାମ, ୟୁଏଇ, କାନାଡା, ମେକ୍ସିକୋ, ମାଲେସିଆ, ସିଙ୍ଗାପୁର ଭଳି ଦେଶର ମୁଦ୍ରା ମଧ୍ୟ ଜବତ ହୋଇଛି । ତାରା ଭିଜିଲାନ୍ସ ଟୁର କରୁଥିବା ଭିଜିଲାନ୍ସ ସନ୍ଦେହ କରୁଛି । ଯାହାର ଏବେ ଖୋଳତାଡ କରୁଛି ଦୁର୍ନୀତି ନିବାରଣ ବିଭାଗ ।
ଏହା ମଧ୍ୟ ପଢନ୍ତୁ: ୩୩ବର୍ଷ ଚାକିରିରେ କୁବେର ହୋଇଗଲେ ଯନ୍ତ୍ରୀ; ଘରୁ ବାହାରିଲା କେଜିଏ ସୁନା, ୧୪କୋଟିର ସମ୍ପତ୍ତି, ବାନ୍ଧିଲା ଭିଜିଲାନ୍ସ
ସଉକିଆ ଥିଲେ ବାବୁ:
ପୂର୍ବତନ ମୁଖ୍ୟ ନିର୍ବାହୀ ଯନ୍ତ୍ରୀଙ୍କ ଘରୁ ମିଳିଥିବା ସାମଗ୍ରୀରେ ସେ ସଉକିଆ ଥିବା ସନ୍ଦେହ କରିଛି ଭିଜିଲାନ୍ସ । କାରଣ ଦେଢ଼ କେଜିର ଗହଣା । ଘରକୁ ସୁନାର ଦୋକାନ ପରି ସଜେଇ ରଖିଥିଲେ ହାତ ଶଙ୍ଖା ବା ଚୁଡ଼ି ବା ବାହୁଟିଠୁ ଆରମ୍ଭ କରି କାନଫୁଲ ଓ ମୁଦି ଓ ଚେନ ଓ ମଙ୍ଗଳସୁତ୍ର ଭଳି ହାର ଓ କାନଫୁଲ ଭଳି ଗହଣା ଜବତ ହୋଇଛି । କେବଳ ସେତିକି ନୁହେଁ ତାରାପ୍ରସାଦ ପିନ୍ଧୁଥିଲେ ଦାମୀ ଘଡି । ଚଢାଉ ବେଳେ ମିଳିଛି ରୋଲେକ୍ସର ହାତ ଘଣ୍ଟା । ଯାହାର ଦାମ୍ ୧୬ ଲକ୍ଷ ଟଙ୍କା । ସେହିପରି ଘରେ ଜୋତାର ଷ୍ଟାଣ୍ଡ ଦେଖି ମଧ୍ୟ ତାଜୁବ ହୋଇଛନ୍ତି । କାରଣ ଯେଉଁ ଦିନ ଯେଉଁ ସାର୍ଟ ପ୍ୟାଣ୍ଟ ପିନ୍ଧୁଥିଲେ ସେହି ହିସାବରେ ମ୍ୟାଚ କରି ଜୋତା ଓ ଚପଲ ପିନ୍ଧୁଥିଲେ ।
ଏହା ମଧ୍ୟ ପଢନ୍ତୁ: ଭିଜିଲାନ୍ସ ଜାଲରେ କୁବେର ଯନ୍ତ୍ରୀ: ବାହାରୁଛି ପୁଳା ପୁଳା ଟଙ୍କା, ସମ୍ପତ୍ତି ଦେଖି ତାଜୁବ ଅଧିକାରୀ
ଗତବର୍ଷ ନେଇଥିଲେ ଅବସର:
ପୂର୍ବତନ ମୁଖ୍ୟ ନିର୍ବାହୀ ଯନ୍ତ୍ରୀ ତାରା ପ୍ରସାଦ ମିଶ୍ର ୧୯୮୪ ମସିହାରେ ଆସିଷ୍ଟାଣ୍ଟ ଇଞ୍ଜିନିୟର ଭାବେ କାମ ଆରମ୍ଭ କରିଥିଲେ । ସେ ଗତ ବର୍ଷ ଜୁନ ମାସ ୨୦୨୩ରେ ଅବସର ନେଇଥିଲେ । ଆୟ ବର୍ହିଭୂତ ସମ୍ପତ୍ତି ଠୁଳ କରିଥିବା ସନ୍ଦେହରେ ବିଭିନ୍ନ ସ୍ଥାନରେ ଆଜି ରେଡ୍ ମାରିଛି ଭିଜିଲାନ୍ସ ।
ଇଟିଭି ଭାରତ, ଭୁବନେଶ୍ବର ଓ ଝାରସୁଗୁଡା
