ଭୁବନେଶ୍ବର: ଜାତୀୟ ବିପର୍ଯ୍ୟୟ ହ୍ରାସ ଦିବସ ଅନୁଷ୍ଠିତ ହୋଇଯାଇଛି । ବିପର୍ଯ୍ୟୟ ମୁକାବିଲା ପାଇଁ ଏଥର ନିଆଯାଉଛି ନୂଆ ଢାଞ୍ଚାରେ ପଦକ୍ଷେପ । "ବାତ୍ୟା ଓ ବନ୍ୟା ଭଳି ବିପର୍ଯ୍ୟୟକୁ ଓଡ଼ିଶାର ବନ୍ଧୁ ଭଳି ନିମନ୍ତ୍ରଣ କରନ୍ତୁ । ଅତିଥି ସତ୍କାର କଲାଭଳି ସର୍ବଦା ମୁକାବିଲା କରନ୍ତୁ । କାରଣ ଭାରତର ପ୍ରାକୃତିକ ବିପର୍ଯ୍ୟୟ ରାଜଧାନୀ ହେଉଛି ଓଡ଼ିଶା" ଏଭଳି କହି କହିଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ।
ଗଠନ ହେବ ଲୋକାଲ ରେସ୍ପନ୍ସ ଟିମ୍:
ପ୍ରତି ଗାଁରେ ଗଠନ ହେବ 'ଲୋକାଲ ରେସ୍ପନ୍ସ ' ଟିମ୍ ଅର୍ଥାତ୍ ସ୍ବତନ୍ତ୍ର ଭାବେ ବିପର୍ଯ୍ୟୟ ମୁକାବିଲା କଲାଭଳି ଏକ ଟିମ୍ । ଏହାପ୍ରତି ରାଜସ୍ବ ଗାଁରେ ଗଠନ କରାଯିବ ।ଏମାନେ ପ୍ରତି ଗାଁରେ କାମ କରିବେ । ଯାହା ସୂଚନା ଆସିବ ତାହାକୁ ବ୍ଲକ ,ଜିଲ୍ଲାକୁ ଓ କଣ୍ଟ୍ରୋଲ ରୁମକୁ ଦେବେ । ବିପର୍ଯ୍ୟୟ ଓ ବିପଦ ଆପଦ ସହ ଦୁର୍ଘଟଣା ଭଳି ସ୍ଥିତି ମୁକାବିଲା କରିବା ସହଜ ହେବ ।
500ଟି ନୂତନ ବହୁମୁଖୀ ବାତ୍ୟା ଆଶ୍ରୟସ୍ଥଳୀ:
କେବଳ ସେତିକି ନୁହେଁ ନୂଆ ଢାଞ୍ଚାରେ ହେବ ଆହୁରି 500ଟି ନୂତନ ବହୁମୁଖୀ ବାତ୍ୟା ଆଶ୍ରୟସ୍ଥଳୀ ।ଯେଉଁଠି କେବଳ ଯେ ବାତ୍ୟା ବନ୍ୟା ଆଶ୍ରୟସ୍ଥଳୀ ନୁହେଁ ବରଂ ବାହାଘର ମଣ୍ଡପ , ସାମାଜିକ କାର୍ଯକ୍ରମ ଭଳି କମୁନିଟି ସେଣ୍ଟର ଓ ସ୍କୁଲ ପରିଚାଳନା ଭଳି କାର୍ଯକ୍ରମ ଚାଲି ପାରିବ । ଏନେଇ ପ୍ରାଧାନ୍ୟ ଦେଇ ସର୍ଭେ କରାଯିବ । ବର୍ତ୍ତମାନ 844ଟି ମଲ୍ଟି ପର୍ପୋଜ ସାଇକ୍ଲୋନ ସେଣ୍ଟର ରହିଛି ।
3ଶହ ପାର ସୁନାମୀ ଭିଲେଜ ଲକ୍ଷ୍ୟ:
ପ୍ରାକୃତିକ ଦୁର୍ବିପାକ ଓ ବିପର୍ଯ୍ୟୟକୁ ଦୃଷ୍ଟିରେ ରଖି ଓଡ଼ିଶାରେ 381 ସୁନାମୀ ରେଡି ଭିଲେଜ ପ୍ରତିଷ୍ଠା ହେବ । ବର୍ତ୍ତମାନ 26ଟି ଗାଁ ସୁନାମୀ ରେଡି ଗାଁ ରହିଛି । ଏହାକୁ ବୃଦ୍ଧି କରି 255 ନୂଆ ଗାଁ ଘୋଷଣା କରାଯାଇଛି । ଆଗକୁ 381 ସୁନାମୀ ରେଡି ଭିଲେଜ ପାଇଁ ଯୋଜନା ରହିଛି । ଅର୍ଥାତ୍ ସୁନାମୀ ଆସିଲେ ବି ଏହି ସବୁ ଗାଁ ମୁକାବିଲା ପାଇଁ ପ୍ରସ୍ତୁତ ରହିବ । ଏନେଇ ସ୍ବତନ୍ତ୍ର ଭାବେ ସର୍ଭେ ଓ ନୂଆ ଢାଞ୍ଚାରେ ବିଭିନ୍ନ ଦିଗକୁ ଗୁରୁତ୍ବ ଦିଆଯିବ । ସୁନାମୀ ରେଡି ଗାଁ ଭାବେ, ବାଲେଶ୍ବର ଜିଲ୍ଲା ଚାରୋଟି ଗାଁ, ଭଦ୍ରକ ,କେଦ୍ରାପଡା, ପୁରୀ ଏବଂ ଗଞ୍ଜାମର 4ଟି ଗାଁକୁ 2024ର ସୁନାମୀ ରେଡି ଭିଲେଜ ଭାବେ ସମ୍ମାନିତ କରିଛନ୍ତି ମୁଖ୍ୟମନ୍ତ୍ରୀ ।
ଏମିତି କହିଲେ ମୁଖ୍ୟମନ୍ତ୍ରୀ:
ମୁଖ୍ୟମନ୍ତ୍ରୀ କହିଛନ୍ତି,"100ବର୍ଷର ଇତିହାସ କହୁଛି । ବିନା ବାତ୍ୟା, ମରୁଡି ଓଡ଼ିଶାରେ ବିପର୍ଯ୍ୟୟ ହୋଇନାହିଁ । ଭୌଗୋଳିକ ସ୍ଥିତି ଏପରି ଯେ ଏହାକୁ ଭାରତର ପ୍ରାକୃତିକ ବିପର୍ଯ୍ୟୟର ରାଜଧାନୀ ବୋଲି ଓଡ଼ିଶାକୁ କୁହାଯାଏ । ଏହାକୁ ରୋକିବାକୁ ପଡିବ । ଟିମ୍ ୱାର୍କ ସଚେତନତାର ବାର୍ତ୍ତା ଓ ନିଜ ଭିତରେ ଥିବା ମନୋବଳ ଜାଗ୍ରତ କରିବାକୁ ପଡିବ। ଯାହାଦ୍ବରା କ୍ଷୟକ୍ଷତି ଏବଂ ଜୀବନହାନି କମାଇପାରିବ । ମୁକାବିଲା ପାଇଁ ମୂଳମନ୍ତ୍ର ଜିରୋ କାଜୁଆଲିଟି ।
ନିର୍ମାଣ ହେବ ବିଶ୍ବସ୍ତରୀୟ ପ୍ରାକୃତିକ ବିପର୍ଯ୍ୟୟ କେନ୍ଦ୍ର:
ବିଶ୍ବସ୍ତରୀୟ ଅତ୍ୟାଧୁନିକ ପ୍ରକୃତିକ ବିପର୍ଯ୍ୟୟ କେନ୍ଦ୍ର ନିର୍ମାଣ କରାଯିବ ।ଅତ୍ୟାଧୁନିକ ଢାଞ୍ଚାରେ ବିପର୍ଯ୍ୟୟ ବିରୋଧି,ଆକ୍ରମଣ ଓ ଦୁର୍ଘଟଣା ମୁକାବିଲା କଲାଭଳି ଏକ କୋଠା ନିର୍ମାଣ କରାଯିବ । ସେଠାରେ ଓସଡମା ବା ବିପର୍ଯ୍ୟୟ ପରିଚାଳନା ବିଭାଗ ଚାଲିବ ।ଏଥିସହ ହେନ୍ତାଳବନ ଅଧିକ ସୃଷ୍ଟି କରାଯିବ । ଓଡ୍ରାଫ ଟିମ୍ ଆହୁରି 10ଟି ଗଠନ କରାଯିବ ।ଏନେଇ ଓଡ଼ିଶା ବିପର୍ଯ୍ୟୟ ପ୍ରସ୍ତୁତି ଦିବସରେ ମୁଖ୍ୟମନ୍ତ୍ରୀ ଘୋଷଣା କରିଛନ୍ତି ।
ସ୍ବୟଂସିଦ୍ଧା ଚୁକ୍ତି ସ୍ବାକ୍ଷର:
ଆଗାମୀ ବର୍ଷେ ମଧ୍ୟରେ ବାତ୍ୟା ପ୍ରବଣ ଜିଲ୍ଲାରେ ମିଶନ ଶକ୍ତି ମହିଳାଙ୍କୁ ଦିଆଯିବ ବିପର୍ଯ୍ୟୟ ପରିଚାଳନା ତାଲିମ । ରାଜ୍ୟର ୧୪ଟି ଜିଲ୍ଲାରେ ମିଶନ ଶକ୍ତିର ମହିଳାମାନଙ୍କୁ ସ୍ଵୟଂସିଦ୍ଧା ନାମରେ ଏହି ତାଲିମ ଦିଆଯିବ । ୧୪ଟି ବାତ୍ୟା ପ୍ରବଣ ଜିଲ୍ଲାରେ ପ୍ରତି ପଞ୍ଚାୟତରେ ୫୦ ଜଣ ମହିଳାଙ୍କୁ ଏହି ତାଲିମ ଦିଆଯିବ । ୩୯୨୨ଟି ପଞ୍ଚାୟତରେ ଏହି ଟ୍ରେନିଂ ଦେବାକୁ ଯୋଜନା କରିଛି ବିଭାଗ । OSDMA ସହ ମିଶନ ଶକ୍ତିର ଏନେଇ ଏକ ଚୁକ୍ତି ସ୍ବାକ୍ଷର କରଯାଇଛି ।
ଇଟିଭି ଭାରତ, ଭୁବନେଶ୍ବର
