ନିଆଳି: ବିଜେଡି ଛାଡିଲେ ଦଳବଳ ସହ ବିଜେପିରେ ମିଶିଲେ ବ୍ରାହ୍ମଣବାଟି ସରପଞ୍ଚ ସଞ୍ଜୟ । କଟକ ଜିଲ୍ଲା ତଥା ଜଗତସିଂହପୁର ଲୋକସଭା ଆସନ ଅନ୍ତର୍ଗତ ନିଆଳି ବିଧାନସଭା ଆସନରେ ଚଳିତ ସାଧାରଣ ନିର୍ବାଚନରେ ଆରପାର୍ ଲଢେଇ ହେବ । ତିନି ପ୍ରମୁଖ ଦଳ ଯଥା ବିଜେପି, କଂଗ୍ରେସ ଓ ବିଜେଡି ଦଳର ପ୍ରାର୍ଥୀଙ୍କ ବ୍ୟତୀତ ଦୁଇ ସ୍ବାଧୀନ ପ୍ରାର୍ଥୀ ମଧ୍ୟ ନିଆଳି ନିର୍ବାଚନ ମଇଦାନରେ ଲଢେଇ କରିବେ । ଏଥିପାଇଁ ସମସ୍ତ ପ୍ରାର୍ଥୀ ନିଜ ନିଜର ରଣନୀତି ପ୍ରସ୍ତୁତ କରି ସାରିଛନ୍ତି । ଆଜି କଟକ ଜିଲ୍ଲା କଣ୍ଟାପଡ଼ା ବ୍ଲକ ବ୍ରାହ୍ମଣବାଟି ଗ୍ରାମ ପଞ୍ଚାୟତ ସରପଞ୍ଚ ସଞ୍ଜୟ କୁମାର ରାଉତରାୟ ବିଜେଡି ଦଳ ପରିତ୍ୟାଗ କରି ନିଜ ସମର୍ଥକଙ୍କ ସହିତ ବିଜେପି ଦଳରେ ସାମିଲ ହୋଇଛନ୍ତି । ଫଳରେ ବ୍ରାହ୍ମଣବାଟି ପଞ୍ଚାୟତରେ ବିଜେପି ଦଳର ଶକ୍ତି ବୃଦ୍ଧି ହୋଇଛି ।
ନିଆଳି ନିର୍ବାଚନ ମଣ୍ଡଳୀର ବିଜେପି ପ୍ରାର୍ଥୀ ଛବି ମଲ୍ଲିକଙ୍କ ଉପସ୍ଥିତରେ ସରପଞ୍ଚ ସଞ୍ଜୟ ଏବଂ ତାଙ୍କ ସମର୍ଥକ ବିଜେପି ଦଳରେ ସାମିଲ ହୋଇଛନ୍ତି । ସଞ୍ଜୟ କୁମାର ରାଉତରାୟ ଯୁବକ ଅବସ୍ଥାରୁ ନିଜକୁ ସମାଜସେବୀ ଭାବରେ ଗଢିବା ସହିତ ବିଭିନ୍ନ ସମସ୍ୟା ପଡିଥିବା ଲୋକଙ୍କୁ ସାହାଯ୍ୟର ହାତ ବଢାଇଥାନ୍ତି । ସଞ୍ଜୟ କୁମାର ରାଉତରାୟଙ୍କ ବୟସ ୪୩ ହୋଇଥିବା ବେଳେ ସେ ୫୪ ଥର ରକ୍ତଦାନ କରି ଅନେକଙ୍କ ଜୀବନ ବଞ୍ଚାଇଛନ୍ତି । ସେ ବ୍ରାହ୍ମଣ ବାଟି ପଞ୍ଚାୟତରୁ ସରପଞ୍ଚ ଭାବରେ ନିର୍ବାଚିତ ହେବା ପରେ ବିଜେଡି ଦଳରେ ସାମିଲ ହୋଇଥିଲେ । ଦୀର୍ଘ ବର୍ଷ ଧରି ବିଜେଡି ଦଳରେ ରହିବା ପରେ ଅଣନିଃଶ୍ବାସୀ ହେବା ପରେ ସେ ବିଜେଡି ଦଳ ପରିତ୍ୟାଗ କରିଥିବା କଥା କହିଛନ୍ତି । ସଞ୍ଜୟ ରାଜ୍ୟ ସରପଞ୍ଚ ସଂଘର ସଭାପତି ଭାବରେ କାର୍ଯ୍ୟ ତୁଲାଉଛନ୍ତି । ସଞ୍ଜୟ ବିଜେପିକୁ ଆସିବା ପରେ ବିଜେପିର ଶକ୍ତି ବୃଦ୍ଧି ହୋଇଥିବା ବିଜେପି ନେତା କହିଛନ୍ତି ।
ଏହା ମଧ୍ୟ ପଢନ୍ତୁ.....ବିଜେଡିରେ ମିଶିଲେ ବଙ୍ଗୋମୁଣ୍ଡା ବ୍ଲକ ଅଧ୍ୟକ୍ଷ ରଞ୍ଜୁବାଳା ବେହେରା - Bjd Joining Program
ସେହିପରି ନାହାଳପୁର ପଞ୍ଚାୟତ ପୂର୍ବତନ ସରପଞ୍ଚ ଖଗେଶ୍ବର ପ୍ରଧାନ ମଧ୍ୟ ବିଜେଡି ଦଳ ଛାଡି ବିଜେପିରେ ସାମିଲ ହୋଇଛନ୍ତି । ଗତ ସାଧାରଣ ନିର୍ବାଚନରେ ବିଜେପି ଦ୍ବିତୀୟ ସ୍ଥାନରେ ଥିଲା । ଚଳିତ ଥର ପ୍ରଥମ ସ୍ଥାନକୁ ଆସିବା ପାଇଁ ସଂକଳ୍ପ ନେଇଛି ବିଜେପି । ନିଆଳିରେ ୧୫ ଦୀର୍ଘ ବର୍ଷ ଧରି ଶାସନରେ ଥିବା ବିଜେଡି ଦଳର ବିଭିନ୍ନ ପ୍ରକାରର ଦୁର୍ନୀତିକୁ ପ୍ରସଙ୍ଗ କରିଛି ବିଜେପି । ବ୍ରାହ୍ମଣବାଟି ପଞ୍ଚାୟତରେ ମିଶ୍ରଣ ପର୍ବରେ ଅନେକ ତୁଙ୍ଗ ନେତା ସରପଞ୍ଚ, ସମିତିସଭ୍ୟ ସମେତ ବହୁ ଦଳୀୟ କର୍ମୀ ଉପସ୍ଥିତ ଥିଲେ । ଚଳିତ ସାଧାରଣ ନିର୍ବାଚନରେ ବିଜେପି ପ୍ରାର୍ଥୀ ଛବି ମଲ୍ଲିକଙ୍କୁ ବିଜୟୀ କରିବା ପାଇଁ ସଂକଳ୍ପ ନେଇଥିଲେ ।
ଇଟିଭି ଭାରତ, ନିଆଳି
