ଭୁବନେଶ୍ବର: ଖାଣ୍ଟି ଓଡ଼ିଆଙ୍କ ମନ କଂସାଏ ପଖାଳରେ ଥାଏ । ପଖାଳ ଆଗରେ ସେ ତାରକା ହୋଟେଲ ଖାଇବା ବି ଫିକା ଲାଗେ । ସେ ଯେତେ ବଡ଼ ଲୋକ ହେଉ ନା କାହିଁକି ପଖାଳ ଗଣ୍ଡାଏ ଖାଇଲେ, ଓଃ କି ଶାନ୍ତି...। ଏଥିରୁ ମୁଖ୍ୟମନ୍ତ୍ରୀ ମୋହନ ମାଝୀ ବା ବାଦ ପଡ଼ିବେ କେମିତି । ମୁଖ୍ୟମନ୍ତ୍ରୀ ହେବା ପରେ ନାଁ ତାଙ୍କ ଖାଦ୍ୟରେ କିଛି ପରିବର୍ତ୍ତନ ହୋଇଛି, ନାଁ ଖାଦ୍ୟ ରୂଚିରେ । ମୁଖ୍ୟମନ୍ତ୍ରୀ ହେବା ପୂର୍ବରୁ ଯେଉଁ ଖାଇବା ତାଙ୍କର ପସନ୍ଦ ଥିଲା ଆଜି ବି ତାହା ବରାବର ରହିଛି । ଆଉ ଏଥିପାଇଁ ତ ଆଜି ନିଜ ଗାଁକୁ ଗସ୍ତକରି ଥିବା ବେଳେ ପୁଅର ମନକଥା ବୁଝି ପଖାଳ କଂସା ସଜାଡି ରଖିଥିଲେ ମୋହନଙ୍କ ମା’ । ଆଉ ନିଜ ହାତରେ ପୁଅକୁ ପଖାଳ ଖୁଆଇ ଦେଇଥିଲେ ।
ମୁଖ୍ୟମନ୍ତ୍ରୀ ହେବା ପରେ ପ୍ରଥମ ଥର ପାଇଁ ନିଜ ଜନ୍ମମାଟି ଗସ୍ତ କରିଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ । ଆଉ ଗାଁରେ ପହଞ୍ଚିବା କ୍ଷଣି ଗାଁ ମାଟିର ପୁଅକୁ ଭବ୍ୟ ସ୍ବାଗତ କରିଥିଲେ ମୁଖ୍ୟମନ୍ତ୍ରୀଙ୍କ ଗ୍ରାମବାସୀ । ସେପଟେ ନିଜ ପୈତୃକ ଘରେ ପହଞ୍ଚିବା ପରେ ନିଜ ମାଆଙ୍କୁ ଭେଟି ସାଷ୍ଟ୍ରାଙ୍ଗ ପ୍ରମାଣ କରିଛନ୍ତି ମୁଖ୍ୟମନ୍ତ୍ରୀ । ଆଉ ମାଆ ନିଜ ହାତରେ ପୁଅଙ୍କ ମନ ପସନ୍ଦିଆ ଖାଣ୍ଡି ଓଡ଼ିଶା ଖାଇବା ପରଷି ଦେଇଥିଲେ । ମୁଖ୍ୟମନ୍ତ୍ରୀ ମଧ୍ୟାହ୍ନ ଭୋଜନରେ ମାଆଙ୍କ ହାତରୁ ପଖାଳ ଖାଇ ବେସ ଉତ୍ସାହିତ ଥିବା କହିଛନ୍ତି ।
ମୁଖ୍ୟମନ୍ତ୍ରୀଙ୍କ ପ୍ରିୟ ଖାଦ୍ୟ:
ଆଜି ନିଜ ଗାଁ ରାଇକଳା ଗସ୍ତ କରିଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ । ମୁଖ୍ୟମନ୍ତ୍ରୀ ହେବା ପରେ ଏହା ଗାଁକୁ ତାଙ୍କର ପ୍ରଥମ ଗସ୍ତ । ତେବେ ମୁଖ୍ୟମନ୍ତ୍ରୀଙ୍କ ପସନ୍ଦ ଖାଣ୍ଡି ଓଡ଼ିଆ ଖାଇବା । ଆଉ ସବୁଠାରୁ ବେସି ପସନ୍ଦ ମାଆର ହାତ ରନ୍ଧା ଖାଇବା । ଯେପରିକି ପଖାଳ ଭାତ, ଶାଗ, ବଡ଼ିଚୁରା, ସଜନା ଶାଗ ଭଜା, କୁନ୍ଦୁରି ଭଜା, ରୋମା ଛୁଇଁ ଭଜା, ବାଇଗଣ ଭର୍ତ୍ତା, ଆଳୁଭଜା ଭଳି ଅନେକ ଓଡ଼ିଆ ଖାଇବା ମୁଖ୍ୟମନ୍ତ୍ରୀଙ୍କ ଭାରି ପସନ୍ଦ । ଆଉ ଆଜି ନିଜ ଘରେ ପହଞ୍ଚିବା କ୍ଷଣି ମୁଖ୍ୟମନ୍ତ୍ରୀଙ୍କ ମାଆ ପୁଅର ସବୁ ପସନ୍ଦିତା ଖାଇବା ପ୍ରସ୍ତୁତ କରିଥିଲେ । ଆଉ ନିଜ ହାତରେ ପୁଅକୁ ପଖାଳ ଖୁଆଇ ଦେଇଥିଲେ ।
ଏନେଇ ମୁଖ୍ୟମନ୍ତ୍ରୀ ମୋହନ ମାଝୀ କହିଛନ୍ତି, "ଭୁବନେଶ୍ବରରୁ ଯେତେବେଳେ ବି ଗାଁକୁ ଆସେ ଗାଁରେ ମାଆ ଯାହା ରୋଷେଇ କରିଥାଏ ଖାଏ । ଓଡ଼ିଆ ଖାଇବାରେ ଯେଉଁ ଆନନ୍ଦ ଥାଏ ତାହା ଫାଇବ ଷ୍ଟାର ହୋଟେଲ ଖାଇବାରେ ନଥାଏ । କାରଣ ମାଆ ହାତରନ୍ଧାରେ ସ୍ନେହ ମମତା ପରିବାର ଲୋକଙ୍କ ଭଲ ପାଇବା ଥାଏ । ଏହି ଭଲ ପାଇବା ହିଁ ଖାଇବାରେ ମଧୁରତା ଆଣେ । ଆଉ ଯାହା ଆଜି ଖାଇବା ପରେ ମୁଁ ଅନୁଭବ କରିଛି ।"
ମୁଖ୍ୟମନ୍ତ୍ରୀ ମୋହନ ମାଝୀ ଆହୁରି ମଧ୍ୟ କହିଛନ୍ତି, "ଓଡ଼ିଆ ଅସ୍ମିତାକୁ ବଜାୟ ରଖିବା ପାଇଁ ଆମ ଗାଁରେ ରଜ ହୁଏ, ଦୋଳି ଖେଳ ହୁଏ ଓ ତାସ ଖେଳ ହୁଏ । ଆମେ ଯେତେ ଉପରକୁ ଗଲେ ମଧ୍ୟ ଗାଁର ପରମ୍ପରା ସଂସ୍କୃତିକୁ ଭୁଲିବା କଥା ନୁହେଁ ।"
