ବୌଦ୍ଧ: ବୈଶାଖ ମାସ ଟାଣ ଖରାରେ ଚିନ୍ତା ବଢାଇଛି ପାଣି ସମସ୍ୟା । ପୋଖରୀ ଗାଡ଼ିଆର ପାଣି ପାନୀୟ ଭାବରେ ବ୍ୟବହାର କରୁଛନ୍ତି ଗ୍ରାମବାସୀ । ଦୀପତଳ ଅନ୍ଧାର ଭଳି ଖୋଦ ମହାନଦୀ କୂଳରେ ଥାଇ ମଧ୍ୟ ପାଣି ପାଇଁ ନାହିଁ ନଥିବା ଅସୁବିଧା ଭୋଗୁଛନ୍ତି । ଜଳ ସମସ୍ୟାକୁ ନେଇ ଅନେକ ଥର ଜନପ୍ରତିନିଧିମାନଙ୍କୁ ଜଣାଇଛନ୍ତି । ହେଲେ ସେମାନଙ୍କ କଥାକୁ କାହାର କର୍ଣ୍ଣପାତ ନାହିଁ । ଆଉ ଏଭଳି ସ୍ଥିତିରେ ପାଣି ସମସ୍ୟା ସମାଧାନ ନକଲେ ଆଗାମୀ ନିର୍ବାଚନରେ ଭୋଟ ବର୍ଜନ କରିବେ ବୋଲି ସିଧାସିଧା ଶୁଣାଇ ଦେଇଛନ୍ତି ବୌଦ୍ଧ ଜିଲ୍ଲା ସଦର ବ୍ଲକ ଖୁଣ୍ଟବନ୍ଧ ପଞ୍ଚାୟତବାସୀ ।
ତେବେ ବୌଦ୍ଧ ଜିଲ୍ଲା ସଦର ବ୍ଲକ ଖୁଣ୍ଟବନ୍ଧ ପଞ୍ଚାୟତ ଅନ୍ତର୍ଗତ ବେନ୍ଦିରିପାଲି ଓ ସରଧାପୁର ଗ୍ରାମର ପ୍ରାୟ 200 ପରିବାର ବସବାସ କରନ୍ତି । ମହାନଦୀ କୂଳରେ ଅବସ୍ଥିତ ଏହି 2ଟି ଗ୍ରାମରେ ପାନୀୟ ଜଳର ଉତ୍କଟ ଅଭାବ ଦେଖାଇଛି । ପାନୀୟ ଜଳ ପାଇଁ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି ଗ୍ରାମବାସୀ । ସବୁଠାରୁ ଆଶ୍ଚର୍ଯ୍ୟର କଥା ଏହି ଦୁଇ ଗ୍ରାମଠାରୁ ମାତ୍ର 3 କିଲୋମିଟର ଦୂରରେ ଥିବା ମହାନଦୀ କୂଳରେ ନିର୍ମାଣ ହୋଇଛି ମେଗା ପାନୀୟଜଳ ପ୍ରକଳ୍ପ । କିନ୍ତୁ ଦୀପ ତଳ ଅନ୍ଧାର ଭଳି ଏହି ଦୁଇ ଗ୍ରାମକୁ ପାଣି ପାଇପ ପକାଯାଇଥିଲେ ମଧ୍ୟ ଦୀର୍ଘ ଦୁଇ ବର୍ଷ ହେଲା ପାନୀୟ ଜଳ ଯୋଗାଣ ହେଉନାହିଁ । ସେପଟେ ଦୁଇ ଗ୍ରାମର ନଳକୂପ ଜଳସ୍ତର ହ୍ରାସ ଯୋଗୁଁ ପ୍ରାୟ ଅଚଳ ଅବସ୍ଥାରେ ରହିଥିବା ଅଭିଯୋଗ ହୋଇଛି । ଗୋଟିଏ ପଟରେ ଜିଲ୍ଲାର ତାପମାତ୍ରା ୪୫ ଡିଗ୍ରୀ ଉପରେ ରହୁଥିବା ବେଳେ ଅନ୍ୟପଟରେ ପାଣି ମୁନ୍ଦାଏ ପାଇଁ ସ୍ଥାନୀୟ ଅଧିବାସୀମାନେ ଦୂର ଦୂରାନ୍ତରୁ ନଚେତ ଗାଁ ନିକଟରେ ଥିବା ପୋଖରୀର ଦୂଷିତ ପାନୀୟ ଜଳ ବ୍ୟବହାର କରିବାକୁ ବାଧ୍ୟ ହେଉଛନ୍ତି ।
ବର୍ତ୍ତମାନ ନିର୍ବାଚନ ସମୟରେ ବିଭିନ୍ନ ରାଜନୈତିକ ଦଳର ପ୍ରାର୍ଥୀମାନେ ଭୋଟ ଭିକ୍ଷା ପାଇଁ ଗାଁକୁ ଆସୁଥିବା ବେଳେ ଗ୍ରାମବାସୀମାନେ ପାନୀୟଜଳ ସଙ୍କଟ ଦୂର ନହେଲେ ଆଗାମୀ ସାଧାରଣ ନିର୍ବାଚନରେ ଭୋଟ ବର୍ଜନ କରିବାକୁ ସିଧାସଳଖ ଚେତାବନୀ ଦେଇଛନ୍ତି । ତେବେ ଆଜିଠାରୁ ପଞ୍ଚାୟତ ପକ୍ଷରୁ ଏହି ଦୁଇ ଗ୍ରାମର ଅଧିବାସୀଙ୍କୁ ଟ୍ୟାଙ୍କର ଯୋଗେ ପାଣି ଯୋଗାଣ ବ୍ୟବସ୍ଥା କରାଯାଇଥିଲେ ମଧ୍ୟ ତାହା ମଧ୍ୟ ନିଅଣ୍ଟିଆ ହେବାରୁ ଗ୍ରାମବାସୀମାନେ ତୀବ୍ର ଅସନ୍ତୋଷ ପ୍ରକାଶ କରିଛନ୍ତି । ଏନେଇ ତୁରନ୍ତ ବୌଦ୍ଧ ଜିଲ୍ଲା ପ୍ରଶାସନ ସ୍ବତନ୍ତ୍ର ଦୃଷ୍ଟି ଦେଇ ଆବଶ୍ୟକ ପଦକ୍ଷେପ ଗ୍ରହଣ କରିବାକୁ ଗ୍ରାମବାସୀ ଦାବି କରିଛନ୍ତି ।
ଇଟିଭି ଭାରତ, ବୌଦ୍ଧ
