ଭୁବନେଶ୍ୱର: ଯାତ୍ରା ମଞ୍ଚରେ ମନୋରଞ୍ଜନ ଆଳରେ ଆଉ ହୋଇପାରିବନି ଅଶ୍ଳୀଳତା ପ୍ରଦର୍ଶନ । ଖୁବଶୀଘ୍ର ଆସିବାକୁ ଯାଉଛି ଏହା ସମ୍ପର୍କିତ ଏକ ଗାଇଡଲାଇନ୍ । ସରକାର ଏହି ପ୍ରସଙ୍ଗରେ ଚିନ୍ତା କରୁଛନ୍ତି ଓ ଖୁବଶୀଘ୍ର ଏକ ନିର୍ଦ୍ଦେଶାବଳୀ ଆଣିବାକୁ ଯାଉଛନ୍ତି । ଏହି ନିର୍ଦ୍ଦେଶାବଳୀ ଅନୁସାରେ ହିଁ ଯାତ୍ରା କମିଟିମାନେ ଆୟୋଜନ କରିବେ ବୋଲି କହିଛନ୍ତି ଉଚ୍ଚଶିକ୍ଷା ତଥା ଭାଷା-ସାହିତ୍ୟ ଓ ସଂସ୍କୃତି ମନ୍ତ୍ରୀ ସୂର୍ଯ୍ୟବଂଶୀ ସୂରଜ ।
- କେବଳ ଆୟୋଜକ ନୁହନ୍ତି, ଦର୍ଶକ ମଧ୍ୟ ମାନସିକତାରେ ପରିବର୍ତ୍ତନ ଆଣନ୍ତୁ: ମନ୍ତ୍ରୀ
ଏହି ଗାଇଡଲାଇନ ସମ୍ପର୍କରେ ସଂସ୍କୃତି ମନ୍ତ୍ରୀ ସୂରଜ କହିଛନ୍ତି,‘‘ ସଂସ୍କୃତି ବିଭାଗ ପକ୍ଷରୁ ଯେଉଁ ସହଯୋଗ ଆବଶ୍ୟକ ପଡିବ, ଆଇନ ବିଭାଗକୁ ଆମେ ସହଯୋଗ କରିବୁ । ଅଶ୍ଳୀଳତାକୁ ନେଇ କେବଳ କମିଟିକୁ ଦାୟୀ କଲେ ହେବନି, ଦର୍ଶକମାନେ ମଧ୍ୟ କିଛି ମାତ୍ରାରେ ଦାୟୀ । ତେଣୁ ଆମେ ଆମ ମାନସିକତାରେ ସ୍ୱଚ୍ଛତା ଆଣିଲେ, ଯାତ୍ରାରେ ଅଶ୍ଳୀଳତା ହ୍ରାସ ପାଇବ । ’’ ଏହା ସହ ମନ୍ତ୍ରୀ ସୂରଜ ଏହି ପ୍ରସଙ୍ଗରେ ଆଇନମନ୍ତ୍ରୀ ପୃଥ୍ୱୀରାଜ ହରିଚନ୍ଦନ ମଧ୍ୟ ଯାହା କହିଥିଲେ, ତାକୁ ସମର୍ଥନ ମଧ୍ୟ କରିଛନ୍ତି ।
- ମନୋରଞ୍ଜନ ନାମରେ ଅଶ୍ଳୀଳତା ଓ ଲଗାମଛଡା ପ୍ରଦର୍ଶନ:-
କିଛି ଦିନ ହେବ ଯାତ୍ରା ମଞ୍ଚରେ ନୃତ୍ୟ ଓ ବ୍ୟଙ୍ଗ ଆଳରେ ଏକ ଅପସଂସ୍କୃତି ଆରମ୍ଭ ହୋଇଥିବା ଦେଖିବାକୁ ମିଳିଛି । ଅଶ୍ଳୀଳ ତଥା ଉତ୍ତେଜନାପୂର୍ଣ୍ଣ ନୃତ୍ୟ ପରିବେଷଣ କରାଇ ଅଧିକ ଦର୍ଶକଙ୍କୁ ଏକାଠି କରାଯିବାର ପ୍ରୟାସ ମଧ୍ୟ କରାଯାଉଛି । ଅନ୍ୟପଟେ ଆଇଟମ୍ ଡାନ୍ସରଙ୍କ ଅଶ୍ଳୀଳ ନୃତ୍ୟ ଓ ଲଗାମଛଡା ଉତ୍ତେଜକ ପ୍ରଦର୍ଶନ ଯାତ୍ରାରେ ଅପ୍ରୀତିକର ସ୍ଥିତି ମଧ୍ୟ ସୃଷ୍ଟି କରୁଛି । ନିକଟ ଅତୀତରେ ଏକାଧିକ ସ୍ଥାନରେ ଉତ୍ତେଜନା, ବିଶୃଙ୍ଖଳା ଓ ବିବାଦ ମଧ୍ୟ ସୃଷ୍ଟି ହେବାର ଅନେକ ରହିଛି । ଏହାକୁ ବରିଷ୍ଠ ନାଗରିକ, ବୁଦ୍ଧିଜୀବୀ ଓ ସଚେତନ ତଥା ସଂସ୍କୃତିପ୍ରେମୀଙ୍କ ଦ୍ୱାରା କଡା ବିରୋଧ ଓ ନିନ୍ଦା ମଧ୍ୟ କରାଯାଉଛି । ତଥାପି ଏକାଧିକ ଯାତ୍ରା ପାର୍ଟି ଓ ଆୟୋଜକ କମିଟି ଏହି ପ୍ରୟାସରୁ କ୍ଷାନ୍ତ ହେଉନାହାନ୍ତି ।
- ଅଶ୍ଳୀଳତା ପାଇଁ ମୁହଁ ଫେରାଇଲେଣି ମଞ୍ଚ କଳାପ୍ରେମୀ !
ଯାତ୍ରା ରାଜ୍ୟର ଗ୍ରାମାଞ୍ଚଳର ଏକ ପୁରାତନ ମନୋରଞ୍ଜନର ଲୋକପ୍ରିୟ ମାଧ୍ୟମ । ମାତ୍ର ଅଶ୍ଳୀଳ ପ୍ରଦର୍ଶନ କାରଣରୁ ବର୍ତ୍ତମାନ ସ୍ଥିତିରେ ସପରିବାର ଯାତ୍ରା ଦେଖିବା ସମ୍ଭବ ହେଉନାହିଁ । ବରିଷ୍ଠ ମଞ୍ଚ କଳାପ୍ରେମୀ ଦର୍ଶକ ବର୍ଗ ମଧ୍ୟ ଏହି କାରଣରୁ ଯାତ୍ରା ଦେଖିବା ବନ୍ଦ କରିସାରିଲେଣି । ଏବେ ସରକାର କେଉଁ ପ୍ରକାରର ନିର୍ଦ୍ଦାଶାବଳୀ ଆଣୁଛନ୍ତି ଓ ଫଳରେ ଅଶ୍ଳୀଳତାରେ କେତେ ରୋକ ଲାଗିବ, ତାହା ଉପରେ ସମସ୍ତଙ୍କ ନଜର ।
ଇଟିଭି ଭାରତ, ଭୁବନେଶ୍ବର
