ଭୁବନେଶ୍ବର: ନନ୍ଦନକାନନରେ 'ନାଇଟ୍ ଆଉଟ ଆଟ୍ ଜୁ’ । ନନ୍ଦନକାନନ ପ୍ରାଣୀ ଉଦ୍ୟାନ ପକ୍ଷରୁ ନୂଆ ବନ୍ୟପ୍ରାଣୀ ଶିକ୍ଷା କାର୍ଯ୍ୟକ୍ରମ ଆରମ୍ଭ କରାଯାଇଛି । ଆଜିଠୁ ନୂଆ ବନ୍ୟପ୍ରାଣୀ ଶିକ୍ଷା କାର୍ଯ୍ୟକ୍ରମ ‘ନାଇଟ୍ ଆଉଟ ଆଟ୍ ଜୁ’ ଆରମ୍ଭ ହୋଇଛି । ବିଶେଷ ଭାବରେ ସନ୍ଧ୍ୟା ୬ ଟା ୩୦ ରୁ ରାତି ୮ ଟା ଯାଏଁ ବୁଲିବାକୁ ଅନୁମତି ଦିଆଯାଇଛି । ଏହି କାର୍ଯ୍ୟକ୍ରମ ପାଇଁ କେବଳ ରବିବାର ଦିନ ଅନୁମତି ଦିଆଯାଇଛି । ଏଥିରେ ଏକକାଳୀନ ୨୦ ଜଣ ଭାଗ ନେଇପାରିବେ । ୨୫୦ ଟଙ୍କା ଦେଇ ଅନଲାଇନ ରେଜିଷ୍ଟ୍ରେସନ କରିବା ସହ ବ୍ୟାଟେରୀ ଗାଡ଼ିରେ ବୁଲିବାର ସୁଯୋଗ ପାଇବେ ପର୍ଯ୍ୟଟକ । ଯେଉଁଥିରେ ନନ୍ଦନକାନନ ପ୍ରାଣୀ ଉଦ୍ୟାନର ଜୀବଜନ୍ତୁମାନେ ଚଳ ପ୍ରଚଳ କରୁଥିବାର ଦୃଶ୍ୟ ଦେଖିବାକୁ ମିଳିବ । ଏଥିରେ ଅଂଶଗ୍ରହଣକାରୀମାନେ ଜୀବଜନ୍ତୁଙ୍କ ରାତ୍ରି ସମୟର ଚାଲିଚଳନ ବିଷୟରେ ଜାଣିପାରିବେ ।
ଏହି କାର୍ଯ୍ୟକ୍ରମ ପାଇଁ ପ୍ରତିଦିନ କେବଳ 20 ଜଣ ଅଂଶଗ୍ରହଣକାରୀଙ୍କୁ ଅନୁମତି ଦିଆଯିବ । ବ୍ୟାଟେରୀ ଚାଳିତ ଯାନ ଗୁଡିକ ଅଂଶଗ୍ରହଣକାରୀଙ୍କ ପାଇଁ କର୍ତ୍ତୃପକ୍ଷଙ୍କ ଦ୍ଵାରା ବ୍ୟବହୃତ କରାଯିବାର ବ୍ୟବସ୍ଥା କରାଯାଇଛି । ନନ୍ଦନକାନନର ୱେବସାଇଟ୍ ମାଧ୍ୟମରେ ଅନଲାଇନ ପଞ୍ଜୀକରଣ ପାଇଁ ଅନୁମତିପ୍ରାପ୍ତ କରାଯାଇଛି । www.nandankanan.org ୱେବସାଇଟରେ ପଞ୍ଜୀକୃତ ଅଂଶଗ୍ରହଣକାରୀମାନେ ମଲ୍ଟି ଲେଭଲ୍ କାର୍ ପାର୍କିଂ ସୁବିଧାରେ ସନ୍ଧ୍ୟା ୬ ଟା ୧୫ ମିନିଟରେ ରିପୋର୍ଟ କରିବା ଆବଶ୍ୟକ। ଏହି ନାଇଟ୍ ଆଉଟ ସନ୍ଧ୍ୟା ୬ ଟା ୩୦ ମିନିଟରୁ ଆରମ୍ଭ ହୋଇ ରାତି ୮ ଟା ପର୍ଯ୍ୟନ୍ତ ଚାଲୁ ରହିବ । ଅଂଶଗ୍ରହଣକାରୀମାନେ ପ୍ରବେଶ ସମୟରେ ଅନଲାଇନ ଟିକେଟ୍ ରଖିଥିବା ଆବଶ୍ୟକ । ଏହି କାର୍ଯ୍ୟକ୍ରମ ସମୟରେ ଅଂଶଗ୍ରହଣକାରୀମାନଙ୍କୁ ସେମାନଙ୍କ ସହିତ କୌଣସି ବ୍ୟାଗ କିମ୍ବା କିଛି ସାମଗ୍ରୀ ବହନ କରିବାକୁ ଅନୁମତି ଦିଆଯିବନାହିଁ ।
ଏହା ମଧ୍ୟ ପଢନ୍ତୁ...ହାତୀ ପଢିବେ ପାଠ, ନନ୍ଦନକାନନରୁ ଗଲା ହାତୀ ଛୁଆ ‘ମାମା’
ଅଂଶଗ୍ରହଣକାରୀମାନେ ପ୍ରାଣୀ ଉଦ୍ୟାନର କର୍ମଚାରୀ କିମ୍ବା ସ୍ବେଚ୍ଛାସେବୀଙ୍କ ନିର୍ଦ୍ଦେଶକୁ ଅନୁସରଣ କରିବା ଆବଶ୍ୟକ । ତେବେ ଅଂଶଗ୍ରହଣକାରୀମାନଙ୍କୁ ସେମାନଙ୍କର ଫଟୋ କିମ୍ବା ଭିଡିଓ ରେକର୍ଡିଂ ପାଇଁ ଉପକରଣ ଆଣିବାକୁ ଅନୁମତି ଦିଆଯିବନାହିଁ । କାର୍ଯ୍ୟକ୍ରମ ସମୟରେ ଭିଡିଓଗ୍ରାଫି ଏବଂ ଫଟୋଗ୍ରାଫି ଅନୁମତିପ୍ରାପ୍ତ ନୁହେଁ । ସୂଚନା ଅନୁଯାୟୀ, ନନ୍ଦନକାନନ ପ୍ରାଣୀ ଉଦ୍ୟାନରେ ପାଖାପାଖି ୧୬୬ଟି ପ୍ରଜାତିର ପାଖାପାଖି ୧୬୬୦ଟି ଜୀବଜନ୍ତୁ ଅଧିବାସ କରନ୍ତି । ଏଥିରେ ୬୭ଟି ପ୍ରଜାତିର ସ୍ତନ୍ୟପାୟୀ, ୮୧ ପ୍ରଜାତିର ପକ୍ଷୀ ଓ ୧୮ଟି ପ୍ରଜାତିର ସରୀସୃପ ରହିଛନ୍ତି ।
ଇଟିଭି ଭାରତ, ଭୁବନେଶ୍ବର
