କଟକ: ମେଡିକାଲ ପରିସରରୁ ମିଳିଲା ନବଜାତ ଶିଶୁ । ଏଭଳି ଏକ ଅଭାବନୀୟ ଘଟଣା ଦେଖିବାକୁ ମିଳିଛି କଟକ SCB ମେଡିକାଲରେ । ହେପାଟୋଲୋଜି ବିଭାଗ ପାର୍ଶ୍ଵ ଝରକା ନିକଟରେ ପଡିଥିଲା ଏକ ନବଜାତ । ପ୍ରାଥମିକସ୍ତରରୁ ଏହି ଶିଶୁର ଓଜନ ଦେଢ଼ କେଜି ବୋଲି ଜଣାପଡିଛି । ଏହାସହ 7 ମାସର ପ୍ରିମ୍ୟାଚୁଆର ବେବି ବୋଲି ସ୍ପଷ୍ଟ ହୋଇଛି । ସ୍ତ୍ରୀ ଓ ପ୍ରସୂତି ବିଭାଗର ରେଣୁକା ପରିଡା ବୋଲି ଜଣେ କର୍ମଚାରୀ ଏହି ଶିଶୁକୁ ଦେଖିଲା ପରେ ତଙ୍କୁ ଉଦ୍ଧାର କରି ସ୍ତ୍ରୀ ଓ ପ୍ରସୂତି ବିଭାଗର SNCUରେ ଭର୍ତ୍ତି କରିଛନ୍ତି ।
ତେବେ ପ୍ରତ୍ୟକ୍ଷଦର୍ଶୀଙ୍କ କହିବାନୁଯାୟୀ ଯେ, ତାଙ୍କର ପରିବାର ସଦସ୍ୟ ହେପାଟୋଲୋଜି ବିଭାଗରେ ଆଡ଼ମିସନ ହୋଇଥିବାବେଳେ ତାଙ୍କୁ ଦେଖା କରିବା ପାଇଁ ଆସିଥିଲେ । ହେଲେ ଦେଖିବା ବେଳକୁ ବିଭାଗ ଝରକା ପାଖରେ ଏକ ଶିଶୁ ପଡିଥିବାର ଦେଖିବାକୁ ପାଇଥିଲେ । ସଙ୍ଗେସଙ୍ଗେ ତାହାକୁ ଉଦ୍ଧାର କରିବା ସମୟରେ ପେଡ଼ିଆଟିକ ବିଭାଗର କର୍ମଚାରୀ ଉକ୍ତ ନବଜାତ ଶିଶୁକୁ ଉଦ୍ଧାରକାରୀ ଟିମ ଏକ ଆମ୍ବୁଲାନ୍ସ ଜରିଆରେ ସ୍ତ୍ରୀ ଓ ପ୍ରସୂତୀ ବୁଭାଗକୁ ସ୍ଥାନାନ୍ତରିତ କରିଥିଲେ ।"
‘SCB ଜନ୍ମିତ ହୋଇଥିବା ନେଇ କୌଣସି ପ୍ରମାଣ ନାହିଁ’
ସେପଟେ SCB କୁଳସଚିବ ଅଭିନାସ ରାଉତ୍ କହିଛନ୍ତି,"ଏହି ନବଜାତ ଶିଶୁ SCB ଜନ୍ମିତ ହୋଇଥିବା ନେଇ କୌଣସି ପ୍ରମାଣ ନାହିଁ । ବାହାରୁ କିଏ ଫିଙ୍ଗିଛି କିମ୍ବା ଏହି ଘଟଣାରେ SCBର କଣ ସମ୍ପୃକ୍ତି ରହିଛି ସେନେଇ ପୋଲିସର ସହାୟତା ନିଆଯାଇଛି । ଗୋଟିଏ ପଟେ ସିସିଟିଭି ଯାଞ୍ଚ ଚାଲିଥିଲାବେଳେ ଏପର୍ଯ୍ୟନ୍ତ ମିଳି ପାରିଲା ନାହିଁ ଶିଶୁର ବାପା-ମାଆଙ୍କ ପରିଚୟ । ତେବେ ଶିଶୁଟି ୨୬ ମାସରେ ଜନ୍ମ ଗ୍ରହଣ କରିଥିବା ସହ ଓଜନ ୧୫୦୦ ଗ୍ରାମ ରହିଥିବା କାରଣରୁ ସ୍ବାସ୍ଥ୍ୟାବସ୍ଥା ଠିକ୍ ନଥିବା ଜଣାପଡ଼ିଛି । "
କଣ କହିଲେ ଡିସିପି:
ତେବେ ନବଜାତ କେଉଁଠୁ ଆସିଲା ଓ କିଏ କେଉଁ ପରିସ୍ଥିତିରେ ଛାଡ଼ିଲା, ତାହାକୁ ନେଇ ମଙ୍ଗଳାବାଗ ଥାନାକୁ ଅବଗତ କରାଯାଇଛି । ଶିଶୁଟି SCBରେ ଜନ୍ମ ହୋଇନଥିବା ବେଳେ କିପରି ଏଠାକୁ ଆସିଲା ତାହାକୁ ନେଇ ଆରମ୍ଭ ହୋଇଛି ଖୋଳତାଡ । ଏନେଇ ମଙ୍ଗଳାବାଗ ଥାନାରେ ନବଜାତ ଶିଶୁ ମିଳିବା ନେଇ ଏକ ଷ୍ଟେସନ ଡାଏରି କରାଯାଇଛି । SCB ଓ ଏହାର ଆଖପାଖରେ ଥିବା ସମସ୍ତ CC TVକୁ ଯାଞ୍ଚ କରାଯିବ ବୋଲି କହିଛନ୍ତି ଅତିରିକ୍ତ ଡିସିପି ଅନିଲ କୁମାର ମିଶ୍ର ।
ଇଟିଭି ଭାରତ,କଟକ
