ପୁରୀ: ପୁରୀ ରେଲୱେ ଷ୍ଟେସନରୁ ୧୫୦ଟି ଜୀବନ୍ତ ଗୁଳି ଉଦ୍ଧାର । ନୂଆଦିଲ୍ଲୀ-ପୁରୀ ପୁରୁଷୋତ୍ତମ ଏକ୍ସପ୍ରେସ ଏସ-୨ ସ୍ଲିପର କୋଚର ଏକ ସିଟ ତଳୁ ଏହି ବ୍ୟାପକ ଗୁଳି ଜବତ କରିଛି ରେଳବାଇ ପୋଲିସ । ଏକ କଳା ରଙ୍ଗର ବ୍ୟାଗ ମଧ୍ୟରୁ ‘ଆରଫିଏଫ’ ପୋଲିସ ଜୀବନ୍ତ ଗୁଳିଗଡିକୁ ଜବତ କରିଛି । ଏନେଇ ‘ଆରପିଏଫ’ ପକ୍ଷରୁ ଜିଆରପି ପୋଲିସକୁ ଅବଗତ କରାଯିବା ପରେ ପୋଲିସ ଏ ସଂକ୍ରାନ୍ତରେ ଏକ ମାମଲା ରୁଜୁ କରି ଅନୁସନ୍ଧାନ ଆରମ୍ଭ କରିଛି ।
- ନୂଆଦିଲ୍ଲୀ-ପୁରୀ ପୁରୁଷୋତ୍ତମ ଏକ୍ସପ୍ରେସରୁ ଜବତ
ମିଳିଥିବା ସୂଚନା ଅନୁସାରେ ଦୀପାବଳି ଯାଞ୍ଚକୁ ଦୃଷ୍ଟିରେ ରଖି ‘ଆରପିଏଫ’ କର୍ମଚାରୀମାନଙ୍କ ପକ୍ଷରୁ ଷ୍ଟେସନରେ ଛିଡା ହୋଇଥିବା ଟ୍ରେନର ବଗିଗୁଡିକୁ ଯାଞ୍ଚ କରାଯାଉଛି । ତେବେ ‘ଆରଫିଏଫ’ ଏଏସଆଇ ଦୀପକ କୁମାର ପଟ୍ଟନାୟକ କିଛି କର୍ମଚାରୀଙ୍କୁ ଧରି ପୁରୀ ରେଳ ଷ୍ଟେସନର କୋଚିଂ ଡିପୋ ଏବଂ ପ୍ଲାଟଫର୍ମର ତଦାରଖ କରୁଥିଲେ । ଡ୍ୟୁଟି ସମୟରେ ସେ କୋଚିଂ ଡିପୋ ସୁଇପରଙ୍କଠାରୁ ଦିଲ୍ଲୀରୁ ଆସିଥିବା ପୁରୁଷତ୍ତୋମ ଏକ୍ସପ୍ରେସ ଟ୍ରେନ-ନଂ ୧୨୮୦୨ର ଏସ-୨ କୋଚରେ ୭୩ରେ ସିଟ୍ ତଳେ ଏକ କଳା ରଙ୍ଗର ବ୍ୟାଗ ପଡିଥିବା ନେଇ ସୂଚନା ପାଇଥିଲେ ।
- କଳା ରଙ୍ଗର ବ୍ୟାଗରେ ଥିବା 15 ପ୍ୟାକେଟ ଗୁଳି
ଖବର ପାଇ ପଟ୍ଟନାୟକଙ୍କ ନେତୃତ୍ବରେ ପୋଲିସ ଟିମ୍ ଘଟଣାସ୍ଥଳକୁ ଯାଇ ଦେଖିଥିଲେ, କି ଏକ କଳା ରଙ୍ଗର ଛୋଟ ବ୍ୟାଗ ଉକ୍ତ ବଗିର ୭୩-ନମ୍ୱର ସିଟରେ ପଡ଼ିଛି । ଉପରିସ୍ଥ ଅଧିକାରୀଙ୍କୁ ଜଣାଇବା ସହ ବ୍ୟାଗ ଖୋଲା ଯାଇଥିଲା । ବ୍ୟାଗରେ ୧୫ ପ୍ୟାକେଟ୍ ଗୁଳି ମିଳିଥିଲା । ପ୍ରତ୍ୟକ ପ୍ୟାକେଟରେ ୮-ଏମଏମର ଜୀବନ୍ତ ଗୁଳି ରହିଥିଲା । ଏହିପରି ଭାବରେ ୧୫ଟି ପ୍ୟାକେଟରୁ ୧୦ଗୋଟି ହିସାବରେ ୧୫୦ଟି ଜୀବନ୍ତ ଗୁଳିକୁ ରେଳବାଇ ପୋଲିସ ଜବତ କରିଛି ।
- ସନ୍ଦିଗ୍ଧର ଏକାଧିକ ପୋଷାକ ମଧ୍ୟ ଜବତ
ଏଥିସହ ଏକାଧିକ ପୋଷାର ଓ ଗୋଟିଏ କପଡା ବ୍ୟାଗକୁ ମଧ୍ୟ ପୋଲିସ ଜବତ କରିଛି । ତେବେ ଉକ୍ତ ବ୍ୟାଗ କାହାର ଓ ଉକ୍ତ ବ୍ୟକ୍ତି କେଉଁ ଉଦ୍ଦେଶ୍ୟରେ ଏତେ ପରିମାଣର ଗୁଳି ସାଥିରେ ଆଣିଥିଲେ, ସେନେଇ ରେଳବାଇ ପୋଲସ ପକ୍ଷରୁ ତଦନ୍ତ କରାଯାଉଛି । କେସ ନଂ ୯୦/୨୪ରେ ମାମଲା ରୁଜୁ କରିବା ସହ ଏସ-୨୫ (ଏ-୧) ଆର୍ମ ଆକ୍ଟରେ ତଦନ୍ତ ଆରମ୍ଭ କରିଛି ।
ଇଟିଭି ଭାରତ, ପୁରୀ
