କେନ୍ଦ୍ରାପଡ଼ା: ପୁଣି ସାମ୍ନାକୁ ଆସିଲା ଦାଦନ ଯନ୍ତ୍ରଣାର କରୁଣ ଦୃଶ୍ୟ । ପରିବାରର ପ୍ରତିପୋଷଣ ପାଇଁ ବାହାର ରାଜ୍ୟକୁ କାମ କରିବାକୁ ଯାଇ ସେଠାରେ ସଡ଼କ ଦୁର୍ଘଟଣାରେ ପ୍ରାଣ ହରାଇଛନ୍ତି କେନ୍ଦ୍ରାପଡ଼ାର ଜଣେ ବ୍ୟକ୍ତି । ଗତ କିଛି ମାସ ତଳେ ଗୁଜୁରାଟ ରାଜ୍ୟର ସୁତାକଳରେ କାମ କରିବାକୁ ଯାଇଥିଲେ କେନ୍ଦ୍ରାପଡ଼ାର ଜଣେ ଯୁବକ । ସେଠାରେ ସଡ଼କ ଦୁର୍ଘଟଣାରେ ତାଙ୍କର ଜୀବନ ଯାଇଛି । ସେପଟେ ପରିବାର ପୋଷଣ କରୁଥିବା ପୁଅର ମୃତ୍ୟୁରେ ମ୍ରିୟମାଣ ଶଯ୍ୟାଶାୟୀ ହୋଇଛି ମାଆ।
ଦୁର୍ଘଟଣାରେ ପ୍ରବାସୀ ଶ୍ରମିକ ମୃତ:
ସୂଚନା ଅନୁସାରେ, ମୃତକ ହେଉଛନ୍ତି ଶରତ କୁମାର ଜିଆ । କେନ୍ଦ୍ରାପଡ଼ା ଜିଲ୍ଲା ରାଜକନିକା ଥାନା ଅଚ୍ୟୁତପୁରରେ ଶରତଙ୍କ ଘର । ମୃତକଙ୍କ ସମ୍ପର୍କୀୟ ହୃଷୀକେଶ ଜିଆଙ୍କ କହିବା ଅନୁଯାୟୀ, "ଶରତ ନିଜ ପରିବାର ପ୍ରତିପୋଷଣ ଲାଗି ୬ ମାସ ହେବ ଗୁଜୁରାଟ ଯାଇଥିଲେ । ସେଠାରେ ଥିବା ଏକ ସୂତାକଳରେ ସେ ଶ୍ରମିକ ଭାବେ କାମ କରି ପରିବାର ପ୍ରତିପୋଷଣ କରୁଥିଲେ। ସବୁଦିନ ପରି ଗତ ଶନିବାର ଦିନ କମ୍ପାନୀ କାମ ସାରି ସାଇକେଲ ଯୋଗେ ଭଡ଼ା ଘରକୁ ଫେରୁଥିଲେ । ଏହି ସମୟରେ ଶରତ ସଡ଼କ ଦୁର୍ଘଟଣାର ସମ୍ମୁଖୀନ ହୋଇଛନ୍ତି । ମେଡିକାଲ ନେବା ପରେ ସେଠାରେ ତାଙ୍କୁ ଡାକ୍ତର ମୃତ ଘୋଷଣା କରିଛନ୍ତି ।"
ମୃତଦେହ ଫେରାଇ ଆଣିବାକୁ ନିବେଦନ:
ଶରତଙ୍କର ପୁତୁରା ବିଘ୍ନେଶ୍ବର ମିଶ୍ରଙ୍କ କହିଛନ୍ତି ,"ଶରତଙ୍କ ଘରେ ପତ୍ନୀ ସରସ୍ବତୀ ଓ ଦୁଇ ଛୋଟ ଛୋଟ ପୁଅ ରହିଥିବାବେଳେ ସ୍ୱାମୀଙ୍କ ମୃତଦେହକୁ ଘରକୁ ଆଣିବାକୁ ପାଖରେ ଟଙ୍କା ଟିଏ ନାହିଁ । ଏପରିକି ଗୁଜୁରାଟ ଯାଇ ଅନ୍ତିମ ସଂସ୍କାର କରିବାକୁ ମଧ୍ୟ ସକ୍ଷମ ନୁହନ୍ତି ପରିବାର । ତେଣୁ ମୁଖ୍ୟମନ୍ତ୍ରୀ ଓ କେନ୍ଦ୍ରାପଡ଼ା ସାଂସଦଙ୍କୁ ଏନେଇ ଗୁହାରି କରିଛନ୍ତି । ଏହା ସହିତ ସ୍ବାମୀଙ୍କ ମୃତଦେହ ଫେରାଇ ଆଣିବାକୁ ଜିଲ୍ଲାପାଳଙ୍କୁ ନିବେଦନ କରିଥିବା କହିଛନ୍ତି ଶରତଙ୍କ ପତ୍ନୀ । ଅନ୍ୟପଟେ ରବିବାର କେନ୍ଦ୍ରାପଡ଼ା ସାଂସଦଙ୍କ ଆଳି ଗସ୍ତ ସମୟରେ ମୃତକଙ୍କ ପରିବାର ଲୋକେ ସାଂସଦଙ୍କୁ ମଧ୍ୟ ମୃତଦେହ ଫେରାଇ ଆଣିବାକୁ ଅନୁରୋଧ କରିଛନ୍ତି ।
