ଭୁବନେଶ୍ବର: ଆବାସ ଘର ଭଡ଼ା ଲାଗିବା ପ୍ରସଙ୍ଗ । ପ୍ରତିକ୍ରିୟା ରଖିଲେ ମେୟର ସୁଲୋଚନା ଦାସ । ବିଡିଏର ରିପୋର୍ଟ ଅନୁସାରେ ଘର ବଣ୍ଟାଯାଇଥିବା କହିଛନ୍ତି ମେୟର । ଆବାସ ଘରକୁ ଭଡ଼ା ଦେଉଥିବା ପ୍ରମାଣ ମିଳିଲେ SOP ଅନୁସାରେ ତାଙ୍କୁ ହିତାଧିକାରୀ ତାଲିକାରୁ ବାଦ୍ ଦିଆଯିବ । ଏହାସହ କଡ଼ା କାର୍ଯ୍ୟାନୁଷ୍ଠାନ ନିଆଯିବ ବୋଲି ମେୟର ସ୍ପଷ୍ଟ କରିଛନ୍ତି ।
ଆବାସ ଘରକୁ ଭଡ଼ା ପ୍ରସଙ୍ଗ:
ମେୟର ସୁଲୋଚନା ଦାସ କହିଛନ୍ତି, "ବିଏମସି ଅଧୀନରେ ବର୍ତ୍ତମାନ 11ଟି ପ୍ରୋଜେକ୍ଟ ରହିଛି । ଯାହା ଭିତରୁ ୪ଟି ପ୍ରୋଜେକ୍ଟରେ କାମ ସରିଛି ଓ ୭ଟି କାମ ଚାଲିଛି । ପୂର୍ବ ୪ଟିରେ ପ୍ରୋଜେକ୍ଟ ଥିଲା ଯେଉଁଥିରେ କୌଣସି ସମସ୍ୟା ନାହିଁ । କିନ୍ତୁ ପରବର୍ତ୍ତୀ ପ୍ରୋଜେକ୍ଟ ଅନୁସାରେ ଯେଉଁ ଘର ଦିଆଯାଇଛି ତାର ତାଲିକା ବିଡିଏ ଦେଲା ଓ ବିଏମସି କେବଳ ଆଲଟ କରିଛି । କିନ୍ତୁ ପରବର୍ତ୍ତୀ ପର୍ଯ୍ୟାୟରେ ଅଭିଯୋଗ ଆସୁଛି ଯେଉଁମାନଙ୍କର ଗାଡ଼ି, ଘର ଅଛି ସେମାନେ ମଧ୍ୟ ଘର ନେଇଛନ୍ତି । ସେମିତି ୨ ଘର କ୍ୟାନସେଲ ପାଇଁ ମଧ୍ୟ ନିର୍ଦ୍ଦେଶ ଦିଆଯାଇଛି । ଏହାସହ ଏହି ଘର ଗୁଡ଼ିକୁ ସେମାନେ ଭଡ଼ାରେ ଲଗାଉଛନ୍ତି । ମୈତ୍ରିବିହାର ଥାନା ନୀଳମାଧବ ଆବାସ ବିଷୟରେ ଖବର ପାଇଛୁ ସେ ଘର ଭଡ଼ାରେ ଦିଆଯାଇଥିଲା । ସେ ଘଟଣା ନେଇ ତଦନ୍ତ ହେଉଛି ଯଦି ଏହା ସତ ହୋଇଥିବ ତେବେ ସେ ବିଷୟରେ କଡା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ । ଆବଶ୍ୟକ ପଦକ୍ଷେପ ଅନୁସାରେ ଘର କ୍ୟାନସେଲ କରାଯିବ । ବିଡିଏ ରିପୋର୍ଟ ଅନୁଯାୟୀ ଆମେ ଘର ବାଣ୍ଟିଛୁ। କେଉଁଠି ସମସ୍ୟା ରହିଥିଲା ସେ ଉତ୍ତର ବିଡିଏ ଦେଇପାରିବ।"
ଦୁର୍ଗାପୂଜା ପାଇଁ BMCର ପ୍ରସ୍ତୁତି:
ଦୁର୍ଗାପୂଜା ପ୍ରସଙ୍ଗରେ ମେୟର କହିଛନ୍ତି, "ପୂର୍ବ ଥର ଭଳି ନିର୍ଦ୍ଦେଶାବଳୀ ରହିବ। ପୂଜା ସମୟରେ ପ୍ଲାଷ୍ଟିକ ବ୍ୟବହାର ନିଷେଧ ହୋଇଛି । ପେଣ୍ଡାଲ ନିକଟରେ ଡଷ୍ଟବିନ ରହିବ। ପୂଜା ପଣ୍ଡାଲ ନିକଟରୁ ୨ ଥର ଅଳିଆ ଗାଡ଼ି ଯାଇ ଅଳିଆ ନେଇ ଆସିବ। ସୂଚନା ପାଇଁ ପୂଜାମଣ୍ଡପରେ ସୂଚନା କେନ୍ଦ୍ର ରହିବ । ସମ୍ପୂର୍ଣ୍ଣ ଜୈବିକ ପଦ୍ଧତିର ପୂଜା ପେଣ୍ଡାଲ ପ୍ରସ୍ତୁତ ହେବ। ଏହାସହ ବିସର୍ଜନ ପାଇଁ ୫ଟି ଅସ୍ଥାୟୀ ଜଳାଶୟ ନିର୍ମାଣ କରାଯାଇଛି । ପୂଜା ପୂର୍ବରୁ ରାସ୍ତା ମରାମତି ନେଇ ଯେଉଁ ଡେଡ ଲାଇନ୍ ଦିଆଯାଇଥିଲା ପ୍ରବଳ ବର୍ଷା ଓ ପାଗ ଖରାପ କାରଣରୁ ତାହା ହୋଇପାରିନଥିଲା। ବର୍ତ୍ତମାନ ଯୁଦ୍ଧ କାଳୀନ ଭିତିରେ କାମ ଚାଲିଛି । ପୂଜା ପୂର୍ବରୁ ସାରିବାକୁ ଚେଷ୍ଟା କରାଯାଉଛି। ପୂର୍ତ୍ତ ବିଭାଗ ଅଧିନରେ ଥିବା ରାସ୍ତା କାମ ସାରିବାକୁ ସେମାନଙ୍କୁ କୁହାଯାଇଛି । ତେଣୁ ସେମାନେ ମଧ୍ୟ କାମ ଜାରି ରଖିଛନ୍ତି ।"
ଇଟିଭି ଭାରତ, ଭୁବନେଶ୍ବର
