ଭୁବନେଶ୍ବର: ଅଲିଭ୍ ରିଡଲେ ବସା ବାନ୍ଧିବା ସମୟରେ ବିପଦ ସାଜୁଛନ୍ତି ଭ୍ରମଣକାରୀ । ସୁରକ୍ଷାକୁ ଦୃଷ୍ଟିରେ ରଖି ଭ୍ରମଣକାରୀଙ୍କ ପ୍ରବେଶ ନିଷେଧ କରାଯାଇଛି । ଏନେଇ ବନ୍ୟ ମୁଖ୍ୟାଳୟ ପକ୍ଷରୁ ନିର୍ଦ୍ଦେଶ ଜାରି କରାଯାଇଛି । ଅଲିଭ୍ ରିଡଲେ କଇଁଛ ଆମ ରାଜ୍ୟର ପର୍ଯ୍ୟଟନ ଦୃଷ୍ଟି କୋଣରୁ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରୁଛି । ଓଡିଶାର ସାମୁଦ୍ରିକ ତଟ ଗହୀରମଥା ବନ୍ୟପ୍ରାଣୀ ଅଭୟାରଣ୍ୟ, ଭିତରକନିକା ଅଭୟାରଣ୍ୟ, ଦେବୀ ନଦୀ ମୁହାଣ, ବାଲୁଖଣ୍ଡ ବନ୍ୟପ୍ରାଣୀ ଅଭୟାରଣ୍ୟ, ଋଷିକୂଲ୍ୟା ବନ୍ୟପ୍ରାଣୀ ଅଭୟାରଣ୍ୟ ନଦୀ ତଟକୁ ପ୍ରତି ବର୍ଷ ଲକ୍ଷାଧିକ ସଂଖ୍ୟାରେ ଅଲିଭ ରିଡଲେ କଇଁଛ ଅଣ୍ଡା ଦେବାକୁ ଆସିଥାନ୍ତି।
କଇଁଛ ଓ ଅଣ୍ଡାକୁ ସୁରକ୍ଷା ଦେବା ପାଇଁ ପ୍ରତି ବର୍ଷ ରାଜ୍ୟ ସରକାରଙ୍କ ପକ୍ଷରୁ ପଦକ୍ଷେପ ନିଆଯାଉଛି । ବିଶେଷ ଭାବରେ ଦେଖାଯାଏ ଯେ, ଅଲିଭ୍ ରିଡଲେ ସମୁଦ୍ର କଇଁଛମାନଙ୍କର ବହୁଳ ବସା ବାନ୍ଧିବା ସ୍ଥାନକୁ ପର୍ଯ୍ୟଟକମାନଙ୍କ ପ୍ରବେଶ କରିଥାନ୍ତି । କାଇଁଛମାନେ ବସା ବାନ୍ଧିବା ଏବଂ ଅଣ୍ଡାରୁ ବାହାରୁଥିବା ଛୋଟ କଇଁଛ ଶାବକମାନଙ୍କୁ ଦେଖିବା ପାଇଁ ପର୍ଯ୍ୟଟକମାନେ ବିଶେଷ ଭାବରେ କଇଁଛମାନଙ୍କର ଫଟୋ ଏବଂ ଭିଡିଓ କରିଥାନ୍ତି । ଏହା କରିବାକୁ ହେଲେ ଉଜ୍ଜ୍ୱଳ ଆଲୋକର ବ୍ୟବହାର କରୁଛନ୍ତି । ଏହା ସହ ଅନେକ କ୍ଷେତ୍ରରେ ମଧ୍ୟ ପର୍ଯ୍ୟଟକମାନଙ୍କ କ୍ଷେତ୍ରରେ ଅନୁପଯୁକ୍ତ ଆଚରଣ ପରିଲକ୍ଷିତ ହୋଇଥାଏ । ଏହି କାର୍ଯ୍ୟକଳାପ ଗୁଡ଼ିକ କଇଁଛ ବସା ବାନ୍ଧିବା ସ୍ଥାନଗୁଡିକର ଭିଡ଼ ସହିତ କଇଁଛ ବସା ବାନ୍ଧିବା ଏବଂ ବହୁ ପରିମାଣରେ ଶାବକ ଉତ୍ପାଦନ ପ୍ରକ୍ରିୟାକୁ ସାଧାରଣ ଭାବରେ ବ୍ୟାହତ କରିଥାଏ ।
ତେଣୁ ବନ୍ୟଜନ୍ତୁ (ସୁରକ୍ଷା) ଅଧିନିୟମ, 1972 ର ଅନୁସୂଚୀ -1 ଅନୁଯାୟୀ ଅଲିଭ୍ ରିଡଲେ ସମୁଦ୍ର କଇଁଛକୁ ସୁରକ୍ଷିତ କରାଯାଇଛି ଏବଂ ଉକ୍ତ ଆଇନର ଧାରା -9 ଅନୁଯାୟୀ ନିଷେଧ କରାଯାଇଥିବା ଧାରା -2 (16) ଅନୁଯାୟୀ ଉପରୋକ୍ତ କାର୍ଯ୍ୟକଳାପ ଶିକାରର ପରିଭାଷା ଅନୁଯାୟୀ ଆସିଛି । ଏହାକୁ ଦୃଷ୍ଟିରେ ରଖି ନିର୍ଦ୍ଦେଶ ଦିଆଯାଇଛି ଯେ, ଅଲିଭ୍ ରିଡଲେ ସମୁଦ୍ର କଇଁଛମାନଙ୍କର ସମସ୍ତ ବସା ବାନ୍ଧିବା ସ୍ଥାନ ଗୁଡିକ ଏବଂ ବସା ବାନ୍ଧିବା ଶେଷ ହେବା ପର୍ଯ୍ୟନ୍ତ ସମସ୍ତ ଭ୍ରମଣକାରୀଙ୍କ ପାଇଁ ବସା ବାନ୍ଧିବା ସମୟ ମଧ୍ୟରେ ବନ୍ଦ ରହିବ।
ସୂଚନା ଅନୁଯାୟୀ, ପ୍ରତିବର୍ଷ ନଭେମ୍ବର ପହିଲାରୁ ମେ' ୩୧ ତାରିଖ ପର୍ଯ୍ୟନ୍ତ ଓଡ଼ିଶା ଉପକୂଳର ଧାମରା, ଦେବୀ ଓ ଋଷିକୂଲ୍ୟା ନଦୀ ମୁହାଣ ନିକଟବର୍ତ୍ତୀ ଅଞ୍ଚଳରେ ୨୦ କିଲୋମିଟର ମଧ୍ୟରେ ମୋଟରଚାଳିତ ଜାହାଜ, ଟ୍ରଲର ଏବଂ ଯାନ୍ତ୍ରିକ ମାଛଧରା କୌଶଳ ଦ୍ୱାରା ମାଛ ଧରିବା ନିଷେଧ କରାଯାଇଛି। ଏହା ସହ ସମସ୍ତ ସୁରକ୍ଷା ଆଦିକୁ ଦୃଷ୍ଟିରେ ରଖି ସମସ୍ତ ପଦକ୍ଷେପ ଗ୍ରହଣ କରୁଛନ୍ତି ରାଜ୍ୟ ସରକାର ।
ଇଟିଭି ଭାରତ, ଭୁବନେଶ୍ବର
