ଆମ୍ବ ଟାକୁଆ ରିପୋର୍ଟକୁ ନେଇ ଦ୍ବନ୍ଦ୍ବ, ହାଇଡ୍ରାଜେନ ସଲଫାଇଡରେ ମୃତ୍ୟୁ ହୁଏକି ? ଏମିତି କହିଲେ ଜନସ୍ବାସ୍ଥ୍ୟ ନିର୍ଦ୍ଦେଶକ

ଆମ୍ବ ଟାକୁଆ ଟ୍ରାଜେଡି । ମୃତ୍ୟୁ ରିପୋର୍ଟକୁ ନେଇ ବଢୁଛି ଦ୍ଵନ୍ଦ୍ବ । ପ୍ରତିକ୍ରିୟା ରଖିଲେ ଜନସ୍ବାସ୍ଥ୍ୟ ନିର୍ଦ୍ଦେଶକ ନୀଳକଣ୍ଠ ମିଶ୍ର ।

ଭୁବନେଶ୍ବର: ବିକଶିତ ଭାରତର ନାରା ଦେଉଥିବା ଦେଶରେ ଏବେ ବି ଆଦିବାସୀମାନେ ଖାଉଛନ୍ତି ଆମ୍ୱ ଟାକୁଆ । ରାୟଗଡା ପରେ କନ୍ଧମାଳ ଜିଲ୍ଲାରେ ଆମ୍ୱ ଟାକୁଆରୁ ପ୍ରସ୍ତୁତ ଖାଦ୍ୟ ଖାଇ ଦୁଇ ଜଣଙ୍କ ଜୀବନ ଯିବା ଘଟଣା ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଛି । ଯାହା ଫଳରେ ଖାଦ୍ୟ ସୁରକ୍ଷାକୁ ନେଇ ଉଠିଛି ପ୍ରଶ୍ନ । କାହିଁକି ଦୁଇ ଜଣ ପ୍ରାଣ ହରାଇଲେ ତାହାର ତର୍ଜମା କରାଯାଉଛି । ହେଲେ ଗତକାଲି(ଗୁରୁବାର) ଏକ ରିପୋର୍ଟକୁ ଚର୍ଚ୍ଚା ଧରିଥିଲା । ଏହାକୁ ନେଇ ପ୍ରତିକ୍ରିୟା ରଖିଛନ୍ତି ଜନସ୍ବାସ୍ଥ୍ୟ ନିର୍ଦ୍ଦେଶକ ନୀଳକଣ୍ଠ ମିଶ୍ର । ଏହା ସହ ଏପରି କିଛି ରିପୋର୍ଟ କିଛି ହସ୍ତଗତ ହୋଇନଥିବା କହିଛନ୍ତି ସେ ।


ଆମ୍ବ ଟାକୁଆ ମୃତ୍ୟୁ ଘଟଣାର ରିପୋର୍ଟ ହସ୍ତକ୍ଷେପ ହୋଇନି:

ଆମ୍ବ ଟାକୁଆ ଖାଇ ମୃତ୍ୟୁ ଘଟଣାକୁ ଜନସ୍ୱାସ୍ଥ୍ୟ ନିର୍ଦ୍ଦେଶକ ନୀଳକଣ୍ଠ ମିଶ୍ର କହିଛନ୍ତି, ‘ରିପୋର୍ଟ ଆମର ହସ୍ତଗତ ହୋଇନି । ରାଜ୍ୟ ଫୋରେନସିକର ଯେଉଁ ରିପୋର୍ଟ ଗତକାଲି(ଗୁରୁବାର) ଟିଭିରେ ଦେଖା ଯାଉଥିଲା, ତାହା ଜିଲ୍ଲା ରିପୋର୍ଟ । ଷ୍ଟେଟ ରିପୋର୍ଟ ଆସିନି । ଏହି ରିପୋର୍ଟ ଖାଦ୍ୟ ସୁରକ୍ଷା କମିସନରଙ୍କୁ ଦେବେ । କମିଶନର ପାଇବା ପରେ ଆମେ ପାଇବୁ’ ।

ରିପୋର୍ଟକୁ ନେଇ ଦ୍ଵନ୍ଦ୍ବ:

ଜନସ୍ବାସ୍ଥ୍ୟ ନିର୍ଦ୍ଦେଶକ ଆହୁରି କହିଛନ୍ତି, ‘ହାଇଡ୍ରୋଜେନ ସଲଫାଇଡ ନେଇ ଯେଉଁ କଥା ରିପୋର୍ଟରେ ଅଛି, ତାହା ବହୁତ ଦ୍ୱନ୍ଦ୍ୱ ସୃଷ୍ଟି କରୁଛି । ଗୋଟେ କଥା ସ୍ପଷ୍ଟ ଯେ ହାଇଡ୍ରୋଜେନ ସଲଫାଇଡରେ ଏହି ମୃତ୍ୟୁ ହୋଇପାରିବ ନାହିଁ । କାରଣ ହାଇଡ୍ରୋଜେନ ସଲଫାଇଡରେ ଝାଡା ବାନ୍ତି ହୁଏ । ସେହି ଲକ୍ଷଣ ମୃତକଙ୍କ ନଥିଲା । Food Poisoning(ଫୁଡ ପଏଜନିଂ) ବୋଲି କୁହାଯାଉଛି । ମୃତ୍ୟୁର ପ୍ରକୃତ କାରଣ ଜାଣିବା ଆବଶ୍ୟକ । ରିପୋର୍ଟ ଆସିଲେ, ମୃତ୍ୟୁର କାରଣ ତର୍ଜମା କରାଯିବ’ ।

ଏହା ମଧ୍ୟ ପଢନ୍ତୁ:

ଆମ୍ବ ଟାକୁଆ ଖାଇ ମୃତ୍ୟୁ ଘଟଣାରେ ଚାଲିଛି ତନାଘନା:

କନ୍ଧମାଳରେ ଦୁଇ ଜଣଙ୍କ ଆମ୍ବ ଟାକୁଆ ଖାଇ ମୃତ୍ୟୁ ପରେ ପ୍ରଶାସନିକ ସ୍ତରରେ ତନାଘନା ଆରମ୍ଭ ହୋଇଛି । ପ୍ରାଥମିକ ତଦନ୍ତରୁ ଏହା ଫୁଡ୍ ପଏଜନିଂ ବା ଖାଦ୍ୟ ବିଷାକ୍ତ ଯୋଗୁଁ ହୋଇଥିବା କୁହାଯାଉଛି । ହେଲେ ପ୍ରଶ୍ନ ଉଠୁଛି ବାରମ୍ବାର ଏଭଳି ଘଟଣା ଘଟିଆସୁଥିଲେ ମଧ୍ୟ ଲୋକେ ଏବେବି ଆମ୍ବ ଟାକୁଆକୁ ଖାଦ୍ୟ ଭାବେ ଗ୍ରହଣ କରୁଛନ୍ତି । ଉଭୟ ସରକାରୀ ଓ ଘରୋଇ ସ୍ତରରେ ବହୁ ସଂସ୍ଥା ଆଦିବାସୀଙ୍କ ଉନ୍ନତି ପାଇଁ କାମ କରୁଛନ୍ତି । ହେଲେ କାହିଁକି ସଚେତନତାର ଅଭାବ ରହୁଛି । ଯାହା ଫଳରେ ଆମ୍ବ ଟାକୁଆ ଖାଇ ମୃତ୍ୟୁ ଘଟିଛି ।

ମୃତକଙ୍କ ପରିବାର ନିଜେ ଖାଇଥିଲେ, ଅନ୍ୟକୁ ବାଣ୍ଟିଥିଲେ:

ମୃତକଙ୍କ ପରିବାରରେ ଆମ୍ୱ ଟାକୁଆକୁ ରଖାଯାଇଥିଲା । ଗତ କିଛି ଦିନ ତଳେ ରଖାଯାଇଥିବା ଆମ୍ବ କୋଇଲିକୁ ବାହାର କରାଯାଇ ସେଥିରୁ ଯାଉ ପ୍ରସ୍ତୁତ କରି ଗ୍ରାମର ବହୁ ବ୍ୟକ୍ତିବିଶେଷ ବଣ୍ଟନ କରି ଖାଇଥିଲେ । ହେଲେ ସେଥିରୁ ବଳକା ରହିଥିବା କୋଇଲିକୁ ଗଚ୍ଛିତ ରଖି ପୁଣି ଥରେ ପ୍ରସ୍ତୁତ କରି ଆଠ ଜଣ ଆଦିବାସୀ ମହିଳା ବଣ୍ଟନ କରି ଖାଇଥିଲେ । ଆଉ ଏହା ପରେ ଏଭଳି ଘଟଣା ଘଟିଥିଲା ।

ଇଟିଭି ଭାରତ, ଭୁବନେଶ୍ବର