ଭୁବନେଶ୍ବର: ରାଜଧାନୀରେ ରାଜନୈତିକ ହିଂସା । ବିଜେପି କର୍ମୀଙ୍କୁ ବିଜେଡି କର୍ମୀ ଆକ୍ରମଣ କରିଥିବା ଅଭିଯୋଗ । ଭୁବନେଶ୍ୱରରେ ଉଷ୍ମ ହେଲା ରାଜନୈତିକ ଛକାପଞ୍ଝା । ଗୋଟିଏ ଗୋଷ୍ଠୀ ପ୍ରଚାର ବେଳେ ଅପର ଗୋଷ୍ଠୀ ସହ ମୁହାଁମୁହିଁ । ନୟାପଲ୍ଲୀ ଥାନା ଅଞ୍ଚଳର ତ୍ରିନାଥ ବସ୍ତିରେ ବାଲିତୋଟା ସାହିରେ ଦୁଇ ଗୋଷ୍ଠୀ ମଧ୍ୟରେ ଗଣ୍ଡଗୋଳ ହୋଇଛି । ଗୋଟିଏ ଗୋଷ୍ଠୀ ମାଡ଼ରେ ଅପର ଗୋଷ୍ଠୀର ଜଣେ ଯୁବକଙ୍କ ଫୁଲିଲା ମୁହଁ ହାତ । ଏନେଇ ଉଭୟ ପକ୍ଷରୁ ଥାନାରେ ଏତଲା ଦିଆଯାଇଛି ।
ସୂଚନା ମୁତାବକ ଯେ,ନୟାପଲ୍ଲୀ ଥାନା ତ୍ରିନାଥ ବସ୍ତିରେ ବିଜେଡି ପକ୍ଷରୁ ଚାଲିଥିଲା ଘରକୁ ଘର ପ୍ରଚାର । ଏନେଇ ଦଳୀୟ ସମର୍ଥକଙ୍କ ସହ ବିଜେଡି ବିଧାୟକ ପ୍ରାର୍ଥୀ ଅନନ୍ତ ନାରାୟଣ ଜେନା ପଦଯାତ୍ରା କରି ପ୍ରଚାର କରୁଥିଲେ । ବସ୍ତିରେ ପ୍ରଚାର ବେଳେ କର୍ପୋରେଟର ଗୋଷ୍ଠୀର କିଛି ଲୋକ ଅଭିଯୋଗକାରୀ ଲକ୍ଷ୍ମଣ ମହାପାତ୍ରକୁ ମାଡ଼ ମାରିଥିଲେ । ଯାହାକୁ ନେଇ ଉଭୟ ଗୋଷ୍ଠୀ ମଧ୍ୟରେ ଛକାପଞ୍ଝା ସହ ଏକ ତୀବ୍ର ଉତ୍ତେଜନା ମୂଳକ ପରିସ୍ଥିତି ଦେଖାଦେଇଛି । ଏନେଇ ଲକ୍ଷ୍ମଣ ଥାନାରେ ଅଭିଯୋଗ କରିଛନ୍ତି । ସେ ଯେହେତୁ ପୂର୍ବରୁ ବିଜେଡିରେ ଥିଲେ ଏବେ ବିଜେପି ରହିଛନ୍ତି । ତେଣୁ ରାଜନୈତିକ ଆକ୍ରୋଶ ରଖି ଏଭଳି ଆକ୍ରଣ ହୋଇଥିବା ସେ ଅଭିଯୋଗ କରିଛନ୍ତି ।
ତେବେ ଅଭିଯୋଗକାରୀ ନାଁ ନେଇ କହିଛନ୍ତି ଯେ, ନିର୍ବାଚନ ସମୟରେ ଯେପରି ଗଣ୍ଡଗୋଳ ହେଉଛି । ଭୟ ଲାଗୁଛି କେବଳ ଯେ ତାଙ୍କ ଭାଇ ପ୍ରତି ନୁହେଁ ତାଙ୍କ ପରିବାର ପ୍ରତି ଭୟ ରହିଛି ।ଏଭଳି ମାରପିଟ୍ ଯୋଗୁଁ କେତେବେଳେ କ'ଣ ହେବ ତାହା ଆଶଙ୍କା କରି ପୋଲିସର ସାହାରା ନେଇଛୁ । ସେହିପରି ବିଧାୟକ ପ୍ରାର୍ଥୀ ଅନ୍ତନାରାୟଣ ଜେନା ଆସି ଭୁଲ ମାଗନ୍ତୁ ।
ସେପଟେ ଅପର ଗୋଷ୍ଠୀର ବିଜେଡି କର୍ପୋରେଟରଙ୍କ ସ୍ବାମୀ ସୋମେନ୍ଦ୍ର କୁମାର ଜେନା କହିଛନ୍ତି," ଆମେ ପ୍ରଚାର ଏବଂ ପୋଷ୍ଟର ମାରିବା ବେଳେ ସେମାନେ ପୋଷ୍ଟର ଚିରି ଥିଲେ । ହସାହସି ହୋଇ ଉସୁକାଇ ଥିଲେ ଏବଂ କମେଣ୍ଟ ମାରି ଗାଳିଗୁଲଜ କରିଥିଲେ । ପରେ ବସ୍ତିର ଜଣେ ବୁଲୁ ନାମକ ପିଲା ଲକ୍ଷ୍ମଣ ମହାପାତ୍ରକୁ ଆକ୍ରମଣ କରିଛି ।" ଦୁଇ ପକ୍ଷର ଅଭିଯୋଗ କ୍ରମେ ପୋଲିସ ତଦନ୍ତ କରୁଛି ।
ଇଟିଭି ଭାରତ, ଭୁବନେଶ୍ବର
