ରାଇରଙ୍ଗପୁର: ମୟୂରଭଞ୍ଜରେ ବିଜେପିର ଜୋରଦାର ସେଲିବ୍ରେସନ । ମୟୂରଭଞ୍ଜ ଜିଲ୍ଲାରେ ବିଜେପି ସମସ୍ତ ୯ ଗୋଟି ନିର୍ବାଚନ ମଣ୍ଡଳୀ ଓ ଲୋକସଭା ଆସନ ଦଖଲ କରି ଐତିହାସିକ ବିଜୟ ଲାଭ କରିଛି । ଏନେଇ ବିଜେପି ଶିବିରରେ ଖୁସିର ଲହରୀ ଖେଳିଯାଇଛି । ଭାରତୀୟ ଜନତା ପାର୍ଟିର ମୟୂରଭଞ୍ଜ ସାଂସଦ ନବଚରଣ ମାଝୀ, ରାଇରଙ୍ଗପୁର ବିଧାୟକ ଜୋଲେନ ନାଏକଙ୍କ ସମେତ ବରିଷ୍ଠ ନେତା ଓ କାର୍ଯ୍ୟକର୍ତ୍ତା ମାନେ ବିରାଟ ପଟୁଆରରେ ବାହାରି ରାଇରଙ୍ଗପୁର ସହର ପରିକ୍ରମା କରି ବିଜୟ ଉତ୍ସବ ପାଳନ କରିଛନ୍ତି ।
ବିଜେପିର ବିଜୟ ଜୁଲୁସ୍ ରାଇରଙ୍ଗପୁର ସହରର ପଣ୍ଡିତ ରଘୁନାଥ ମୁର୍ମୁ ଛକ ଠାରୁ ଆରମ୍ଭ ହୋଇ ରାଇରଙ୍ଗପୁର ବଜାର, ଅଁଳାଡୁବା, ଇଚିଣ୍ଡା ଦେଇ ବିଜେପି କାର୍ଯ୍ୟାଳୟ ପହଞ୍ଚିଥିଲେ । ଶହ ଶହ ସଂଖ୍ୟାରେ ବିଜେପି ର କର୍ମୀ ଏହି ବିଜୟ ଜୁଲୁସ ରେ ସାମିଲ ହୋଇଥିଲେ । ବାଣ ଫୁଟାଇବା ସହ ପରସ୍ପରକୁ ମିଠା ଖୁଆଇ ଏହି ଉତ୍ସବ ପାଳନ କରିଛନ୍ତି ବିଜେପି ନେତା ଓ କର୍ମୀ ।
ମୟୂରଭଞ୍ଜ ଜନତା ଜନାର୍ଦ୍ଦନଙ୍କୁ ଏହାର ଶ୍ରେୟ ଦେଇଛନ୍ତି ମୟୂରଭଞ୍ଜ ବିଜେପି ବିଜୟୀ ସାଂସଦ ପ୍ରାର୍ଥୀ ନବଚରଣ ମାଝୀ । ଦୀର୍ଘ ୨୫ ବର୍ଷ ବିଜେଡ଼ି ସରକାରଙ୍କୁ ସୁଯୋଗ ଦେଇଥିଲେ ଜନତା ଜନାର୍ଦ୍ଦନ । ତେବେ ଚଳିତ ଥର ପରିବର୍ତ୍ତନ କରି ବିଜେପିକୁ ଭରସା କରି ଏଥର ବିଜେପିକୁ ସୁଯୋଗ ଦେଇଛନ୍ତି ଜନତା ଜନାର୍ଦ୍ଦନ । ନବରଚଣ ନିର୍ବାଚନ ପୂର୍ବରୁ ମୟୂରଭଞ୍ଜର ଅଧିଷ୍ଠାତ୍ରୀ ଦେବୀ ମା କୀଚକେଶ୍ବରୀ ଙ୍କ ପୀଠ ଯାଇ ସେଠାରେ ମା'ଙ୍କୁ ନିଜ ମନ କଥା ଜଣାଇ ତାଙ୍କ ଶରଣାଗତ ହୋଇଛନ୍ତି । ବିଜୟୀ ହେବା ପରେ ପୁଣି ମା' କୀଚକେଶ୍ବରୀ ଙ୍କ ପୀଠକୁ ଯାଇ ସେଠାରେ ପୂଜାର୍ଚ୍ଚନା କରିବା ସହ ଆଶିର୍ବାଦ ଭିକ୍ଷା କରିଛନ୍ତି ।
