ଭବାନୀପାଟଣା: ମନରେଗା ଯୋଜନାରେ ମହାଦୁର୍ନୀତି ! ତଥ୍ୟ ଜାଲିଆତି କରି ବିଭିନ୍ନ ଆକାଉଣ୍ଟକୁ ଯାଇଛି ଲକ୍ଷାଧିକ ଟଙ୍କା । ଏଭଳି ସଙ୍ଗୀନ ଅଭିଯୋଗ ଆସିଛି କଳାହାଣ୍ଡି ଜିଲ୍ଲାର ସଦର ମହକୁମା ଭବାନୀପାଟଣା ନିକଟରେ ଥିବା ମେଦିନୀପୁର ପଞ୍ଚାୟତରୁ । ଜିଲ୍ଲାପାଳଙ୍କ କାର୍ଯ୍ୟାଳୟ ଠାରୁ ମାତ୍ର ୩ କିଲୋମିଟର ଦୂରରେ ରହିଥିବା ଏହି ପଞ୍ଚାୟତରେ ହୋଇଛି ଏଭଳି ମହାଦୁର୍ନୀତି । ଯାହାର ତଥ୍ୟ ସାମ୍ନାକୁ ଆଣିଛନ୍ତି ସ୍ଥାନୀୟ ନିର୍ବାଚିତ ଜନ ପ୍ରତିନିଧି । ଇଟିଭି ଭାରତ ହାତରେ ତଥ୍ୟ ଲାଗିବା ପରେ ଅଞ୍ଚଳବାସୀଙ୍କ ପଞ୍ଚାୟତ କାର୍ଯ୍ୟଳୟରେ ଆନ୍ଦୋଳନ ।
ଶ୍ରମିକଙ୍କ ହାତକୁ ୧୦୦ ଦିନର କାମ ଯୋଗାଇଦେବା ସହ ଦାଦନ ସମସ୍ୟା ଉପରେ ରୋକ ଲଗାଇବା ପାଇଁ ୨୦୦୫ ମସିହାରେ ମହାତ୍ମା ଗାନ୍ଧୀ ନିଶ୍ଚିତ କର୍ମ ନିଯୁକ୍ତି ଯୋଜନାର ଶୁଭାରମ୍ଭ ହୋଇଥିଲା । ଆଶା ଥିଲା, ଯୋଜନା ଯୋଗୁଁ ଲୋକେ ଦୁଇ ପଇସା ରୋଜଗାର କରିବେ ଓ ନିଜ ପରିବାର ପ୍ରତିପୋଷଣ କରିବେ । ହେଲେ କିଛି ଲାଭଖୋର ସରକାରୀ ବାବୁଙ୍କ ପାଇଁ ଯୋଜନାର ସଠିକ୍ ରୂପାୟନକୁ ନେଇ ଉଠିଛି ପ୍ରଶ୍ନବାଚୀ । ଏମିତି ଏକ ତଥ୍ୟ ଇଟିଭି ଭାରତ ହାତରେ ଲାଗିଛି । ମନରେଗା ଯୋଜନାରେ ଜାଲିଆତି କରି ଲକ୍ଷାଧିକ ଟଙ୍କା ହଡ଼ପ କରିବା ଭଳି ସଙ୍ଗୀନ ଅଭିଯୋଗ ସାମ୍ନାକୁ ଆସିଛି । କଳାହାଣ୍ଡି ଜିଲ୍ଲା ସଦର ମହକୁମା ଭବାନୀପାଟଣା ନିକଟରେ ଥିବା ମେଦିନୀପୁର ପଞ୍ଚାୟତରୁ ଏଭଳି ଅଭିଯୋଗ ଆସିଛି । ଜିଲ୍ଲାପାଳଙ୍କ କାର୍ଯ୍ୟଳୟ ଠାରୁ ମାତ୍ର ୩ କିଲୋମିଟର ଦୂରରେ ଥିବା ଏହି ପଞ୍ଚାୟତରେ ହୋଇଛି ଏଭଳି ମହାଦୁର୍ନୀତି ।
ଅଭିଯୋଗ ଅନୁସାରେ ମହାତ୍ମା ଗାନ୍ଧୀ ନିଶ୍ଚିତ କର୍ମ ନିଯୁକ୍ତି ଯୋଜନାରେ ସ୍ଥାନୀୟ ପଞ୍ଚାୟତର କୁସୁମଶିଳା ଗାଁର ବ୍ୟବସାୟୀ ବିକ୍ରମ ନାଏକଙ୍କ ନାଁରେ ଭେଣ୍ଡର ଆଇଡି ପ୍ରସ୍ତୁତ କରିବା ସହ ଜବ କାର୍ଡ ପ୍ରସ୍ତୁତ କରି ୨୦୧୯-୨୦ ଆର୍ଥିକ ବର୍ଷରେ ପ୍ରାୟ ୧୯ ହଜାର ୬୧୨ ଟଙ୍କା ତାଙ୍କ ଆକାଉଣ୍ଟକୁ ଟ୍ରାନ୍ସଫର୍ କରାଯାଇଛି । ସେହିଭଳି ନିରାକାର ନାଏକଙ୍କ ନାଁରେ ମଧ୍ୟ ସମାନ ଭାବରେ ୩୮ ହଜାର ୮୩୬ ଟଙ୍କା ଆକାଉଣ୍ଟକୁ ଟ୍ରାନ୍ସଫର୍ କରାଯାଇଛି । ଏଭଳି ଭାବରେ ସ୍ଥାନୀୟ ଅନ୍ୟଜଣେ ବ୍ୟକ୍ତି ପ୍ରକାଶ ଚନ୍ଦ୍ର ମହାନନ୍ଦଙ୍କ କାଉଣ୍ଟରେ ମଧ୍ୟ ୨୦୨୨-୨୩ ଆର୍ଥିକ ବର୍ଷରେ ଜଙ୍ଗଲ ନିକଟରେ ଟ୍ରେଞ୍ଜ କାମ ହୋଇଥିବା ଦର୍ଶାଇ ପ୍ରାୟ ୭୮ ହଜାର ୬୫୦ ଟଙ୍କା ତାଙ୍କ ଆକାଉଣ୍ଟକୁ ଟ୍ରାନ୍ସଫର୍ କରାଯାଇଥିବା ତଥ୍ୟ ଇଟିଭି ଭାରତକୁ ମିଳିଥିବା ଦସ୍ତାବିଜରେ ଉଲ୍ଲେଖ ରହିଛି ।
