ବଲାଙ୍ଗୀର: ଆସୁଛି ନୂଆଖାଇ, ଦୁଲୁକିବ ପଶ୍ଚିମ ଓଡ଼ିଶା । ପଶ୍ଚିମ ଓଡିଶାର କୃଷି ଭିତ୍ତିକ ଗଣପର୍ବ ନୂଆଖାଇ ପାଇଁ ଲଗ୍ନ ଧାର୍ଯ୍ୟ ହୋଇଛି । ଆସନ୍ତା ସେପଟେମ୍ବର ମାସ ୮ ତାରିଖ ରବିବାର ଦିନ ବଲାଙ୍ଗୀର ଜିଲ୍ଲାରେ ନୂଆଖାଇ ପର୍ବ ପାଳନ କରାଯିବ । ଏନେଇ ସୂଚନା ଦେଇଛି ବଲାଙ୍ଗୀର ଜିଲ୍ଲା ନୂଆଖାଇ ନିର୍ଣ୍ଣାୟକ କମିଟି ।
ଦୁଲୁକିବ ପଶ୍ଚିମ ଓଡ଼ିଶା: ବଲାଙ୍ଗୀର ଜିଲ୍ଲାରେ ଆସନ୍ତା ଭାଦ୍ରବ ଶୁକ୍ଳ ପକ୍ଷ ପଞ୍ଚମୀ ବିଶୁଦ୍ଧ ତୁଲା ଲଗ୍ନ ସକାଳ ସମୟ 9 ଘଟିକା 35 ମିନିଟରୁ ଦଶ ଘଟିକା 7 ମିନିଟ ମଧ୍ୟରେ ଭଗବାନ ଠାରେ ନୂଆଖାଇର ଅନ୍ନ ପ୍ରସାଦଲାଗି ହେବ । ଆଜି (ମଙ୍ଗଳବାର) ଦିନ ଏଠିକାର ଇଷ୍ଟ ଦେବୀ ମା' ସମସଲେଇ,ମା' ପଟନେଶ୍ୱରୀ ଓ ଦସମତୀଙ୍କ ସହ ବଲାଙ୍ଗୀର ମହାରାଜଙ୍କ ରାଶି ନକ୍ଷତ୍ରର ଗଣନା କରି ଏହି ନୂଆଖାଇ ଲଗ୍ନ ଧାର୍ଯ୍ୟ କରାଯାଇଥିବା କମିଟି ସଦସ୍ୟ ତଥା ରାଜ ପୁରୋହିତ ସନ୍ତୋଶ ଦାସ ଓ ଜ୍ୟୋତିଶ ଭୁବନ ମୋହନ ମିଶ୍ର ସୂଚନା ଦେଇଛନ୍ତି ।
ନବାନ୍ନ ଲାଗି ପାଇଁ ବାହାରିଲା ନୂଆଖାଇ ଲଗ୍ନ
ସେପ୍ଟେମ୍ବର ୮ରେ ଇଷ୍ଟଦେବୀଙ୍କ ନିକଟରେ ଲାଗି ହେବ ନବାନ୍ନ
ସକାଳ ୯ଟା ୩୫ରୁ ୧୦ଟା ୭ ମଧ୍ୟରେ ନବାନ୍ନ ଲାଗି
ଇଷ୍ଟଦେବୀଙ୍କ ନିକଟରେ ନବାନ୍ନ ଲାଗି ପରେ ସମସ୍ତେ ନୂଆ ଖାଇବେ
ରାଜାଠୁ ପ୍ରଜା ସମସ୍ତେ ଖାଇବେ ନୂଆ: ପ୍ରଥମେ ଇଷ୍ଟ ଦେବୀ ମା' ସମଲେଇ ଓ ମା' ପାଟନେଶ୍ୱରୀଙ୍କା ଠାରେ ନୂଆଅନ୍ନରେ ପ୍ରସ୍ତୁତ ଭୋଗ ଲାଗି ହେବ । ଏହାପରେ ରାଜାଠୁ ପ୍ରଜା ସମସ୍ତେ ନୂଆ ଖାଇବେ । ତେବେ ଏହି ନୂତନତ୍ଵର ପର୍ବରେ ଚାଷୀ ତାର ଅମଳ କରିଥିବା ସଶ୍ୟକୁ ପ୍ରଥମେ ଭଗବାନ ଠାରେ ଲାଗି କରିବା ପରେ ନିଜେ ବର୍ଷର ପ୍ରଥମ ଅମଳ ହୋଇଥିବା ନୂଆ ସଶ୍ୟକୁ ଗ୍ରହଣ କରିବେ । ଏଥିରେ ସାରା ପଶ୍ଚିମ ଓଡ଼ିଶାବାସୀ ଧୁମଧାମରେ ନୂଆଖାଇ ପର୍ବ ପାଳନ କରିଥାନ୍ତି ।
ପଶ୍ଚିମ ଓଡ଼ିଶାରେ ଖୁସିର ଲହରୀ: ନୂଆଖାଇ ଲଗ୍ନ ଆଜି ସ୍ଥିର ହେବା ପରେ ସମସ୍ତଙ୍କ ମଧ୍ୟ ଉତ୍ସାହ ଭରି ଯାଇଛି । ସମସ୍ତେ ଏବେଠୁଁ ପ୍ରସ୍ତୁତି ପାଇଁ ଲାଗି ପଡିଛନ୍ତି । ଏହି ପର୍ବ ଦୁଇରୁ ତିନି ଦିନ ଧରି ପାଳିତ ହୋଇଥାଏ । ଯେଉଁଥିରେ ପ୍ରତ୍ୟକ ପରିବାରର ଲୋକ ସବୁ ଦ୍ଵେଷ ବିଦ୍ୱେଷ ଭୁଲି ଏକାଠି ନୂଆ ଖାଇ ଥାଆନ୍ତି । ପସ୍ପରକୁ ନୂଆଖାଇ ଜୁହାର ଭେଟ କରିଥାନ୍ତି । ସେହିପରି ପ୍ରଥମ ଦିନରେ ରୀତିନୀତିରେ ପୂଜା ଅର୍ଚ୍ଚନା ପରେ ନୂଆଅନ୍ନ ସମସ୍ତେ ଭକ୍ଷଣ କରିଥାନ୍ତି । ନୂଆ ଖାଇର ପର ଦିନ ସମସ୍ତେ ନାଚଗୀତ , ଖେଳକୁଦ ଇତ୍ୟାଦିରେ ଖୁବ ଉତ୍ସାହ ଆନନ୍ଦରେ ନୂଆଖାଇ ପାଳନ କରିଥାନ୍ତି ।
ଇଟିଭି ଭାରତ, ବଲାଙ୍ଗୀର
