ନିଆଳି(କଟକ): ବିଭିନ୍ନ ଦାବି ନେଇ 'ଲକ୍ଷ୍ମୀ ବସ' ଡ୍ରାଇଭରଙ୍କ ଆନ୍ଦୋଳନ । ଫଳରେ କଟକ ଜିଲ୍ଲାରେ ବସ ଚଳାଚଳ ବନ୍ଦ ରହିଛି । ଯେଉଁଥିପାଇଁ ଯାତ୍ରୀ ହନ୍ତସନ୍ତ ହେଉଛନ୍ତି । ଆଜିଠାରୁ ବସ ଡ୍ରାଇଭରମାନେ ବିଭିନ୍ନ ରୁଟ୍ ଦେଇ ଯାଉଥିବା 'ଲକ୍ଷ୍ମୀ ବସ' ଚଳାଚଳ ବନ୍ଦ କରିଛନ୍ତି ।
'ଲକ୍ଷ୍ମୀ ବସ' ଚଳାଚଳ ବନ୍ଦ:
ମିଳିଥିବା ସୂଚନା ଅନୁସାରେ, କଟକ ନିଆଳି ବ୍ଳକ ଅଞ୍ଚଳରେ ଲକ୍ଷ୍ମୀ ବସରେ କାର୍ଯ୍ୟରତ ବସ ଡ୍ରାଇଭର ଶ୍ରୀଧର ରାଉତ କହିଛନ୍ତି," କଟକ ଜିଲ୍ଲାରେ ୧୪ଟି ବ୍ଲକ ଅଞ୍ଚଳରେ ଆଜିଠାରୁ ବସ ଚଳାଚଳ ବନ୍ଦ କରାଯାଇଛି । ଡ୍ରାଇଭରମାନଙ୍କ ମାସିକ ଦରମା ପ୍ରତି ମାସ ୯ ତାରିଖରେ ମିଳିବା କଥା । ଯାହା ଏପର୍ଯ୍ୟନ୍ତ ମିଳିନାହିଁ । ଫଳରେ ଆମେ ବହୁ ହଇରାଣ ହେଉଛୁ । ଆମର ବିଭିନ୍ନ ଦାବିକୁ 'ଲକ୍ଷ୍ମୀ ବସ' ଠିକା ସଂସ୍ଥାକୁ ଜଣାଇଛୁ । କିନ୍ତୁ ଦାବି ପୂରଣ ହେଉନାହିଁ । ଆମେ ବସ ଚଳାଉଛୁ ବୋଲି ମଧ୍ୟ କୌଣସି ପ୍ରମାଣପତ୍ର ଦିଆଯାଇନାହିଁ । ଯଦି କିଛି ଅସୁବିଧା ସୁବିଧା ହୋଇଗଲା ଆମ ପିଲାଛୁଆଙ୍କୁ ଦେଖିବ କିଏ ? ଯେତିକି ଦରମା ମିଳୁଛି ସେତିକିରେ ଗୁଜୁରାଣ ମେଣ୍ଟୁନାହିଁ । ୬ ମାସ ତଳେ ଠିକା ସଂସ୍ଥା କହିଥିଲା ଦରମା ବଢାଇବ, କିନ୍ତୁ ଏପର୍ଯ୍ୟନ୍ତ କୌଣସି ଦାବି ପୂରଣ କରିନାହିଁ । ଆମେ ବାଧ୍ୟ ହୋଇ କଟକ ଜିଲ୍ଲାର ବିଭିନ୍ନ ରୁଟରେ ଲକ୍ଷ୍ମୀ ବସ ଚଳାଚଳ ବନ୍ଦ କରିଛୁ ।"
ଦରମା ମିଳୁନଥିବା ଅଭିଯୋଗ:
ଆଉ ଜଣେ ଲକ୍ଷ୍ମୀ ବସ ଡ୍ରାଇଭର ସଞ୍ଜୟ ମଲ୍ଲିକ କହିଛନ୍ତି," ଆମେ ଲକ୍ଷ୍ମୀ ବସରେ ଚାକିରି କରୁଛୁ । ଆମକୁ ଏହି ମାସରେ ଦରମା ମିଳିନାହିଁ । ଆମ ପିଲା ଛୁଆ ଉପାସରେ । ଯେଉଁ ୧୩ ହଜାର ୫୦୦ ଟଙ୍କା ଦରମା ମିଳୁଛି ଏଥିରେ ନିଜ ଖର୍ଚ୍ଚ, ଘର ଖର୍ଚ୍ଚ ମଧ୍ୟ ହୋଇପାରୁନାହିଁ । ସରକାରଙ୍କ ଉପରେ ଭରସା କରି କମ୍ ଟଙ୍କାରେ କାମ କରୁଛୁ । କିନ୍ତୁ ଆଜି ପର୍ଯ୍ୟନ୍ତ ଆମମାନଙ୍କ ଅସୁବିଧା ଦୂର ହେଉନାହିଁ । ଡ୍ରାଇଭର ନିଯୁକ୍ତି ପତ୍ର, ପରିଚୟ ପତ୍ର, ସ୍ବାସ୍ଥ୍ୟ କାର୍ଡ ଓ ଦରମା ବୃଦ୍ଧି ଦାବି ପୂରଣ ପାଇଁ ଲିଖିତ ଭାବେ ଜଣାଇଲା ପରେ ବି ଠିକା ସଂସ୍ଥା ଅଭିଯୋଗ ଶୁଣୁନାହିଁ । ଏଥିପାଇଁ ଆମେ ଆଜିଠାରୁ କଟକ ଜିଲ୍ଲାର ୧୪ଟି ବ୍ଲକ ଅଞ୍ଚଳରେ ଲକ୍ଷ୍ମୀ ବସ ଚଳାଚଳ ବନ୍ଦ କରିଛୁ । ସରକାର ଆମ ଦାବି ପୂରଣ କଲେ ଗାଡି ଚଳାଇବୁ ।"
ଅସୁବିଧାର ସମ୍ମୁଖୀନ ଯାତ୍ରୀ :
ଯାତ୍ରୀ ସୌଦାମିନୀ ରାୟ କହିଛନ୍ତି," ଲକ୍ଷ୍ମୀ ବସ ଚଳାଚଳ ଯୋଗୁଁ ଆମମାନଙ୍କୁ ବିଭିନ୍ନ ଯାଗାକୁ ଯିବା ଆସିବା ସୁବିଧା ହେଉଥିଲା । ଆଜି ହଠାତ ବସ ବନ୍ଦ ଯୋଗୁଁ ଆମେ ହଇରାଣ ହେବା ସହିତ ଅଟୋ ଭଡା କରି କାର୍ଯ୍ୟସ୍ଥଳକୁ ଯିବା ପାଇଁ ବାଧ୍ୟ ହେଉଛୁ । ବସ ଡ଼୍ରାଇଭରମାନଙ୍କ ବିଭିନ୍ନ ଦାବି ରାଜ୍ୟ ସରକାର ତୁରନ୍ତ ପୂରଣ କରନ୍ତୁ ।"
ଏହା ମଧ୍ୟ ପଢନ୍ତୁ: ଗଡୁନି ଲକ୍ଷ୍ମୀ ବସ, ପଡି ପଡି ଖତ ଖାଉଛି; ଦେଖନ୍ତୁ ଗ୍ରାଉଣ୍ଡ ରିପୋର୍ଟ
ଇଟିଭି ଭାରତ, ନିଆଳି
