ଜନତା ମଇଦାନରେ ଜନଜାତୀୟ ଗୌରବ ଦିବସ, ୧୫୩୫ କୋଟିର ପ୍ରକଳ୍ପ ଭେଟି ଦେଲେ ମୁଖ୍ୟମନ୍ତ୍ରୀ

ଜନତା ମଇଦାନରେ ପାଳନ ହେଲା ଜନଜାତୀୟ ଗୌରବ ଦିବସ । ପେସା ଆଇନ ଲାଗୁ ପୂର୍ବରୁ ନିଆଯିବ ଲୋକଙ୍କ ମତ । ବସିବ ଗ୍ରାମସଭା ।

ଭୁବନେଶ୍ବର: ରାଜ୍ୟରେ କାର୍ଯ୍ୟକାରୀ ହେବ ପେସା ଆଇନ । ଏଥିପାଇଁ ପ୍ରକ୍ରିୟା ଆରମ୍ଭ ହୋଇଛି । ହେଲେ ଏହି ଆଇନ ଲାଗୁ କରିବା ପୂର୍ବରୁ ଲୋକଙ୍କ ମତ ନେବେ ରାଜ୍ୟ ସରକାର । ଏଥିପାଇଁ ସଭା କରାଯିବ । ଆଜି ଭୁବନେଶ୍ବରର ଜନତା ମଇଦାନରେ ଭଗବାନ ବିର୍ସା ମୁଣ୍ଡାଙ୍କ 150ତମ ଜନ୍ମ ଜୟନ୍ତୀ ବା ଜନଜାତୀୟ ଗୌରବ ଦିବସ ପାଳନ ବେଳେ ଏହା କହିଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ । ଏହି ଅବସରରେ ୧୫୩୫ କୋଟି ଟଙ୍କାର ପ୍ରକଳ୍ପର ଶୁଭାରମ୍ଭ କରିଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ।

ବିର୍ସା ମୁଣ୍ଡାଙ୍କ ଅବଦାନକୁ ଭୁଲିବନି ଦେଶ:

ଭଗବାନ ବିର୍ସା ମୁଣ୍ଡାଙ୍କ ଜୟନ୍ତୀ ଅବସରରେ ସେ ମହାନ ସଂଗ୍ରାମୀ ଶହୀଦ ଲକ୍ଷ୍ମଣ ନାୟକ, ରତ୍ନା ନାୟକ, ଚକରା ବିଷୋଇ, ଦୋରା ବିଷୋଇ, ରେଣ୍ଡୋ ମାଝୀଙ୍କ ପରି ଦେଶ ଭକ୍ତଙ୍କ ବଳୀଦାନ ଓ ତ୍ୟାଗକୁ ମଧ୍ୟ ସ୍ମରଣ କରିଥିଲେ ମୁଖ୍ୟମନ୍ତ୍ରୀ । ଏହି ମହାନ୍ ସଂଗ୍ରାମୀ ମାନେ ଆମ ଦେଶର ଇତିହାସ ଓ ସଂସ୍କୃତିକୁ ନୂତନ ରୂପ ଦେବାରେ ଉଲ୍ଲେଖନୀୟ ଅବଦାନ ରଖିଛନ୍ତି ବୋଲି କହିଥିଲେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ । ମୋହନ ଆହୁରି କହିଛନ୍ତି, ‘ବିର୍ସା ମୁଣ୍ଡା ଆମ ସ୍ବାଧୀନତା ସଂଗ୍ରାମର ଏକ ଅନନ୍ୟ ବୀର । ବିର୍ସା ମୁଣ୍ଡାଙ୍କ ସଂଗ୍ରାମର କାହାଣୀ ସ୍ୱର୍ଣ୍ଣାକ୍ଷରରେ ଲିପିବଦ୍ଧ ହୋଇ ରହିଛି ଓ ରହିବ । ଆଦିବାସୀ ମାନଙ୍କ ଉନ୍ନତି ପାଇଁ ତାଙ୍କ ଅବଦାନକୁ ଦେଶ ଓ ଜାତି କେବେ ଭୁଲିବ ନାହିଁ ।’

ମୁଖ୍ୟମନ୍ତ୍ରୀ ଆହୁରି କହିଥିଲେ, ‘ଆମ ସରକାର ଜନଜାତି ସମ୍ପ୍ରଦାୟଙ୍କ ଉଚ୍ଚ ପରମ୍ପରା ଓ ଐତିହ୍ୟର ସୁରକ୍ଷା ପାଇଁ ପ୍ରତିବଦ୍ଧ ଅଛନ୍ତି । ଜନଜାତି ସମ୍ପ୍ରଦାୟଙ୍କ ସର୍ବାଙ୍ଗୀନ ବିକାଶ ଲାଗି ଅନେକ ପଦକ୍ଷେପ ଗ୍ରହଣ କରିଛନ୍ତି । ଜଙ୍ଗଲ ଜମି ଅଧିକାର ପ୍ରଦାନ ବଳରେ ସେମାନଙ୍କୁ ସଶକ୍ତ କରାଯାଉଛି ।’

ପୂର୍ବ ବିଜେଡି ସରକାର ଉପରେ ବର୍ଷିଲେ ମୁଖ୍ୟମନ୍ତ୍ରୀ:

ଦେଶବ୍ୟାପୀ 'ଜନଜାତୀୟ ଗୌରବ ଦିବସ' ମହାସମାରୋହରେ ପାଳିତ ହୋଇଛି। ଏହି କାର୍ଯ୍ୟକ୍ରମର ମୁଖ୍ୟ ଉତ୍ସବ ବିହାରର ଜାମୁଇଠାରେ ଅନୁଷ୍ଠିତ ହୋଇଛି। ଏଥିସହ ଭୁବନେଶ୍ବରରେ ଆୟୋଜିତ କାର୍ଯ୍ୟକ୍ରମରେ ମୁଖ୍ୟମନ୍ତ୍ରୀ ଶ୍ରୀ @MohanMOdisha ଯୋଗଦେଇ ଆଭାସୀ ଜରିଆରେ ପ୍ରଧାନମନ୍ତ୍ରୀଙ୍କ କାର୍ଯ୍ୟକ୍ରମରେ ସାମିଲ ହୋଇଛନ୍ତି। ଏହି ଅବସରରେ ମୁଖ୍ୟମନ୍ତ୍ରୀ… pic.twitter.com/zvYsL50yP1

— CMO Odisha (@CMO_Odisha) November 15, 2024

ଜନଜାତୀୟ ଗୌରବ ଦିବସ ପାଳନ ବେଳେ ବିଜେଡି ସରକାର ଉପରେ ବର୍ଷିଲେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ । ମୁଖ୍ୟମନ୍ତ୍ରୀ କହିଛନ୍ତି, ‘ନୂଆ ସରକାର ଆସିବା ପରେ ଜନଜାତି ସୁରକ୍ଷା, ଶିକ୍ଷା, ଜୀବନ ଜୀବିକା ପାଇଁ ଅନେକ ଯୋଜନା ଆଣିଛନ୍ତି ସେମାନଙ୍କର ବିକାଶ ପାଇଁ କାର୍ଯ୍ୟକ୍ରମ ଆରମ୍ଭ ହୋଇଛି । ଅତୀତରେ ଜନଜାତିଙ୍କୁ ଅବହେଳିତ କରାଯାଉଥିଲା, ଗତ ସରକାର କହୁଥିଲେ ଆଦିବାସୀଙ୍କ ସାଙ୍ଗରେ ଅଛି । ଶିକ୍ଷା, ସ୍ୱାସ୍ଥ୍ୟରେ ଅବହେଳା ହୋଇଛି, ହଷ୍ଟେଲ ଗୁଡିକରେ ଖାଇବାକୁ ପାଉନଥିଲେ ଲୁଣ ସହ ଭାତ ଖାଉଥିଲେ । ସେମାନଙ୍କୁ ସ୍ୱତନ୍ତ୍ରତା ଦିଆଯାଉନଥିଲା । ମୁଖ୍ୟ ସ୍ରୋତରେ ସାମିଲ କରିବାକୁ କୌଣସି ଠୋସ ପଦକ୍ଷେପ ନିଆଯାଉନଥିଲା ।’

ଗ୍ରାମସଭା ହେବ, ପେସା ଆଇନ ପାଇଁ ପ୍ରକ୍ରିୟା ଆରମ୍ଭ:

ମୁଖ୍ୟମନ୍ତ୍ରୀ ଆହୁରି କହିଛନ୍ତି, ‘ପଞ୍ଚାୟତିରାଜ ବିଭାଗକୁ ଦାୟିତ୍ୱ ଦିଆଯାଇଛି । ୨୭ଟି ଜିଲ୍ଲା ୨୩୪ ବ୍ଲକ ୭୬୬୭ ଗ୍ରାମରେ ଗ୍ରାମସଭା ହେବ । ପେସା ଆଇନ କାର୍ଯ୍ୟକାରୀ ପାଇଁ ପ୍ରକ୍ରିୟା ଆରମ୍ଭ ହୋଇଛି ।’ ସେହିପରି କାର୍ଯ୍ୟକ୍ରମରେ ଯୋଗଦେଇ ଜନଜାତି କଲ୍ୟାଣ ମନ୍ତ୍ରୀ ନିତ୍ୟାନନ୍ଦ ଗଣ୍ଡ କହିଛନ୍ତି, ‘ଆଗକୁ ଗ୍ରାମସଭା କାର୍ଯ୍ୟକାରୀ କରାଯିବ । ପଲିସଭା ମାଧ୍ୟମରେ ସେମାନଙ୍କ ଅସୁବିଧାର ସମାଧାନ କରାଯିବ ।’

ଏହା ମଧ୍ୟ ପଢନ୍ତୁ:

ଅନେକ ପ୍ରକଳ୍ପର ଶିଳାନ୍ୟାସ:

ଭୁବନେଶ୍ବରରେ ଜନତା ମଇଦାନରେ ଆୟୋଜିତ କାର୍ଯ୍ୟକ୍ରମରେ ଯୋଗଦେଲେ ମୁଖ୍ୟମନ୍ତ୍ରୀ ୧୫୩୫ କୋଟି ଟଙ୍କାର ପ୍ରକଳ୍ପର ଶୁଭାରମ୍ଭ କରିଛନ୍ତି । ୧୬ ଆଶ୍ରମ ହାଇସ୍କୁଲ ଗୁଡିକର ଅପଗ୍ରେଡ଼ ପାଇଁ ୨୪୦କୋଟି ଖର୍ଚ୍ଚ କରିବେ ସରକାର, ୧୩ଟି ହାଇସ୍କୁଲକୁ ଅପଗ୍ରେଡ଼ କରି ଯୁକ୍ତ ୨ କରିବା ପାଇଁ ୨୨ କୋଟି ଲେଖାଏଁ ଦିଆଯିବ । ୪୨୬ଆବାସିକ ସ୍କୁଲ ପାଇଁ ୮୫୨ କୋଟି ଖର୍ଚ୍ଚ ହେବ । ଜନଜାତି ଐତିହ୍ୟ ଓ ସୁରକ୍ଷା ପାଇଁ ଜନଜାତି ଐତିହ ଏବଂ ସ୍ୱାଭିମାନ ଭବନ ୧୦୦ କୋଟିରେ ନିର୍ମାଣ ହେବ । ଭାଷା ଓ ସଂସ୍କୃତି ପ୍ରତିଷ୍ଠାନ ପାଇଁ ୫୦କୋଟି ବିନିଯୋଗ ହେବ । ୧୫୩୫କୋଟି ଟଙ୍କାର ପ୍ରକଳ୍ପ ଶିଳାନ୍ୟାସ ହୋଇଛି ।

ଇଟିଭି ଭାରତ, ଭୁବନେଶ୍ବର