ରାଉରକେଲା: ସରଗରମ ହେଉଛି ସୁନ୍ଦରଗଡ଼ ରାଜନୀତି । ସ୍ବାଧୀନ ଭାବେ ନାମାଙ୍କନ ଭରିଲେ ରାଉରକେଲା ବିଜେପିର ଆଶାୟୀ ପ୍ରାର୍ଥୀ ନିହାର ରାୟ । ଦିଲ୍ଲୀପଙ୍କୁ ଟିକଟ ମିଳିବା ପରେ ଅସନ୍ତୋଷ ଥିଲେ ନିହାର । ସେପଟେ ବୀରମିତ୍ରପୁର ପାଇଁ ଝାଡଖଣ୍ଡ ମୁକ୍ତି ମୋର୍ଚ୍ଚା ତରଫରୁ ମୈଦାନକୁ ଓହ୍ଲାଇଛନ୍ତି ନିହାର । ନିହାର ଆଜି ପ୍ରାର୍ଥୀ ପତ୍ର ଦାଖଲ କରିଛନ୍ତି ।
ରାଉରକେଲା ବିଧାନସଭା ପାଇଁ ପୂର୍ବତନ ବିଜେପି ବିଧାୟକ ପ୍ରାର୍ଥୀ ନିହାର ରାୟ ଏବଂ ବୀରମିତ୍ରପୁର ପାଇଁ ପୂର୍ବତନ ବିଧାୟକ ନିହାର ସୁରିନ ଆଜି ନାମାଙ୍କନ ଦାଖଲ କରିଛନ୍ତି । ତେବେ ନିହାର ରାୟ ପୁଣି ବିଜେପିରୁ ଟିକଟ ପାଇବା ନେଇ ଆଶା କରିଥିଲେ ହେଲେ ଦଳ ଦିଲ୍ଲୀପ ରାୟଙ୍କୁ ଟିକଟ ପ୍ରଦାନ କରିଥିଲା । ପରେ ନିହାର ପ୍ରଦର୍ଶନ କରିବା ସହ ଏଥର ସ୍ବାଧୀନ ଭାବେ ଲଢ଼ିବା ପାଇଁ ଅଣ୍ଟା ଭିଡିଛନ୍ତି । କିଛି ଦିନ ତଳେ ନିଜର ସମର୍ଥକଙ୍କ ସହ ବିଶାଳ ସଭା କରି ସ୍ୱାଧୀନ ପ୍ରାର୍ଥୀ ଭାବେ ଲଢିବା ନେଇ ଆଲୋଚନା କରିଥିଲେ ।
ଆଜି ନିହାର ନିଜର ହଜାର ହଜାର ସମର୍ଥକଙ୍କ ସହ ଏକ ବିରାଟ ଶୋଭାଯାତ୍ରାରେ ଆସି ପ୍ରାର୍ଥୀପତ୍ର ଭରିଛନ୍ତି । ରାଉରକେଲା ଉଦିତନଗର ସିଂହସିନୀ ମନ୍ଦିର ଠାରୁ ବିଶାଳ ରାଲିରେ ଆସି ଉପଜିଲ୍ଲାପାଳ କାର୍ଯ୍ୟାଳୟ ଠାରେ ନାମାଙ୍କନ ପତ୍ର ଦାଖଲ କରିଛନ୍ତି । ସେପଟେ ବିଜେପି ,ବିଜେଡି ଓ କଂଗ୍ରେସକୁ କଡ୍ଡା ଟକ୍କର ଦେବେ ବୋଲି କହିଛନ୍ତି ସେ । ନିହାର ରାୟ କହିଛନ୍ତି," ଆଜିର ଶୋଭାଯାତ୍ରାକୁ ଦେଖି ଜାଣିପାରୁଥିବେ ଏଥର କଡା ପ୍ରତିଦ୍ବନ୍ଦିତା ହେବ । ରାଉରକେଲାରେ ସ୍ୱାଧୀନ ଭାବେ ନିହାର ସେନା ବିଧାନସଭା ଆସନ ଗ୍ରହଣ କରିବ ଏବଂ ନିଶ୍ଚିତ ବିଜୟୀ ହେବୁ ।
ସେହିପରି ଆଜି ରାଉରକେଲା ଠାରେ ବୀରମିତ୍ରପୁର ନିର୍ବାଚନ ମଣ୍ଡଳୀ ଲାଗି ନିହାର ସୁରିନ ମଧ୍ୟ ଝାଡ଼ଖଣ୍ଡ ମୁକ୍ତି ମୋର୍ଚ୍ଚା ପକ୍ଷରୁ ପାନପୋଷ ITDAରେ ପ୍ରାର୍ଥୀ ପତ୍ର ଦାଖଲ କରିଛନ୍ତି । ପୂର୍ବରୁ ସେ ବୀରମିତ୍ରପୁରର ବିଧାୟକ ଭାବରେ ନିର୍ବଚିତ ହୋଇଥିଲେ । ଏହି ଅବସରରେ ସେ କହିଛନ୍ତି ଯେ, ଗତ ଦୁଇ ତିନି ଥର ହେବ କେହି ଲୋକଙ୍କ ପାଇଁ କାର୍ଯ୍ୟ କରି ନାହାନ୍ତି । ବୀରମିତ୍ରପୁରବାସୀଙ୍କ ପଖରେ କେହି ଛିଡା ହୋଇ ନାହାନ୍ତି ତେଣୁ ଏଥର ବାଧ୍ୟ ହୋଇ JMMରୁ ପ୍ରାର୍ଥୀ ପତ୍ର ଦାଖଲ କରୁଛି ।
ଇଟିଭି ଭାରତ, ରାଉରକେଲା
