ଭୁବନେଶ୍ବର: ରାଜଧାନୀରେ ହିଟ୍ ଆଣ୍ଡ ରନ୍ । ମର୍ଣ୍ଣିଂ ୱାକ ବେଳେ ଗାଡି ଧକ୍କାରେ ଚାଲିଗଲା ରିଟାର୍ଡ କର୍ଣ୍ଣେଲଙ୍କ ଜୀବନ । ଆଜି(ଶନିବାର) ଚନ୍ଦ୍ରଶେଖରପୁର ଥାନା ନିଳାଦ୍ରୀ ବିହାର ଏଟିଏମ୍ ଛକ ପାଖ ଶନି ମନ୍ଦିର ନିକଟରେ ଘଟିଛି ଏହି ଦୁର୍ଘଟଣା । ମୃତ ରିଟାର୍ଡ କର୍ଣ୍ଣେଲ ହେଲେ ଟିଏ ବାଟାଲିୟନର କାର୍ଯ୍ୟରତ ଥିବା ଅବସରପ୍ରାପ୍ତ ଡାକ୍ତର ରବିନ୍ଦ୍ର କୁମାର ବେହେରା ।
କାଳ ହେଲା ମର୍ଣ୍ଣିଂ ୱାକ
ସବୁଦିନ ପରି ଆଜି ମଧ୍ୟ ମର୍ଣ୍ଣିଂ ୱାକରେ ବାହାରି ପଡିଥିଲେ ରିଟାର୍ଡ କର୍ଣ୍ଣେଲ ଆର.କେ ବେହେରା । ସକାଳ ପ୍ରାୟ 5.30 ବେଳେ ଫୁଲ ତୋଳିବା ପରେ ସେ ମର୍ଣ୍ଣିଂ ୱାର୍କରେ ଯାଉଥିଲେ । ହେଲେ ନିଳାଦ୍ରୀ ବିହାର ଶନି ମନ୍ଦିର ନିକଟରେ ଏକ ଅଜଣା ଗାଡି ଆସି ତାଙ୍କୁ ପଛପଟୁ ଧକ୍କା ଦେଇଥିଲା । ପଛପଟ ମୁଣ୍ଡ ମାଡ ହୋଇ ଅଧିକ ରକ୍ତସ୍ରାବ ହେବାରୁ ତାଙ୍କର ମୃତ୍ୟୁ ହୋଇଛି । ମୃତଦେହକୁ କ୍ୟାପିଟାଲ ହସ୍ପିଟାଲ ନିଆଯାଇଥିବା ବେଳେ ପରିବାରଲୋକଙ୍କ ଉପସ୍ଥିତିରେ ପୋଷ୍ଟମର୍ଟମ କରାଯାଇଛି ।
ଚନ୍ଦ୍ରଶେଖରପୁର ଥାନା ପୋଲିସର ତନାଘନା:
ଖବର ପାଇ ଚନ୍ଦ୍ରଶେଖରପୁର ଥାନା ପୋଲିସ କେସ ନଂ 52/25, 281 ( ଖରାପ ଗାଡି ଚାଳନା), 106( ଅବହେଳାରୁ ମୃତ୍ୟୁ)BNSରେ ମାମଲା ରୁଜୁ କରି ତଦନ୍ତ ଆରମ୍ଭ କରିଛି । ଏନେଇ ପୋଲିସ ହିଟ୍ ଆଣ୍ଡ ରନ ମାମଲା ରୁଜୁ କରି ତଦନ୍ତ ଚଳାଇଛି ।
ଦୁଃଖ ପ୍ରକାଶ କଲେ ବରିଷ୍ଠ ନାଗରିକ:
ଏହି ଦୁର୍ଘଟଣାକୁ ନେଇ ନିଳାଦ୍ରୀ ବିହାର ବରିଷ୍ଠ ନାଗରିକ ଓ ସୋସାଇଟ ପକ୍ଷରୁ ଏନେଇ କ୍ଷୋଭ ପ୍ରକାଶ କରାଯାଇଛି ।
ସରକାର ପାଦଚଲା ରାସ୍ତା କରନ୍ତୁ:
ଏହି ଦୁର୍ଘଟଣାକୁ ନେଇ ବ୍ରିଗେଡିୟର ଏଲ ସିଂ ପଟ୍ଟନାୟକ କହିଛନ୍ତି, ‘ମୃତ ରବିନ୍ଦ୍ର କୁମାର ବେହେରା ସବୁଦିନ ମର୍ଣ୍ଣିଂ ୱାକରେ ଯାଆନ୍ତି । ପ୍ରତିଦିନ ଭୋର 4.30ରୁ 5ଟା ମଧ୍ୟରେ ମର୍ଣ୍ଣିଂ ୱାକରେ ଯାଇଥାନ୍ତି । ସବୁଦିନ ଭଳି ଆଜି ବି ସେ ଯାଇଥିଲେ । ସକାଳୁ କୁହୁଡି ଥିଲା । ଏହା ଏକ ହିଟ୍ ଆଣ୍ଡ ରନ କେସ । ସକାଳୁ ଏପରି 3ଟି କେସ ଆସିଛି । ଏଥିପାଇଁ ସରକାରଙ୍କୁ ଆମେ ପରାମର୍ଶ ଦେଉଛୁ । ସରକାର ଲୋକଙ୍କ ପାଇଁ ପାଦଚଲା ରାସ୍ତା କରନ୍ତୁ । ସବୁ ସ୍ଥାନରେ ସିସିଟିଭି ଲଗାଯାଇ ସେମାନଙ୍କୁ ଧରନ୍ତୁ । କାର୍ଯ୍ୟାନୁଷ୍ଠାନ ନିଆଯାଉ । ନଚେତ୍ ଆଗକୁ ଏମିତି ଅନେକ ଘଟଣା ଘଟିପାରେ ।’
ଏହା ମଧ୍ୟ ପଢନ୍ତୁ: ରାଜଧାନୀ ପରେ ପୁରୀରେ ଦୁର୍ଘଟଣା ଘଟାଇଲା ‘ମୋ ବସ’, ୩୦ରୁ ଊର୍ଦ୍ଧ୍ବ ଆହତ |
ମଣିଷପଣିଆ କୁଆଡେ ଗଲା ବୋଲି ପ୍ରଶ୍ନ କଲେ ବରିଷ୍ଠ ନାଗରିକ:
ସେହିପରି ଆଉ ଜଣେ ବରିଷ୍ଠ ନାଗରିକ କହିଛନ୍ତି, ‘ରାସ୍ତାରେ ଜଣଙ୍କ ଶରୀର ପଡିଥିଲା । କେହି ଟିକେ ଦେଖିଲେନି । ଆମର ମାନବିକତା କୁଆଡେ ଗଲା । କେହି ଯଦି ଉଠାଇଥାନ୍ତେ ହୁଏତ ସେ ବଞ୍ଚି ଯାଇପାରିଥାନ୍ତେ ।’
ରାଜଧାନୀରେ ବଢୁଛି କି ଦୁର୍ଘଟଣା ମାମଲା:
ନିକଟରେ ଗତ ଜାନୁଆରୀ 23ରେ ସିରିଜ ଦୁର୍ଘଟଣା ଘଟାଇଥିଲା ମୋ ବସ୍ । ରାଜମହଲରୁ ମାଷ୍ଟରକ୍ୟାଣ୍ଟିନ ମଧ୍ୟରେ ଘଟିଥିଲା ସିରିଜ ଦୁର୍ଘଟଣା । ଯେଉଁଥିରେ 4 ଜଣ ଆହତ ହୋଇଥିଲେ । ଯେଉଁଥିରେ 3ଟି ଗାଡି କ୍ଷତି ହୋଇଥିଲା ।
ଇଟିଭି ଭାରତ, ଭୁବନେଶ୍ବର
