ପ୍ରଭାବୀ ନୁହେଁ ବଜେଟ, ଓଡ଼ିଶା ପାଇଁ ନାହିଁ ସ୍ୱତନ୍ତ୍ର ପ୍ୟାକେଜ: ବିଧାୟିକା ସୋଫିଆ ଫିର୍ଦ୍ଦୋଶ

ବଜେଟକୁ ନେଇ କଣ କହୁଛନ୍ତି କଟକ-ବାରବାଟୀ ବିଧାୟିକା ସୋଫିଆ ଫିର୍ଦ୍ଦୋଶ

କଟକ/ସମ୍ବଲପୁର: ଅର୍ଥମନ୍ତ୍ରୀ ନିର୍ମଳା ସୀତାରମଣ ଆଜି (ଶନିବାର)କେନ୍ଦ୍ରୀୟ ବଜେଟ ୨୦୨୫-୨୬ ଉପସ୍ଥାପନ କରିଛନ୍ତି । ଏହି ବଜେଟକୁ ନେଇ ଭିନ୍ନ ଭିନ୍ନ ମତ ସାମ୍ନାକୁ ଆସିଛି । କଟକ-ବାରବାଟୀ ବିଧାୟିକା ସୋଫିଆ ଫିର୍ଦ୍ଦୋଶ ବଜେଟକୁ ନୈରାଶଜନକ କହିଛନ୍ତି ।

ପ୍ରଭାବୀ ନୁହେଁ ବଜେଟ:

ବିଧାୟିକା ସୋଫିଆ ଫିର୍ଦ୍ଦୋଶ କହିଛନ୍ତି," ବିକଶିତ ଭାରତ ଗଢିବା ପାଇଁ ଜିଡିପି ଅଭିବୃଦ୍ଧି ହାର ଦରକାର ୮ ପ୍ରତିଶତ । ଯଦି ଲଗାତର ୧୦ ବର୍ଷ ଧରି ଜିଡିପି ଅଭିବୃଦ୍ଧି ହାର ୮ ପ୍ରତିଶତ ରହିବ ତାହାଲେ ବିକଶିତ ଭାରତ ଗଠନ ସମ୍ଭବ ହୋଇପାରିବ । ଦୁଃଖର କଥା, ୪ ବର୍ଷ ମଧ୍ୟରେ ସବୁଠୁ କମ ଜିଡିପି ୬.୪ ପ୍ରତିଶତ ଏଥର ରହିଛି । ଏହି ବଜେଟରେ ଭୂମି ଓ ଶ୍ରମିକ ନେଇ ଅନେକ ସଂସ୍କାରର ଆବଶ୍ୟକ ଥିଲା । ଯାହାଫଳରେ ଜିଡିପି ବଢିପାରିଥାନ୍ତା । ମଧ୍ୟବିତ୍ତ ପରିବାରକୁ ଆବଶ୍ୟକ, ନିତ୍ୟ ବ୍ୟବହାର୍ଯ୍ୟ ସାମଗ୍ରୀରେ ଦର କମ କରିବା । ଦୁର୍ଭାଗ୍ୟବଶତଃ ନିତ୍ୟ ବ୍ୟବହାର୍ଯ୍ୟ ଦର ଉପରେ ଟ୍ୟାକ୍ସ କମ କରାଯାଇନାହିଁ । ଓଡ଼ିଶା ସମସ୍ତ କ୍ଷେତ୍ରରେ କେନ୍ଦ୍ରକୁ ସହଯୋଗ କରିଆସୁଛି । କିନ୍ତୁ ବଜେଟରେ ବିହାର ପାଇଁ ସ୍ୱତନ୍ତ୍ର ପ୍ୟାକେଜ ଥିବା ବେଳେ ଓଡ଼ିଶା ପାଇଁ କୌଣସି ସ୍ୱତନ୍ତ୍ର ପ୍ୟାକେଜ ନାହିଁ । ଏହା ପ୍ରଭାବୀ ବଜେଟ ହୋଇପାରିନାହିଁ ।"

ବିହାରକୁ ଅଧିକ ଗୁରୁତ୍ୱ:

ସେହିଭଳି ଅର୍ଥନୈତିଜ୍ଞ ଲିପିଶ୍ରୀ ଦାସ କହିଛନ୍ତି, "ବଜେଟରେ ମଧ୍ୟବିତ୍ତ ପରିବାର ପାଇଁ ୧୨ ଲକ୍ଷ ପର୍ଯ୍ୟନ୍ତ ଟ୍ୟାକ୍ସ ଛାଡ କରାଯାଇଛି । କିନ୍ତୁ ମଧ୍ୟବିତ୍ତ ପରିବାରର ରୋଜଗାର ଏବେ ୧୨ ଲକ୍ଷ ଉପରେ ରହିଛି । କହିବାକୁ ଗଲେ ଏହା ସେତେଟା ରିହାତି ଲୋକଙ୍କୁ ମିଳିନି । ଅଳ୍ପ କିଛି ଲୋକ ଏଥିରେ ଲାଭ ପାଇବେ । କୃଷକଙ୍କ ପାଇଁ ଧନ-ଧ୍ୟାନ କୃଷି ଯୋଜନା ରହିଛି । ଆତ୍ମନିର୍ଭର ଭାରତ ଯୋଜନା ୬ ବର୍ଷ ପାଇଁ ଚାଲିବ । କିଷାନ କ୍ରେଡିଟ କାର୍ଡରେ କୃଷକମାନେ ଅଧିକ ଲୋନ ପାଇପାରିବେ । MSMEକୁ ଅଧିକ ପ୍ରାଧାନ୍ୟ ଦିଆଯାଇଛି । ସରକାର ବିହାରକୁ ଅଧିକ ଗୁରୁତ୍ୱ ଦେଇଛନ୍ତି । ସାମାଜିକ ସୁରକ୍ଷାକୁ ବିଶେଷ ଧ୍ୟାନ ଦିଆଯାଇନାହିଁ ।"

ଏହାମଧ୍ୟ ପଢନ୍ତୁ...

'ବଜେଟ ଦ୍ୱାରା ବିକଶିତ ଭାରତର ମୂଳଦୁଆ ପଡିଛି'

ବଜେଟକୁ ନେଇ ସମ୍ବଲପୁର ଆଇଆଇଏମର ନିର୍ଦ୍ଦେଶକ ମହାଦେବ ପ୍ରସାଦ ଜୟଶ୍ୱାଲ କହିଛନ୍ତି," ଏହି ବଜେଟ ଦ୍ୱାରା ବିକଶିତ ଭାରତର ମୂଳଦୁଆ ପଡିଛି l ପ୍ରଧାନମନ୍ତ୍ରୀଙ୍କ ଯେଉଁ ଲକ୍ଷ୍ୟ ରହିଛି ବିକଶିତ ଭାରତ ପାଇଁ ଏଥିପାଇଁ 3 ରୁ 4 ଟି ବିଷୟରେ ଆବଶ୍ୟକତା ରହିଛି ଯାହା ଏହି ବଜେଟରେ ଦେଖିବାକୁ ମିଳିଛି l ପ୍ରଥମ କଥା ହେଉଛି ମଧ୍ୟବିତ୍ତ ଶ୍ରେଣୀର ଲୋକଙ୍କ ଉପରୁ ଟ୍ୟାକ୍ସ ବୋଝ ହ୍ରାସ କରାଯାଇଛି l ଆମ ଦେଶରେ ସବୁଠାରୁ ବଡ଼ କରଦାତା ମଧ୍ୟବିତ୍ତ ଶ୍ରେଣୀର ଲୋକ ଥିବା ବେଳେ ତାଙ୍କ ଉପରୁ ଟିକସର ବୋଝ ହ୍ରାସ କରାଯାଇଛି l 12 ଲକ୍ଷ ପର୍ଯ୍ୟନ୍ତ ଟ୍ୟାକ୍ସ ଛାଡ଼ କରାଯାଇଛି l ଦ୍ଵିତୀୟ ଗୁରୁତ୍ୱପୂର୍ଣ୍ଣ କଥା ହେଉଛି ଏହି ବଜେଟରେ AI ସେକ୍ଟର ପାଇଁ 500 କୋଟିର ପ୍ରାବଧାନ ରହିଛି l ଏହା ଏକ ବହୁତ ବଡ଼ ପଦକ୍ଷେପ l ଏହା ସହ ଷ୍ଟାର୍ଟ ଅପ ଉପରେ ମଧ୍ୟ ପ୍ରାଥମିକତା ଦିଆଯାଇଛି । ଏହାସହ କୃଷି, କୃଷି ସମ୍ପର୍କୀୟ ବ୍ୟବସାୟ ଓ ଚାଷୀଙ୍କ ପାଇଁ ବହୁତ ରିହାତି ବ୍ୟବସ୍ଥା ରଖାଯାଇଛି ଏହା ମଧ୍ୟ ଏକ ଭଲ ପଦକ୍ଷେପ l"

ଇଟିଭି ଭାରତ, କଟକ/ ସମ୍ବଲପୁର